Paulus ni surat i nban-muri verin tamata ovi rorang Yesus rira sidovung na'a kota Korintus
Paulus nala salam verin tamata ovi rorang Yesus na'a kota Korintus
1-2 Terang a valing averi!
Ya'a ini Paulus utulis surat ini verin bira sidovung tamata ovi rorang Yesus na'a kota Korintus,
ovu tamata ovi rorang munuk Yesus na'a propinsi Akhaya.
Ubu nfili ya'a ma eluk rasul verin Kristus Yesus,
tevek ralan nfalak wean inyai.
Terad i Timotius nana'a vali ini ovu ya'a.
Amaflurut verin Yamadida Ubila'a ovu Duila'a Yesus Kristus ma fara nala Ni rala lolin a verin mia,
ovu notu ma bira vava'at ra malinan watan.
Paulus nfalak fara weninyai verin Ubu, tevek nlobang roak ita na'a dida susa ra
3 Mya ma tfadawang Ubu i dida Duila'a Yesus Kristus Yaman verin Ia.
Yamadida Ubila'a Ni silobang a dawan urun verin ita,
ovu Ia ba'i nfaloling tamata ralarira ra na'a afakataka munuk.
4 Ia a'uk sa'i nfaloling ralamami ra na'a mami susa ra munuk.
Ubu notu wean inyai,
bi ami bisma amfaloling vali tamata ralarira ra na'a rira susa afaka watan,
wean lahir i Ubu nfaloling roak ralamami ra.
5 Ami amtuan susa rivun vali roak,
wean susa ovi Yesus Kristus ntuan roak yai.
Wean urun inyai,
bi Ubu nfaloling ma dawan ralamami ra,
nahu Kristus,
tevek dida vava'at isa roak ovu Kristus.
6 Lokat amar ovi amtuan susa,
na Ubu nfaloling ralabira ra ovu nsikat mia tali bira salasilan ra,
ma bira vava'at kakiwal.
Na'ut i amtuan susa,
Ubu nfaloling ralamami ra.
Ia notu wean inyai boma utubira,
tevek amka'a ma amlobang mia.
Ba wean i mtyuan susa ovi wean amtuan roak a,
na mkya'a ma mtyahang nal ralabira wean ami.
7 Ami amorang urun ne,
na'a bira susa ra,
na bira dardirin na'a bira inorang a nangrebat.
Amka'a vali ne,
na'ut i mtyuan susa wean ami,
na Ubu veka nfaloling vali ralabira ra,
wean watan i nfaloling roak ralamami ra.
8 Terang a valing averi,
ami inamami ma mkya'a susa ovi amtuan roak na'a propinsi Asia.
Susa avyai rira sian a dawan ovu aleman urun i lahir,
ma notu ma wol amfikir roak ne,
veka amva'at.
9 Ami amfarnuang ne,
wean i rfaleka roak inukun matmatan verin ami.
Na'uk afa yai nvotuk,
boma deka amfadoku mami inorang a na'a tenamami ra watan,
na'uk amfadoku a'uk verin Ubu i nfava'at tamata matmatan ra.
10 Ubu nfatalik roak ami tali matmatan i sian urun a.
Ba amfaklo'i a'uk mami vava'at ra verin Ia,
tevek amorang ne,
Ia veka nfatalik ewal ami tali matmatan a,
11 tevek mtyorung ma mlyobang ami na'a bira falurut ra.
Wean inyai bi,
tamata rivun veka rfalak fara weninyai verin Ubu,
tevek naflahar ma dawan ami tali bira falurut avyai.
Paulus nfalyawang na'a ni banbanan ma wol nti kota Korintus
12 Ami ralamami dawan na'a afa ini:
ralamami ila'a ra rfalyawang roak ne,
afa ovi lokat amar amotu roak verin mia rmerat urun,
wean lahir afa ovi Ubu ntorung roak a.
Afa ovi amotu ra wol rtali tamata rira fikiran ra,
na'uk amotu ovu ralamami urun,
tevek rtali lahir Ubu Ni rala lolin a.
Amotu wean inyai verin mia ovu vali verin tamata liak ra munuk.
13-14 Na'a mami surat a,
na amtulis watan afa ovi bisma byas ovu fyan-aran.
Fiang ini mia wol fyan-aran munuk afa ovi amotu ra,
na'uk era ma amar isa,
na veka fyan-aran.
Wean inyai,
boma ti naran amar i Duila'a Yesus veka nma ewal a,
na ami veka amfadawang mia,
ovu mia veka fyadawang vali ami.
15-16 Ya'a uka'a mnga'un afa yai,
ba unovak lan roak mane ti ulola mia.
Ufikir ne ulola mia veki,
beti uti Makedonia.
Nata ewal ya'a,
na ulola ewal mia.
Otu wean inyai ma ulobang nala farua mia,
ovu mia bisma mlyobang ya'a na'a ning banbanan a ma uti Yudea.*
17 Kena ma ya'a wol otu afa ovi ufadoku roak ma otu ra.
Otu roak wean inyai,
ba mia fyikir ne,
ning dardirin a wol nana'a wan isa?
Te mia minovak ne,
afa avyai rtali watan ralang a,
ma amar boku ufalak ne,
otu,
na'uk amar boku ufalak ewal ne,
wol otu?
18 Ubu not-orang lalawatan afa ovi nfalak ra.
Ba afa ovi ufalak verin mia yai,
wean lahir inyai,
ovu wol mane ukiluk-ukiban ma ufalak ne,
mane otu te wol otu.
19 Ya'a,
Timotius ovu Silas* amfamalik roak Ubu Yanan a,
Yesus Kristus,
verin mia.
Yesus wol mane nfalak watan,
na'uk not-orang lalawatan afa ovi nfalak ra.
20 Ita tka'a ne,
afa avyai kena,
tevek Kristus nfakena munuk lahir afa ovi Ubu ntorung ma notu ra.
Wean inyai bi nahu Kristus,
na ita bisma tfalak ne,
“Kena urun,”
ma tfadawang Ubu.*
21-22 Ia notu roak ma torang Yesus,
ovu itmunuk teluk roak Ubu yanan ra.
Ia nfili roak ita ma notu faneak al nfaturu ne,
Ni roak ita.
Nala Ni Roh a ma nleal raladida ra,
ma neluk faneak na'a afa ovi nfadoku roak,
ma veka nala munuk lahir afa ovi ntorung roak yai verin ita.
23 Terang a valing averi,
ya'a wol usiklabir.
Ubu nka'a ne,
afa ovi ufalak ra kena.
Ia nka'a ralang a ne,
wol uti ewal Korintus,
tevek ufena ma utabu mia ma ti naran i ralabira ra lalau urun a.
24 Ami wol mami ngrebat ma amfareta mia na'a afa ovi myorang a,
tevek bira dardirin a nangrebat na'a bira inorang a.
Na'uk velik aba,
inamami ma itmunuk tkarya na'a isa,
boma ralabira lolin urun.