Ubu Ni tnorung ngorva'an a
1 Terang a valing averi!
Mia deka fyikir ne,
amfadawang ewal tenamami ra,
te weamami tamata liak ovi rtaha surat i rotu ma al rfadawang ira,
te rera surat tali mia ma fyamalik ira verin tamata ra.
Ami wol weamami inyai.
2 Mia weabira surat i rtulis ma al rfadawang mami karya i amotu verin Ubu.
Ni Roh a ntulis surat yai na'a ralamami ra,
ovu bira vava'at ra rfaturu ne,
myorang Yesus.
Mia weabira surat i tamata ra munuk rbas ma rka'a mami karya ovi amotu ra.
3 Lyawan roak ne,
bira vava'at ra wean surat i ntali Kristus.
Ia ntulis surat yai tali karya ovi amotu ra.
Kristus wol nala tinta al ntulis surat yai,
na'uk nala Ubu Ni Roh i nva'at a,
ma al ntulis.
Ia wol ntulis na'a vatu ovi nglavar ra,
na'uk ntulis na'a tamata ralarira ra.
4 Amfamalik mami karya verin mia wean inyai,
tevek afa ovi Kristus nfalyawang roak verin ami na'a Ubu wahan ralan a.
5 Ami wol amfalak ne,
amala mami ngrebat ma amot-nala munuk karya ini.
Na'uk Ubu sa'i nala ngrebat verin ami ma amot-nala Ni karya ra.
6 Ia nfangrebat vali ami,
ba bisma ameluk tamata sansinir ma amfamalik Ni tnorung ngorva'an.
Ni tnorung ngorva'an yai wol wean tnorung mnanat a,
tevek tnorung ngorva'an yai ntali Ubu Ni Roh,
ovu wol rtulis na'a inukun ovi Ubu nala verin Musa.
Inukun ovi rtulis roak yai rvua matmatan,
tevek tamata ra wol bisma rot-orang munuk.
Na'uk na'a Ubu Ni tnorung ngorva'an a,
na Ni Roh a nala vava'at kakiwal verin tamata ra.*
Ubu Ni tnorung ngorva'an i nala verin ita, lolin rahi tnorung mnanat i nala verin Musa
7-8 Lalan ana,
Ubu ntulis Ni inukun ra na'a vatu nglavar irua.
Inukun avyai rvua matmatan verin tamata ovi wol rot-orang.
Velik ne wean inyai,
na'uk na'ut i Ubu nala Ni inukun avyai verin Musa,
na vanan i nfitik nyadat a vanan na'a Musa wahan ralan.
Tamata Israel ra wol bisma rsi'ik ma mnanat Musa wahan a,
velik ne Ubu vanan yai mane nlia roak na'a Musa wahan a.
Lyawan urun ne,
Ubu Ni tnorung ngorva'an i Ni Roh nala a,
nma roak ovu vanan i nfitik nyadat a ma vanan a nlia tali inukun mnanat avyai.
9 Tevek wean i Musa ni inukun ovi ma tamata ra rmata,
vanan a lyawan urun,
na Ubu Ni tnorung ngorva'an i notu ma dida vava'at ra rmalola,
vanan a lyawan lia tali inukun mnanat yai vanan a.
10 Musa ni inukun yai vanan a lyawan urun.
Velik aba,
fiang ini Ubu Ni tnorung ngorva'an yai vanan a lyawan urun i lahir,
ba inukun i notu ma tamata ra rmata yai wol fyawan lahir.
11 Tnorung mnanat i notu ma tamata ra rmata yai nma ovu vanan i lyawan urun a.
Na'uk Ubu Ni tnorung ngorva'an vanan a lyawan lia tali tnorung mnanat yai,
tevek Ni tnorung ngorva'an a nana'a,
nata ti wol ni wahan.
12 Ba amfaklo'i a'uk mami vava'at ra na'a Ubu Ni tnorung ngorva'an yai,
tevek amka'a basil ne,
Ni tnorung ngorva'an yai nana'a,
nata ti wol ni wahan.
Ba amabrahi urun ma amfamalik Ubu Ni Ivar Lolin a.
13 Ami wol weamami Musa,
ma nkum-teri wahan a ovu maloli,
boma tamata Israel ra deka rsi'ik Duila'a vanan i mane nlia roak tali wahan a.*
14 Tamata Israel ra wean i rkum-teri rira fikiran ra ovu maloli ma rasmotak obin,
nata ma naran amar ini,
tevek wean i rbas Ubu Ni tnorung mnanat a,
na wol rfan-aran.
Kristus a'uk sa'i bisma naling vatuk afa i wean maloli yai,
wean i tamata ra rira vava'at isa ovu Ia.*
15 Ti naran amar ini,
na wean i rbas Musa ni inukun ra,
na afa yai nteri watan rira fikiran ra obin.
16 Na'uk wean i tamata isa norang roak Duila'a,
na Duila'a veka naling vatuk afa i wean maloli yai tali ia.
17 Duila'a wean lahir Ubu Ni Roh a.
Ba wean i Ubu Ni Roh nleal raladida ra,
na salasilan ra wol rfareta roak ita,
ovu vali Musa ni inukun avyai wol rkeak roak ita.*
18 Fiang ini tamata ovi rorang roak Kristus wol rkum-teri roak waharira ra ovu maloli.
Ia notu ma raladida ra lyawan roak,
tevek Duila'a vanan i nfitik nyadat a.
Wean inyai bi lokat amar,
na Ubu Ni Roh a notu ma dida vava'at ra ntafal ma wean Ia na'a vanan i nfitik nyadat a.