Paulus nafena lahir ma tamata ovi rorang Yesus na'a Korintus rorang tamata ovi rsiklabir ma rfalak ne, rasul ira
1 Terang a valing averi,
ya'a era verin mia ma mtyahang ralabira veki na'a afa ovi mane ufalak verin mia ini,
velik ne minovak ne,
ya'a uboda na'a afa ovi mane ufalak ra.
Na'uk uka'a roak ne,
mtyahang nal ralabira.
2 Ya'a uwanar urun mia,
wean lahir i Ubu nwanar mia.
Ya'a weang baba isa i nwanar yanan vata,
ti naran ni amar i mane nsifa,
boma wol notu sala na'ut i nala ia verin brana a.
Mia weabira vata yai.
Vata yai wol ntuba ovu brana obin.
Vata yai rtavun teri roak ia ma veka nsifa ovu brana isa.
Brana yai Yesus Kristus.
3 Na'uk ubobar na'a ralang a na'a afa ovi minovak ra,
betane bira fikiran ratvali ewal ma byan-tamuri Yesus Kristus wean lalan a,
na'ut i nifa taltolar nlabir waweang Hawa.
Wean inyai,
na nfaturu roak ne,
wol ralabira urun ma myorang Yesus Kristus.
4 Ufalak wean inyai,
tevek inabira ma myorang watan tamata ovi rma ma rfamalik Yesus liak a.
Yesus i rfamalik yai,
naling ia tali Yesus i amfamalik verin mia a.
Velik ne tamata avyai rfamalik roh i wol wean Roh i amfamalik a,
na'uk inabira ovu mtyorung ma myala roh yai tali tamata avyai.
Rfamalik ivar lolin i wol wean Ivar Lolin i amfamalik roak verin mia,
na'uk mtyorung vali afa yai.
5 Na'uk ya'a ning fikiran a wean ini:
rasul ovi tamata rfalak ne,
dawan urun ira,
na rasul avyai rira dawan a wol nlia ya'a.
6 Snain a wol ka'i uka'a ma ungrihi ma lolin wean tamata avyai,
na'uk uka'a urun ma ufamalik afa ovi rtali Ubu.
Amfaturu munuk roak afa yai verin mia na'a afa ovi amotu ovu amair ra munuk.
7 Na'ut i ufamalik Ubu Ni Ivar Lolin a verin mia,
na wol era ma byahir ya'a,
na'uk ufakabava tenang a wean tamata sansinir,
boma ufadawang mia.
Ba minovak ne,
otu wean inyai verin mia,
na otu sala roak?
Velik aba,
wahal!
8 Na'ut i air mia,
na tamata ovi rorang Yesus rira sidovung na'a wan liak ra rlobang ya'a ovu kubang.
Ba inyai wean watan i ufaruki ira,
boma ulobang mia.
9 Na'ut i itmunuk tna'a wan isa ovu utuan susa,
tevek wol ning kubang,
na wol otu susa mia ma wol era lablobang tali mia.
Na'ut i wol ning akataka,
na terad a valid tamata ovi rorang Yesus tali Makedonia rala afa avyai verin ya'a.
Na'a afaka watan,
na usi'ik wang ma lolin,
boma deka era kubang tali mia,
ovu veka otu lalawatan wean inyai.
10 Ivar i ntali Yesus Kristus yai kena munuk,
ovu nana'a lalawatan ralang a,
ba afa ovi ufalak ini kena urun.
Ya'a wol era kubang tali tamata iki watan na'a propinsi Akhaya.
Ba wol tamata isa vali notu teri ya'a na'a afa ovi ralang ila'a nfadoku roak ma ufadawang a,
ma wol era kubang.
11 Notu afakinimi ufadoku ma wol otu varvara verin mia i?
Otu wean inyai,
tevek ulobang mia.
Ubu sa'i nka'a ralang a ne,
ulobang mia.
12 Na'uk afa ovi otu roak fiang ini,
veka otu lalawatan ma angal teri tamata ovi rdava linga'an,
ma rfalak verin tamata ovi rfakaratat tenarira ra ne,
ira wearira watan ami.*
13 Tamata avyai rasul siklabir ira watan,
ovu rkarya watan ma rdava uturira alaling.
Ira rotu ma felarira ra wean Kristus Ni rasul ra.
14 Deka tabrian afa avyai,
tevek nitdawan notu vali ma felan a lyawan,
wean Ubu Ni sansinir ntali lanit ratan a.
15 Ba deka tabrian wean i nitdawan ni sansinir ra rotu ma felarira ra wean vali tamata ovi rira vava'at ra rmalola ma rfabana Ubu Ni karya a.
Tamata avyai veka rtuan vali enarira ra tali afa ovi rotu ra.
Paulus nfamalik angangal na'a ni karya a ma nfaturu ne, Kristus Ni rasul verin ia
16 Terang a valing averi!
Ufalak fasa ewal verin mia ne,
tali bir tinemun,
na deka tamata isa vali nanovak ne,
uboda.
Na'uk wean i minovak wean inyai,
na mtyorung ma myala ya'a wean tamata ovi rboda ra,
boma ya'a vali ufadawang tenang a.
