Tamata Israel rira afa ovi rotu ra rfangnanang ita ma deka tot-orang ira
1 Terang a valing averi!
Ya'a ini Paulus inak ma mingnanang afa ovi rvotuk roak verin ubud-nusid ra,
na'ut i rovu vali Musa.
Na'ut inyai,
na Ubu nala mutan ma nteri ira,
ovu vali rban-etal tahat i rfanara ia ne Tahat Valvulin,
ovu lolin watan.*
2 Tamata Yahudi avyai munuk lahir wean i rbaptis roak ira na'a mutan ralan a,
ovu vali na'a tahat yai ralan a.
Afa yai nfaturu ne,
rorang roak Musa i nban-ulu verin ira munuk.*
3 Ira munuk ra'an afamtahan ovi Ubu Ni Roh nala verin ira ovu Ni ngrebat a.
Afamtahan avyai,
wear isa munuk.
4 Ira munuk renu vali wear i Ubu Ni Roh nala verin ira.
Wear yai nava tali vatminan i nfatuang ira na'a rira banbanan a.
Vatminan yai nfaturu lahir Kristus i nfatuang ira,
ovu nfangora rira vava'at ra ovu afa ovi rala al rva'at a.
5 Velik ne wean urun inyai,
na'uk etal dawan tali ira,
rira afa ovi rotu ra notu ma Ubu nangrova urun.
Wean inyai bi,
etal dawan a rmata ma rtuba tia ma watan na'a wan lean vu dawan.
6 Terang a valing averi!
Afa avyai munuk rvotuk roak verin tamata Yahudi ra ma al nfangnanang ita ovu nair ita,
boma deka tot-orang dida ininan sian i wean lan a ira rotu.
7 Tamata boku tali ira rsoak nulu walut ra,
na'uk ita deka tot-orang ira wean inyai.
Wean i rtulis roak na'a Surat Ralan ne,
“Bangsa yai ni tamata ra rdoku ma rafna'an ovu rafnenu,
beti rdiri ma rso'i-rsomar al rsoak nulu rira walut ra.”*
8 Tamata boku tali ira rsifa tia ma watan ovu tamata ovi wol awarira verin ira,
na'uk ita wol bisma tot-orang ira.
Rira afa i rotu yai,
notu ma tamata rivun vutrua rahin itelu rmata fasa lahir na'a amar isa.
9 Tamata boku vali tali ira rlabir teman Duila'a,
ba nifa ovi rira bisa dawan urun a rkokat fedan munuk lahir ira.
Ba ita wol bisma tot-orang ira.
10 Tamata boku vali tali ira rafngamu'ur,
ba Ubu nsinir Ni sansinir tali lanit ratan i ntaha matmatan a,
ma nfedan ira.
Ba ita wol bisma tfangamu'ur wean ira.
11 Afa avyai rkena munuk roak ira ma na'a faneak verin ita.
Rtulis munuk roak afa avyai ma al nfangnanang ita,
tevek fiang ini tva'at na'a amar ovi lanit ivavan a mane namwear roak.*
12 Ba tamata inorang iki watan nanovak ne,
ni inorang a nangrebat roak,
na musti nsi'ik wan ma lolin,
boma deka nleka na'a salasilan ra.
13 Mingnanang ne,
angangal ovi mtyuan ra mane rfaleka watan mia,
wean watan angangal ovi tamata ra ba'i rtuan.
Na'uk angangal avyai veka wol rlia bira ngrebat ra,
tevek Ubu notu lalawatan afa ovi nfalak na'a Ni tnorung ra ma nlobang mia.
Na'ut i angangal a nma ma nkena mia,
na Ia veka nala linga'an verin mia,
boma bisma byar-nala angangal avyai.
Fyaroa tenabira tali snoba i tamata ra rotu ma raraning walut ra
14 Ba terang a valing ovi ulobang urun mia,
deka msyoak nulu walut ra.
15 Ya'a ungrihi verin mia,
wean watan i ungrihi verin tamata ovi rka'a ma rfikir ma lolin.
Era ma ka'i minovak na'a afa ovi ufalak ini.
16 Na'ut i tala kobi i nsa'a anggur a ma tenu al tangnanang Kristus laran i nvoak na'a aa walwalur a,
na ita tfalak fara weninyai verin Ubu.
Inyai nfaturu roak ne,
isa roak ita ovu Kristus i nmata al nakvanak ita.
Na'ut i tsiduk roti ma itmunuk ta'an,
na inyai nfaturu roak ne,
isa roak ita ovu Kristus tenan a.
17 Ita munuk tsiduk roti isa watan ma ta'an.
Afa yai nfaturu ne,
velik ne rivun ita,
na'uk isa roak ita na'a sidovung isa,
tevek ta'an roti isa watan.
