1 Ya'a Paulus,
uvolan roak na'a ralang a ne,
veka wol uti roak ma utuan mia,
betane otu ma ralabira ra lalau.
2 Tevek wean i otu ma ralabira ra lalau,
na tamata iki vali bisma nfaloling ralang a?
Mia a'uk tamata ovi otu roak ma ralabira ra lalau.*
3 Wean inyai bi utulis lan surat yai verin mia,
tevek ufena ma ti ulola mia,
betane myotu ma ralang a lalau.
Velik aba,
mia musti myotu ma ralang a lolin urun,
tevek ya'a orang ne,
wean i ralang a lolin urun,
na mia munuk ralabira ra veka lolin urun vali.*
4 Na'ut i utulis surat yai verin mia,
na ralang a nwa'uk ovu lalau urun i lahir ma lung ra rditi.
Ya'a wol mane otu ma ralabira ra lalau,
na'uk inak ma mkya'a ne,
ulobang urun bir tinemun.
Paulus nfalak ma tamata ovi rorang Yesus na'a kota Korintus musti rabun terarir-valirira i notu salasilan
5 Terang a valing averi,
tali bir tinemun,
na tamata isa notu roak ma ralabira ra lalau.
Ya'a ralang a wol lalau wean mia,
na'uk mia munuk ralabira ra lalau,
te tamata boku watan tali bir tinemun ralarira ra lalau.
Ya'a ufena otu ma ralabira ovi lalau yai ntafal ila'a.
6 Tamata i notu afa sala wean inyai,
na naran roak ma tamata etal dawan tali bir tinemun mtyabu ia.
7 Ba fiang ini mia musti myabun ia na'a ni afa sala ovi notu ra,
ovu fyaloling ewal ralan a.
Wean i wol myotu wean inyai,
na ralan a veka lalau urun i lahir,
ti naran i veka wol norang roak Kristus.
8 Wean inyai bi usurak mia,
boma ralabira urun ma mlyobang ia.
9 Utulis surat yai verin mia ma al usi'ik ne,
ralabira urun ma myot-orang afa ovi ufalak verin mia te wahal.
10 Wean i myabun roak tamata isa na'a ni afa sala ovi notu verin mia,
na ya'a veka abun vali tamata yai ni afa sala ovi notu ra.
Wean i tamata ni sala,
na abun roak ia.
Otu afa avyai munuk na'a Kristus wahan ralan a ma na'a bira lolin.
11 Ufalak ma musti tabun ia,
boma nitdawan a deka nweang nala ita,
tevek tka'a roak afa ovi nitdawan notu ra.
Paulus ralan lalau na'a kota Troas ovu propinsi Makedonia
12 Na'ut i uti aran Troas ma ufamalik Ubu Ni Ivar Lolin i nfamalik Kristus,
na Duila'a nfaturu roak linga'an verin ya'a ma ukarya na'a inyai.
13 Na'uk ralang a wol malinan,
tevek wol utuan terang i Titus,
ba utuli tamata ovi rna'a inyai ma uti Makedonia.
Ita utudida tevek Kristus
14 Velik ne wean inyai,
na ami amfalak fara weninyai verin Ubu,
tevek Ia nban-ulu lalawatan verin ami,
ma notu ma utumami.
Ia notu wean inyai,
tevek mami vava'at isa roak ovu Kristus.
Ubu nala ami ma amfamalik Ni Ivar Lolin ma tamata ra rka'a Kristus,
ti nsoru wan inba watan,
wean afa voan lolin i voan a ti nsoru munuk tamata ra na'a wan inba watan.
15-16 Amfamalik roak Kristus,
ba ami weamami afa voan lolin i notu ma Ubu ralan lolin,
wean lahir Kristus notu ma Ubu ralan lolin.
Ba verin tamata ovi Duila'a nsikat ira tali rira salasilan ra ma rira vava'at kakiwal,
na ami weamami afa voan lolin yai,
tevek amfamalik Ni Ivar Lolin.
Ivar Lolin yai nala vava'at lolin i wol ni wahan.
Na'uk verin tamata ovi wol rorang Kristus,
na voamami ra wean afa voan sian i tali tamata matmatan ra,
ovu Ia nukun ira.
Na'uk wol tamata isa vali bisma notu munuk karya yai.
17 Ami wol weamami tamata liak ra,
ma rfamalik Ubu Ni vaivatul ra ma al rdava uturira.
Na'uk ami ralamami urun ma amfamalik afa ovi Kristus nfalak ra ovu Ni ngrebat a,
na'a Ubu wahan ralan a.
Ubu nsinir ami ma ti amfamalik Ni Ivar Lolin a wean inyai.