Velik ne tmata, na'uk Ubu veka nfava'at ewal ita ovu nala tenadida ngorva'an ra
1 Ami amka'a roak ne,
na'a lanit ivavan ini,
na tenadida ra wean befak* ma ita ka'i tleal befak yai ralan a.
Wean i befak i tleal yai nama'ar,
na Ubu veka nala rahan ngorva'an verin ita na'a lanit ratan,
inyai tenadida ngorva'an ra.
Tamata ra wol rot-nala afa yai,
na'uk Ubu ka'i notu lahir,
ovu tenadida ngorva'an kakiwal,
nata ti wol ni wahan.
2 Na'a dida befak i tleal fiang ini,
na ita tafngamu'ur,
tevek inadida urun ma tleal dida rahan ngorva'an a na'a lanit ratan.
Inyai tenadida ngorva'an ovi wol bisma rakvisal.
3 Ita inadida ma wean inyai,
boma wean i tmata,
na tenadida ra veka ngorva'an na'a lanit ratan.
Wean inyai,
boma ita deka weadida tamata ovi wol rira kadaravit ma rabluhu watan.
4 Na'a dida befak i tleal fiang ini,
na ita tafngamu'ur,
tevek dida varvara aleman.
Ita wol mane inadida ma tmata,
na'uk inadida urun ma Ubu notu ma tenadida ra ngorva'an ewal,
ovu dida vava'at kakiwal.
Inyai nfaturu ne,
ita inadida ma tkati tenadida ovi rtali lanit ivavan ini ovu tenadida ovi rva'at kakiwal na'a lanit ratan.
5 Na'uk Ubu ka'i nasusan roak ma veka tenadida ngorva'an.
Ia nala vali Ni Roh a verin ita ma nleal raladida ra,
al neluk faneak ne,
veka nala munuk afa ovi ntorung roak verin ita.
6 Wean inyai bi notu ma nfangrebat ami ma amtahang lalawatan ralamami ra.
Ami amka'a roak ne,
amva'at na'a lanit ivavan ini obin,
ba mami vava'at ra raroa tali Duila'a.
7 Na'a mami vava'at ra,
na amva'at tali mami inorang verin Kristus.
Ami wol amva'at tali afa ovi amsi'ik ra na'a ini.
8 Wean inyai,
na notu ma nfangrebat ami.
Nlia tali inyai,
na inamami ma amati talik tenamami ini,
boma bisma amamunuk Duila'a amleal wan isa.
9 Wean inyai bi,
inamami urun ma amotu ma Kristus ralan lolin.
Amotu wean inyai na'a mami vava'at i fiang ini,
ovu na'a mami vava'at ovi veka rma ini.*
10 Ita munuk veka ti tdiri Kristus wahan ralan a ma nfaleka inukun verin ita.
Ba lokat ita veka tatuan afa ovi inovan ovu afa lolin te afa sian ovi totu ra.
Ubu ntorung ma tamata ra bisma lolin ewal ovu Ia nahu Yesus
11 Ami amka'a roak ne,
amar i Duila'a mane nfaleka inukun verin tamata ra sarseri roak,
ba amalang urun Ia.
Wean inyai bi amkarya ovu ralamami urun,
ma amotu ma tamata ra rorang Duila'a Yesus.
Ubu nka'a munuk afa ovi rna'a ralamami ra,
ovu inak ma mkya'a vali afa ovi rna'a ralamami ra.
12 Ya'a wol ufalak wean inyai ma amfakaratat tenamami ra.
Na'uk inamami ma mkya'a vali afa lolin ovi amotu ra,
ma fyalak ne,
lolin ami.
Amfalak wean inyai,
boma byalat nala tamata ovi rfakaratat tenarira ra,
tevek rsi'ik a'uk tamata felarira ra,
na'uk wol rsi'ik afa ovi rtali tamata ralarira ra.
13 Ba wean i mami fikiran ra wean tamata ovi rfoar ra,
na inyai neluk varvara verin ami ovu Ubu.
Wean i mami fikiran ra lyawan,
na inyai nfaturu ne,
utubira roak.
14 Kristus Ni silobang a nfangora urun ami ma nfareta ami.
Amfan-aran roak ne,
Kristus nmata verin tamata ra munuk,
na inyai nfaturu ne,
tamata ra munuk rfaroa ira tali Ubu,
ma wean ralarira rmata munuk roak.
15 Kristus nmata roak verin tamata ra munuk,
boma tamata ovi ralarira rva'at tevek rorang Kristus,
wol mane rsi'ik watan tenarira ra.
Na'uk tamata avyai rva'at ma al rfaloling Kristus ralan a.
Ia nmata ovu nva'at ewal roak tali matmatan a verin ira.
16 Ba wean inyai bi ami wol amfili roak tamata ra tali mami fikiran ra.
Lan a,
amfikir Kristus ovu mami fikiran ovi rtali lanit ivavan watan,
na'uk fiang ini wol amfikir roak Ia wean inyai.
17 Ba tamata i norang roak Kristus,
na ia ni vava'at a ngorva'an roak.
Ni vava'at mnanat i norang nitdawan,
nlia roak.
Fiang ini ni roak vava'at ngorva'an a!
18 Ubu notu munuk afa yai na'a Kristus,
ba dida vava'at a lolin ewal ovu Ia.
Ia nala karya verin ami ma amfamalik verin tamata ra ma rira vava'at ra lolin ewal ovu Ia.
19 Ami amfamalik ne,
afa ovi Ubu notu nahu Kristus,
notu ma tamata ra rira vava'at ra lolin ewal ovu Ia,
ovu Ia wol nrekan salasilan ovi rotu ra.
Ia nala karya yai verin ami,
ma ti amfamalik ivar i nfalyawang malinan i ntali Ubu yai verin tamata ra.
20 Ba wean inyai,
bi ami ameluk Kristus Ni tamata sansinir ra,
ma nahu ami,
Ubu nala Ni snurak ra verin tamata ra.
Amangrihi verin mia na'a Kristus naran a ma amfalak urun ne,
mtyorung ma Ubu notu ma bira vava'at ra malinan ewal ovu Ia.
21 Yesus Kristus wol Ni salasilan akataka,
na'uk Ubu notu ma nvara dida salasilan ra munuk,
boma itmunuk dida vava'at ra bisma rmalola,
ovu lolin ewal ovu Ia.
Ia notu wean inyai,
tevek torang Ia.