Paulus nlotar tenan verin tamata ovi rfalak sian ia, ovu nfamalik rasul rira varvara ra, ovu afa ovi musti rotu ra
1 Ya'a otu rasul,
ovu ya'a bisma otu afaka watan na'a ning vava'at a lokat amar,
ovu vali urea roak dida Duila'a Yesus.
Duila'a Ni karya i otu a,
inyai nfaturu lahir mia.
2 Velik ne tamata boku wol rtorung ne,
rasul ya'a,
na'uk orang urun ne,
verin mia,
na mtyorung roak ne rasul ya'a.
Bira inorang a na'a Duila'a neluk faneak roak ne,
rasul ya'a.
3 Ba wean i tamata boku rfasala ya'a,
na veka ulotar tenang a ma ufalak wean ini:
4 Inovan ma ami tamata ovi amfabana Duila'a Ni karya a,
amala fana'an-fanenu tali mami karya yai.
5 Inovan ma awamami ovi rorang roak Kristus,
rorang vali ami na'a mami banbanan ra ma amfabana mami karya a.
Rasul liak ra,
ovu Duila'a Yesus warin ra,
ovu vali Petrus* rotu roak wean inyai.
6 Betane ralabira ra rfalak ne,
inovan ma amrua Barnabas ka'i amdava watan mami fana'an-fanenu,
velik ne amfabana Duila'a Ni karya.
7 Wol suldadu isa vali,
wean i nti notu rihi,
na ia ka'i nvara watan rihi yai fyawan a.
Wol tamata isa vali,
wean i nfau anggur na'a ni va'i a,
na wol na'an vuan ra.
Te iki nfawatak domba ra,
na wol nenu domba avyai rira susu vahan ra?*
8 Afa ovi ufalak ini,
wol mane rtali watan tamata rira fikiran ra,
na'uk rfadoku vali roak wean inyai na'a Musa ni inukun ra.
9 Rtulis roak na'a Musa ni inukun ra ne,
“Wean i sapi isa nta gandum ma notu ma vatul ra rtuba aling tali kan ra,
na deka mkum-teri sapi yai sumarn a ma wol na'an gandum ra.”
Orat mia ne,
Ubu ka'i nfikir a'uk sapi yai watan?*
10 Wahal!
Afa ovi rfalak yai betane rala al rta'ing ita?
Kena urun,
tevek rtulis roak afa yai verin ita.
Tamata ovi rotu va'i ovu tamata ovi rfamerat gandum ra,
ira ranovak roak ne,
veka rala rira farea enan a tali rira karya ra.
Wean vali inyai verin tamata ovi rfabana Duila'a Ni karya.
Ira veka rala vali rira farea enan tali rira karya yai.
11 Ami amavuri amava roak Ubu Ni vaivatul ra na'a ralabira ra.
Ba wean i myala bira afa boku verin ami,
na inyai nfaturu ne,
amkiwal da'in mia?
12 Wean i tamata liak bis watan ma rera afa tali mia,
na ami wol bisma amera ma nlia tali ira?
Na'uk ami wol amotu wean inyai.
Ami ka'i amvara watan afa avyai,
boma deka reluk angangal verin ami ma amfamalik Ubu Ni Ivar Lolin i nfamalik Kristus.
13 Terang a valing averi!
Mia mkya'a roak ne,
tamata ovi rkarya na'a Yahudi rira Rahan Dawan Falurut,
ira vali rafna'an-rafnenu tali rira karya yai.
Tamata ovi rasusan wan i ba'i rasnuri dida korban ra verin Ubu na'a,
ira rala vali rira wahat kedan a na'a inyai.*
14 Wean vali inyai,
Duila'a nfadoku roak ne,
tamata ovi rfamalik Ni Ivar Lolin a,
ira musti rva'at vali tali rira karya yai.
15 Na'uk ya'a wol mane otu lahir fasa vali afa avyai.
Ya'a wol mane utulis surat ini,
boma myotu wean inyai verin ya'a.
