Tamata ovi rorang Yesus na'a Korintus rasdovuk rira kubang ra ma rala verin tamata ovi rorang Yesus na'a propinsi Yudea
1-2 Terang a valing averi!
Uka'a roak ne,
ralabira ra lolin urun,
bi myala bira kubang ra verin tamata ovi rorang Yesus na'a Yudea.
Wol lolin ma utulis kubang avyai na'a ning surat a,
tevek lyawan roak ovu uka'a ne,
inabira ma mlyobang ira,
bi ufadawang roak mia verin tamata Makedonia ra.
Ufalak verin ira ne,
“Varat i nti roak veli,
na terad a valid ovi rna'a propinsi Akhaya* rasdovuk roak rira kubang ra,
ma veka rala ma al rlobang tamata ovi rorang Yesus.”
Wean inyai,
bi tamata rivun na'a Makedonia mane rot-orang mia,
ma rasdovuk vali rira kubang ra.
3 Velik aba,
usinir Titus ovu terad a valid irua yai ma rti rtuan mia,
boma afa ovi amfalak roak ma al amfadawang mia yai,
wol mane vaivatul vu watan.
Otu wean inyai,
boma misdovuk kikyai bira kubang ra munuk,
tevek ufalak roak verin ira ne,
misdovuk munuk roak.
4 Ami veka amama'it watan,
wean i tamata Makedonia ra rorang ya'a na'ut i uti ma ulola mia ma rsi'ik ne,
wol misdovuk kubang avyai obin.
Ami veka amama'it,
tevek amfalak lan roak verin ira ne,
misdovuk munuk roak kubang avyai.
Wol mane ami watan amama'it,
na'uk mia vali veka mya'it.
5 Ba wean inyai,
bi usinir lan terad a valid avyai ma rti rlobang mia,
boma misdovuk nala bira kubang ovi mtyorung roak ma myala yai.
Otu wean inyai,
boma nfaturu ne,
bira kubang ovi misdovuk avyai myala ovu ralabira urun,
ovu wol mane tamata rkiwal mia ma myala.
Tlobang tamata ra ovu raladida urun, na Ubu veka naflahar ita
6 Mingnanang vaivatul ini!
Tamata ovi ravuri-rava nabat ra kadkedan watan na'a rira va'i ra,
na rira va'i ihin a veka kedan a watan vali.
Na'uk tamata ovi ravuri-rava ma nabat rivun,
na rira va'i ihin a veka rivun vali.
7 Lokat tamata musti ka'i nala ni kubang a wean lahir i ralan a nfalak a.
Deka mane nala ovu ralan lalau,
te tamata liak ra rkiwal ia beti nala.
Na'uk fara nala ovu ralan lolin,
tevek Ubu nlobang urun tamata i nala afa verin tamata liak ra ovu ralan lolin urun.
8 Ubu Ni ngrebat ma nala Ni kalolin a munuk verin mia,
boma nfakena afakataka munuk na'a bira vava'at ra.
Ia notu munuk wean inyai verin mia,
boma myot-nala munuk karya lolin ra ma al mlyobang tamata liak ra.
9 Wean i rtulis roak na'a Surat Ralan a ne,
tamata i nlobang ma dawan tamata kasian ra,
“Ia nala kalolin a verin tamata kasian ra,
Ni vava'at nmalola lalawatan,
nata ti wol ni wahan.”*
10 Ubu nala nabat ra verin tamata ovi rotu va'i ra,
ovu vali nala afamtahan ra verin ita munuk.
Ia veka notu vali wean inyai verin mia.
Ia veka nala nabat ra ma mivuri-miva,
ovu veka notu ma nabat avyai vuar ma rivun,
boma ralabira ra lolin ma myala ma dawan vali verin tamata ovi wol rira ra.*
11 Ubu veka nfaka'i mia ovu Ni kalolin ra na'a afaka watan,
boma mlyobang lalawatan tamata ra ovu ralabira urun.
Tamata ra veka rfalak fara weninyai verin Ubu,
tevek bira kubang ovi misdovuk roak ma amsiduk verin ira.
12 Bira karya lolin i myotu ini,
wol mane nlobang watan Ubu Ni tamata inorang ovi rira kasian a dawan na'a Yudea,
na'uk notu vali ma tamata rivun rfalak fara weninyai verin Ubu,
tevek afa ovi myotu roak yai.
13 Tali bira karya lolin i fyaturu yai,
na tamata ovi rorang Yesus na'a Yudea veka rfadawang Ubu,
tevek rsi'ik ne,
myot-orang Ubu Ni Ivar Lolin i nfamalik Kristus.
Ira rfadawang Ia vali,
tevek ralabira lolin ma msyiduk bira afaka watan verin ira,
ovu verin tamata ra munuk.
14 Ira rlobang mia ovu veka raflurut verin mia,
tevek Ubu nala roak Ni rala lolin i dawan urun a verin mia.
15 Terang a valing averi!
Mya ma tfalak fara weninyai verin Ubu,
tevek nala roak Yanan a verin ita.
Dida vaivatul ra wol raran ma tfamalik nala afa ovi nala roak verin ita.