18 Eka minovak na'a bangsa Israel ra.
Ira ra'an afwatan ihin ovi tamata ra rala ma reluk rira korban verin Ubu.
Afa avyai tamata ra rfadoku roak na'a wan i ba'i rasnuri rira korban ra verin Ubu.
Ira rotu wean inyai,
boma isa roak ira ovu wan yai.*
19 Mia veka minovak afaka na'a afa i ufalak ini?
Walut ra wol ihir akataka.
Afwatan ihin ovi rala ma reluk rira korban verin walut ra,
wol ihir akataka vali.
20 Korban ovi rfadoku na'a wan i ba'i rasnuri rira korban verin walut ra,
ira wol rala verin Ubu,
na'uk rala verin nitu ra.
Ba ya'a wol utorung ma isa watan mia ovu nitu ra.
21 Mia wol bisma myenu anggur tali Duila'a Ni kobi a,
beti ti myenu vali tali nitu rira kobi a.
Mia wol bis vali ma mifna'an na'a Duila'a Ni meja a,
beti ti mifna'an na'a nitu rira meja a.*
22 Ita deka totu ma Duila'a nangrova ita!
Duila'a Ni ngrebat a nlia munuk afakataka.
Ni lolin a, deka ta'an afamtahan ovi notu ma terad ra rleka na'a salasilan, velik ne Ubu wol nfalak teri ma ta'an afamtahan avyai
23 Tamata ra rfalak ne,
“Ita bisma totu afaka watan,
wean i raladida ra rfalak.”
Inyai kena urun!
Na'uk afa ovi totu ra wol mane kena munuk lahir.
“Ita bis vali ma totu afaka watan wean i ralad ra rfalak.”
Na'uk afa ovi totu ra munuk wol mane kena munuk lahir ma al nfangrebat tamata ovi rorang Yesus rira inorang a.
24 Deka sasan mia ka'i mdyava utubira alaling,
na'uk lokat tamata musti nsi'ik vali afa ovi notu ma tamata liak ra uturira.
25 Mia bisma mian afaka watan na'a wan i ba'i rfedi afwatan ihin na'a.
Deka myorat na'a ralabira ila'a ra,
ma fyalak ne,
“Betane rala roak afa avyai ma raraning walut ra te ubu siklabir ra?”
26 Mingnanang afa ovi rtulis roak na'a Surat Ralan ne,
“Duila'a Nia lanit ivavan ini ovu afa ovi rna'a ralan a munuk.”*
27 Wean i tamata isa wol norang Kristus,
na nasweang mia ma mifna'an,
ma mtyorung roak ma mifna'an ovu ia,
na'uk deka myorat na'a ralabira ila'a ra ma fyalak ne,
“Betane rala roak afa avyai ma raraning walut ra te ubu siklabir ra?”
28 Na'uk wean i tamata isa nfalak verin mia ne,
“Afwatan ihin ini rala roak ma na'a rira persembahan ra verin walut ra,”
na deka mian afwatan ihin yai.
Myotu wean inyai,
boma fyikir tamata yai ovu afa ovi nafngamu'ur roak na'a ralan ila'a.
29 Ya'a wol mane ufalak na'a afa i notu ma mifngamu'ur na'a ralabira ila'a ra,
na'uk na'a afa i tamata yai nafngamu'ur na'a ralan ila'a a.
Snain tamata boku rorat ne,
“Afakinimi ya'a bisma otu afaka watan,
na'uk tamata liak ralarira ila'a ra rotu teri afa ovi otu ra?
30 Wean i ya'a ufalak lan fara weninyai verin Duila'a na'a afamtahan yai,
beti uan,
na afakinimi tamata ra rfalak sian ya'a na'a afwatan ihin yai?
Uflurut roak verin Duila'a ma ufalak fara weninyai na'a afa yai.”
31 Terang a valing averi!
Ufalak verin mia ne,
wean i mian te myenu te myotu afaka watan,
na myotu munuk afa avyai ma al fyadawang Ubu.
32 Na'a bira vava'at ra,
na deka myotu ma tamata liak rotu salasilan ra,
velik ne tamata Yahudi ira,
te wol Yahudi ira,
te Ubu Ni sidovung tamata inorang ra.
33 Era verin mia ma myorang ning vava'at a ma na'a afaka watan,
na ufaloling tamata ra munuk ralarira ra.
Ya'a otu wean inyai,
na'uk wol udava utung alaling.
Na'uk ya'a inak urun ma Ubu nsikat tamata ra tali rira salasilan ra,
ma rira vava'at kakiwal.