17 Ya'a mane ufalak afa ovi otu ma ufakaratat tenang a.
Na'uk Duila'a wol nfalak ma ufalak afa avyai.
Ya'a ungrihi weang watan tamata i nboda ma ufadawang tenang a.
18 Tamata rivun rfadawang tenarira ra na'a afa ovi rotu ra,
wean afa ovi rna'a lanit ivavan ini,
ba ya'a ufadawang vali tenang a.*
19 Ufalak wean inyai,
tevek minovak ne,
bira kaka'a dawan.
Na'uk velik aba,
inabira ma mtyahang ralabira verin tamata ovi rboda ra!
20 Mia mtyahang ralabira watan ma tamata ra rotu mia wean tamata sansinir ra,
ovu rfaruki mia,
ovu vali rfareta tia ma watan mia.
Mia mtyahang vali ralabira ma tamata ra rfakaratat tenarira ra ma rfama'it mia,
ovu rtafitil wahabira ra.
21 Uma'it ma ufalak verin mia ne,
wol ning ngrebat ma ot-orang afa ovi rasul siklabir avyai rotu ra!
*
Na'uk afa ovi rotu ma al rfakaratat tenarira ra,
ya'a ubrahi vali ma otu wean ira. Ya'a otu watan wean tamata ovi rboda rira afa ovi rotu ra.
22 Ira rfalak ne,
tamata Ibrani ira?
Ya'a bisma ufalak watan ne,
tamata Ibrani ya'a vali.
Ira rfalak ne,
tamata Israel ira?
Ufalak ne,
tamata Israel ya'a vali!
Ira rfalak ne,
uburir-nusirira Abraham,
na ufalak vali ne,
ubung-nusing vali Abraham!
23 Tamata avyai rkarya na'a Yesus Kristus Ni karya a?
Ya'i yo!
Ungrihi wean inyai,
na ya'a weang tamata i nfoar urun!
Velik aba,
ya'a ukarya ma nlia munuk tamata avyai.
Tamata boku rala ya'a ma ti ra'abu'i ya'a,
nlia tali tamata avyai.
Amar boku rvaval urun ya'a,
ma nlia tali ira.
Utuan ma rivun roak susa ovi aleman urun i lahir,
ba notu ma wol ufikir roak ne,
veka uva'at.
24 Yahudi ra rukun nala falima ya'a roak.
Lokat amar i rukun ya'a,
na ba'i rala afwatan ulin ala rasveva ya'a,
ti naran vututelu rahin isi.
25 Tamata Roma ra rvaval nala fatelu ya'a ovu navnaval.
Ira rteva ya'a fasa vali.
Kabal itelu ovi avul ra rakreti ma rakfefar lahir.
Ya'a ufofa vali ma una'a tahat ratan amar isa ovan isa.
26 Ning banbanan rivun roak,
ovu na'a ning banbanan avyai,
na utuan susa rivun.
Utuan susa dawan na'a oar ralan ra,
ovu tali tamata ktufan ovi rna'a linga'an ralan.
Ning tamata Yahudi ra rwi-rwa ya'a,
ovu tamata ovi wol Yahudi ra rwi-rwa vali ya'a.
Utuan susa vali tali tamata ovi rna'a kota ra,
tevek rotu ma vangoa-vanga.
Ba sian a dawan urun i lahir nkena ya'a na'a wan lean vu ra,
ovu na'a tahat,
ovu vali tali tamata ovi rsiklabir ma rfalak ne,
rorang Yesus.
27 Karya i ufabana ini nfafrea urun ya'a.
Ya'a iva'ung urun ma ufabana karya aleman ini,
ba amar boku,
na wol utuba,
ublafar ovu ubroa,
na'uk wol ufna'an-ufnenu.
Radridin dawan nkena ya'a,
tevek ning kadaravit ra wol naran ma al uteri ya'a.
28 Nlia tali afa avyai munuk,
na ning varvara ntafal ma aleman.
Lokat amar ufikir ma afa rivun da'in,
tevek ning varvara ma usi'ik tamata ovi rorang Yesus rira sidovung ra munuk rira vava'at ra.
29 Wean i boku ralarira lalau tevek rira inorang wol nangrebat,
na ufarnuang vali wean inyai.
Wean i boku rleka na'a salasilan ra,
na ralang a nwa'uk urun.
30 Wol inak ma ufadawang tenang a,
na'uk wean i musti otu wean inyai,
na ufadawang watan afa ovi rfaturu ne,
wol ka'i ungrebat a.*
31 Fara traning Ubu i dida Duila'a Yesus Yaman verin Ia,
nata ti wol ni wahan.
Ia sa'i nka'a ne,
wol usiklabir na'a afa ovi ufalak ra.
32 Na'ut i una'a kota Damsyik,
na tamata i raja Aretas a nfili ia ma notu gubernur a,
nfareta suldadu ra ma rwanar kota yai,
boma rwan ma rtaha ya'a.*
33 Na'uk tamata boku rala ahir dawan isa ma rtolar ya'a nahu bilahin isa na'a kota ni tembok dawan a.
Ba ufla talik gubernur yai,
ma ni suldadu ra wol rtaha ya'a.