Afwatan ihin ovi tamata rala ma reluk rira korban verin walut ra
1 Terang a valing averi!
Mane ufalyawang verin mia na'a afwatan ihin ovi rala roak ma neluk rira korban ra verin walut ra.
Ita tka'a roak ne,
tamata boku tali mia rfalak ne,
Ubu nala roak kaka'a verin ita na'a afa ovi ta'an avyai.
Bira fikiran yai bis notu ma fyakaratat tenabira ra ma fyalak ne,
mkya'a munuk afa avyai.
Ita deka tfakaratat tenadida ra na'a kaka'a yai,
na'uk tfaturu dida silobang a verin terad a valid ra.
Inyai lolin urun i lahir,
tevek tatafal ma tfangrebat rira inorang a.*
2 Wean i tamata isa nanovak na'a ralan a ne,
ni kaka'a dawan,
na'uk velik aba,
tamata yai ni kaka'a wol ti naran afa ovi musti nka'a ra.
3 Na'uk wean i tamata isa nlobang urun Ubu,
na Ubu nka'a tamata yai.
4 Ya'a mane ufalyawang verin mia na'a afwatan ihin i tamata ra rala roak verin walut ra ma na'a rira korban ra ne,
bisma ta'an te wahal?
Ita tamata inorang ra tka'a roak ne,
walut yai ubu siklabir watan,
tevek Ubu ikisa watan,
ovu vali Ia Ni ngrebat a.
5 Velik aba,
tamata ra raraning ubu siklabir rivun,
ovu kena vali ma tamata boku rfalak ne,
ubu avyai rva'at ovu rfareta na'a lanit ratan ovu lanit ivavan,
ma duarira verin ira.
6 Na'uk ita tka'a mnga'un ne,
Ubu ikisa watan.
Ia a'uk neluk Yamadida,
ovu not-nala munuk afakataka,
ovu ita tva'at ma traning Ia.
Duila'a isa watan vali,
inyai Yesus Kristus.
Tali Ia bi afakataka rna'a munuk,
ovu nahu Ia bi tva'at ma naran amar ini.
7 Velik ne wean inyai,
na'uk tamata ovi rorang Yesus boku wol rka'a ne,
walut avyai ubu siklabir watan,
ovu vali wol rira ngrebat akataka.
Lan ana,
tamata avyai ba'i rsoak nulu walut ra,
ba afa yai ira ka'i rotu watan.
Ba ma naran amar ini,
na ira rnarin ne afwatan ihin i ra'an yai,
neluk roak rira korban ra verin walut ra.
Ira ranovak ne,
wean i ra'an afwatan ihin yai,
na rira salasilan,
tevek rira inorang wol rangrebat obin.
8 Velik aba,
afamtahan ovi ta'an ra wol reluk angangal verin ita ma tfaseri Ubu,
tevek wean i ta'an te wol ta'an afamtahan avyai,
na wol nfaruki ita,
te wol tala utudida.
9 Na'uk mingnanang,
tevek tamata boku rira inorang a wol nangrebat obin,
ba betane rira salasilan vali,
tevek rot-orang afa ovi myotu ra.
Velik aba,
Ubu wol ntab-teri mia na'a afa ovi myotu yai,
na'uk tamata avyai ranovak obin ne,
myotu wean inyai,
na salasilan roak.
10 Wean i tamata ovi rira inorang a wol nangrebat obin rsi'ik mia,
tamata ovi bira inorang a nangrebat roak a,
mifna'an na'a rahan i ba'i rfadawang walut ra,
na ira veka rabrahi vali ma ra'an afa ovi rala roak ma neluk rira korban verin walut ra.
11 Ba bira kaka'a i wean inyai a,
veka not-visal tamata ovi rorang Yesus ma wol rka'a rfili ne,
inorang inba lolin,
te inba sian,
ba wol rorang roak Yesus.
Velik aba,
Yesus nmata al nakvanak ira vali.
12 Wean i myotu roak salasilan wean inyai verin terabir-valibira ovi rorang Yesus,
na'uk rira inorang a wol nangrebat obin,
na inyai wean i myot-visal roak rira inorang a.
Myotu wean inyai,
na bira salasilan roak verin Kristus.
13 Ba wean i afamtahan ovi uan ra notu roak ma terad a valid ra rotu salasilan,
na veka ufena lahir ma uan afwatan ihin roak na'a ning vava'at a.
Ufena ma otu afa ovi rotu ma terang a valing ra rotu salasilan.