Wean i tamata ra rotu teri ning ininan i notu ma ralang a dawan urun a,
na ni lolin a umata.*
16 Ba wean i ufamalik Ubu Ni Ivar Lolin a,
na ya'a wol bisma ralang dawan na'a afa ovi otu ra,
tevek Ubu nsinir ya'a ma musti otu wean inyai.
Sian urun i lahir verin ya'a,
wean i wol ufamalik Ni Ivar Lolin a.
17 Wean i ralang a ka'i nfalak ma ufamalik Ubu Ni Ivar Lolin yai,
na inovan ma ala kadi tali karya yai.
Na'uk Ubu ralan a ka'i nfalak ma ufamalik Ni Ivar Lolin a,
ba ufabana karya ini,
tevek ning varvara verin Ia.
18 Ba wean inyai,
na ya'a veka utung aka?
Inovan ma era kadi tali tamata ovi rarenar Ubu Ni Ivar Lolin i ufamalik,
na'uk wol otu wean inyai.
Ya'a utung a nana'a i ufamalik Ni Ivar Lolin a watan ovu tamata ra wol rala kubang verin ya'a na'a afa i otu a.
19 Ya'a ini wol eluk tamata sansinir verin tamata iki watan.
Velik ne wean inyai,
na'uk ya'a eluk roak tamata sansinir verin tamata ra munuk.
Otu wean inyai,
boma utung tamata rivun ma rorang Kristus.
20 Na'a Yahudi waharira ralan ra,
na ning vava'at a wean lahir tamata Yahudi ra.
Otu wean inyai,
boma bis utung tamata Yahudi rivun ma rorang Kristus.
Wean i una'a tamata ovi rorang a'uk Musa ni inukun ra,
na ot-orang vali wean ira,
velik ne ya'a wol usoak roak nulu Musa Ni inukun ra.
Ya'a otu wean inyai,
boma bis utung ira ma rorang Kristus.
21 Wean i una'a tamata ovi wol Yahudi waharira ralan ra,
na otu felang a wean ira,
ma uva'at wean tamata ovi wol rot-orang Musa ni inukun ra,
boma utung ira ma rorang Kristus.
Na'uk afa avyai wol rotu ma wol orang afa ovi Ubu nfalak ra.
Ya'a ot-orang lalawatan afa ovi Kristus nfalak ma otu na'a ralang a nahu Ni Roh.
22 Wean i una'a tamata ovi rira inorang a wol nangrebat obin waharira ralan ra,
na otu ma felang a wean ira,
boma utung ira ma rorang Kristus.
Wean i una'a tamata iki watan waharira ralan ra,
na ukati afa ovi otu ra,
boma utung tamata boku ma rorang Kristus.
23 Ya'a otu munuk wean inyai,
ba tamata ra rtafal ma rorang Ubu Ni Ivar Lolin i nfamalik Yesus,
boma Ia nala ning wahat a tali Ni kalolin a vali.*
24 Mia mkya'a roak ne,
wean i tafla silalia,
na tamata ovi rovu ma rafla,
musti rafla munuk lahir,
na'uk tamata isa watan veka ni rangrangwaha.
Ba wean inyai,
na mkyiwal ma mifla urun ia,
boma myala rangrangwaha.*
25 Tamata iki watan wean i novu vali ma nafla silalia,
na ia musti ntahang nal ralan na'a afaka watan,
boma utun.
Ia musti notu wean inyai,
boma nala rangrangwaha.
Rangrangwaha yai veka nakvisal watan.
Na'uk ita musti tatahang nal raladida na'a afaka watan,
boma tala rangrangwaha i nana'a lalawatan,
ti naran i wol ni wahan.
26 Wean inyai bi ya'a ufla,
boma bisma aran ni wahan a.
Wean i ovu vali ma amsikevu ami,
na ya'a wol mane uskevu a'ar tia ma watan.
27 Na'uk ukiwal urun tenang a ovu utahang nal ralang na'a afaka watan,
boma ti ma i ufamalik roak Ubu Ni Ivar Lolin a verin tamata liak ra,
na Ubu wol nfalak ne,
ning vava'at a wol inovan ovu ning karya i otu a.