Ubu Ni metan ovi rna'a suran ralan
1 Ba terang a valing averi!
Ubu Ni rala lolin a,
bi nala karya verin ami ma amfamalik Ni tnorung ngorva'an verin tamata ra.
Ba wol amtalik ma amfabana karya ini.
2 Ami amfadoku roak ma wol amotu lahir afa fanfonak ovi rotu ma tma'it a.
Ami wol amsiklabir ovu wol amfamalik tia ma watan Ubu Ni vaivatul ra.
Na'uk amfamalik afa ovi kena ra munuk na'a Ni vaivatul ra,
boma lyawan verin tamata ra.
Ba wean inyai,
na amtorung ma tamata rivun bisma rka'a ne,
afa ovi amotu ra kena na'a Ubu wahan ralan a.
3 Wean i Ivar Lolin i amfamalik roak yai wol lyawan obin verin tamata boku,
na Ivar yai wol lyawan verin tamata ovi ti rna'a yafwan kakiwal.
Afa isa nkum-teri ralarira ra,
ba rafena ma rorang Yesus.
4 Nitdawan nlabir nala roak rira fikiran ra,
ba wol rsi'ik lahir lyawan i ntali Ivar Lolin.
Ivar yai nfamalik Kristus vanan i nfitik nyadat a.
Kristus wean lahir Ubu felan a.*
5 Ami wol ka'i amfamalik tenamami ra.
Na'uk amfalak ne,
Yesus Kristus yai dida Duila'a verin Ia,
ovu ami ameluk tamata sansinir verin mia,
tevek Yesus ralan a nfalak ma amotu wean inyai.
6 Ubu nfalak roak ne,
“Lyawan a veka nvotuk na'a ngarmeran ralan!”
* Ia notu vali ma lyawan a na'a raladida ra,
boma dida fikiran ra lyawan ma tfan-aran Ubu vanan i nfitik nyadat na'a Kristus felan a.
7 Ubu Ni tnorung ngorva'an i amfamalik a,
wean metan i fyawan urun,
ma nana'a tenamami ra.
Na'uk tenamami ra wean suran ma bisma rakfefar watan.
Wean inyai bi lyawan roak ne,
ngrebat ila'a yai wol ntali ami,
na'uk ntali Ubu.
8 Ami amtuan sian afaka watan,
na'uk afa avyai wol rotu teri nala ami ma wol amfabana karya ini.
Ami wol amka'a roak ne veka amotu aka,
na'uk amfaklo'i a'uk mami vava'at ra verin Ubu.
9 Tamata ra rwi-rwa ami,
na'uk Ubu wol nlaun talik ami.
Tamata ra rvaval ma leka-batar ami,
na'uk wol amamata.
10 Amka'a roak ne,
tamata ra rfedan Yesus,
ba bisma rotu vali ami wean inyai,
tevek amkarya verin Ia.
Na'uk amva'at watan wean ini,
ma tamata liak rsi'ik lahir Yesus Ni vava'at a nvotuk vali na'a tenamami ra.
11 Amtuan susa lalawatan na'a mami vava'at ra,
ti naran i mane amamata a,
tevek amfabana Yesus Ni karya.
Wean inyai,
boma tamata ra bisma rsi'ik ne,
Yesus Ni vava'at a nvotuk na'a tenamami ovi veka rmata ini.
12 Ami amtuan lalawatan afa ovi rotu ma mane amamata,
boma mia bisma bira vava'at ngorva'an ovu Yesus.
13 Na'uk mami inorang wear isa,
wean i rtulis roak na'a Surat Ralan ne,
“Ya'a ungrihi,
tevek orang Ubu.”
Ami amangrihi vali wean inyai,
tevek amorang Ubu.*
14 Amka'a ne,
Ubu nfava'at ewal roak Duila'a Yesus tali matmatan,
ba veka nfava'at vali ami.
Notu munuk wean inyai,
beti nala ami ovu vali mia,
ma itmunuk tdiri wahan ralan a.
15 Ami amtuan munuk roak sian avyai ma na'a bira lolin,
boma Ubu Ni rala lolin a nsoru munuk tamata ra ma veka rorang Ia,
ma itmunuk tfalak fara weninyai verin Ia ovu tfadawang Ia.
16 Ba ami wol amtalik ma amfabana karya ini,
velik ne tenamami ra rtafal ma rmafun.
Na'uk lokat amar,
na ralamami ila'a ntafal ma nangrebat.
17 Tevek sian ovi amtuan ra wol ka'i aleman,
na'uk veka rvua afa lolin verin ami ma ti wol ni wahan,
ovu nlia munuk afakataka.
Afa lolin avyai,
lolin lia sian ovi amtuan ra.
18 Ami wol amfadoku mami fikiran ra nana'a afa sian ovi rvotuk ra.
Na'uk amfadoku mami fikiran ra na'a watan vava'at kakiwal ovu Ubu,
tevek afa ovi sian ra rira amar a wol mnanat.
Afa ovi wol trea ra rna'a kakiwal ma ti wol ni wahan.