Paulus nlotar tenan a ma nfalyawang ne rasul urun ia
1 Terang a valing averi!
Tamata boku rfalak ne,
“Paulus wol nabrahi ma nsurak mia wean i itmunuk tna'a wan isa,
na'uk wean i nana'a raroa,
na nabrahi watan ma nsurak mia.”
Na'uk ya'a Paulus,
ufakabava tenang a ovu umarkai wean Kristus.
2 Ba era urun tali mia,
boma deka mkyiwal ya'a ma ufaturu ning barahin a na'a wahabira ralan ra,
wean i ralang a nfalak roak ma otu.
Otu wean inyai ma ufaturu ning barahin a verin tamata ovi ranovak ne,
mami vava'at ra wean watan tamata ovi wol rorang Ubu.
3 Kena ma amva'at na'a lanit ivavan ini,
na'uk ami wol amorang tamata rira fikiran ra na'a lanit ivavan,
ma amangal tamata ovi rangal ami.
4 Minak i amala ma al amangal tamata rira fikiran ovi wol kena ra,
wol ntali lanit ivavan ini.
Na'uk amala minak i Ubu nfangora lahir ovu Ni ngrebat a,
ma nkama'ar nala munuk fikiran sian ra tali tamata ovi rangal Ubu Ni vaivatul ra.
Inyai wean i nana'a rihi,
ma tamata rala minak al rkama'ar wan ovi rangrebat ra.
5 Amala Ubu Ni ngrebat a ma amfaleka munuk tamata ovi rfakaratat tenarira ra,
rira vaivatul ovi rotu angangal ma tamata ra deka rka'a Ubu.
Amfaleka tamata avyai rira fikiran ovi wol kena ra,
ovu wean i amkeak rira fikiran ra ma rotu a'uk afa ovi Kristus inan a.
6 Na'ut i myot-orang munuk roak afa ovi Yesus Kristus nfalak ra,
na ami veka amukun munuk tamata ovi raktufan ra obin.
7 Msyi'ik ma lolin afa ovi rvotuk na'a matabira ra!
Wean i tamata isa tali mia norang urun ne,
Kristus Ni roak ia,
na ia musti nanovak vali na'a ralan a ne,
Kristus Ni vali ami,
wean vali ia.
8 Ya'a wol uma'it,
wean i ufamalik ma rivun na'a Duila'a Ni ngrebat i nala roak verin ami,
tevek amala ngrebat yai ma amfangrebat bira inorang a.
Ami wol amala ngrebat yai ma amot-visal bira inorang a.
9 Ufalak wean inyai,
tevek ufena betane fyalak ne,
ufabobar mia ovu ning surat ra.
10 Tamata ra rfalak ne,
“Paulus ni surat ihin a aleman ovu nangrebat urun.
Na'uk wean i itmunuk tna'a wan isa,
na notu ma felan a wean tamata ovi wol rangrebat,
ovu ni afa ovi nfalak ra wol ihir akataka.”
11 Na'uk tamata ovi rfalak wean inyai musti ranovak veki,
tevek wean i itmunuk tna'a wan isa,
na veka lyawan lahir ne,
veka amala vaivatul ovi aleman ra.
Afa avyai wean watan vaivatul aleman ovi amfadoku roak na'a mami surat ra.
Paulus nfamalik ni ngrebat ma al ntabu tamata ovi rorang Yesus na'a Korintus, tevek Ubu notu ma neluk rasul ma nfamalik Ni Ivar Lolin verin ira
12 Ami wol amabrahi ma amfakaratat tenamami ra,
te amfalak ne,
ami weamami tamata ovi ranovak ne,
tamata dawan ira.
Ira ka'i rukur watan tenarira ra ovu rira afa i ba'i rala ala rukur ira,
ovu na'a waharira ralan ra,
na ira ka'i raraning ira ma rfalak ne,
dawan ira.
Tamata avyai rboda urun i lahir!*
13 Ami wol amotu wean inyai.
Ami amafena ma amfadawang tenamami ra ma nlia tali afa ovi Ubu nfadoku ra.
Na'uk amfamalik watan na'a karya i Ubu nfadoku roak verin ami.
Mia ini mnya'a vali wan ovi amkarya na'a.
14 Ba na'ut i amati ma amfamalik Ubu Ni Ivar Lolin i nfamalik Kristus,
na ambana roak ma ti naran wan i mnya'a ma amfamalik vali verin mia.
Amfabana mami karya a,
na wol ambana lia wan ovi rfadoku roak a,
na'uk mia mryenar lan roak Ivar yai tali ami.
15 Ami vali wol amfadawang tenamami ra na'a tamata liak rira karya ovi rotu roak na'a wan i Ubu wol nfaturu verin ami.
Ami amfabana watan mami karya a,
na'a wan i Ubu nfadoku roak verin ami.
Amera ma fara bira inorang a ntafal na'a Kristus,
boma bisma amot-nala karya ini ma nmela ma dawan.
16 Wean urun inyai,
boma ami bisma amati ma amfamalik vali Ubu Ni Ivar Lolin na'a wan liak ovi tamata ra wol rti obin.
Amafena ma amfadawang tenamami ra na'a afa ovi tamata liak ra rotu roak,
na'a wan ovi rkarya na'a.
17 Rtulis roak na'a Surat Ralan wean ini,
“Wean i tamata iki watan mane nfadawang afa isa,
na nfadawang a'uk afa ovi Duila'a notu roak a.”
18 Wean i tamata rfadawang tenarira ra,
na ita wol tka'a ne,
Duila'a ntorung te wahal.
Na'uk wean i Duila'a nfadawang tamata ra,
na inyai lolin urun.