Snurak verin tamata ovi rsifa roak a
1 Terang a valing averi!
Fiang ini mane ufalyawang lahir verin mia na'a afa ovi mtyulis roak verin ya'a.
Mia myorat ya'a ne,
“Wean i brana ra wol rsifa,
na inyai lolin watan?
Inyai kena te wahal?”
2 Ufalak ne,
kena.
Ba ki ufalyawang afa yai verin mia.
Tevek tamata rivun rsifa tia ma watan ovu tamata ovi wol awarira verin ira,
ba ni lolin a,
lokat brana ka'i nsifa watan ovu awan a.
Lokat vata ra vali musti awarira isa watan,
boma deka rsifa tia ma watan ovu tamata ovi wol awarira verin ira.
3 Brana i nsifa roak musti notu munuk afa lolin ovi inovan ma notu verin awan a.
Wean vali inyai verin vata i nsifa roak a.
Ia musti notu munuk afa lolin ovi inovan ma notu verin awan a.
4 Vata i nsifa roak a,
wol mane ka'i nfareta watan tenan a,
na'uk awan nfareta vali ia.
Wean vali inyai verin brana i nsifa roak a.
Ia wol mane ka'i nfareta watan tenan a,
na'uk awan a nfareta vali ia.*
5 Deka mane ka'i mifena watan ma wol mtyuba ovu awabira ra ma fyakena rira ininan ra.
Bis watan ma myotu wean inyai,
na'uk wol mane mnanat da'in,
asal ne mian vai isa roak,
boma fyadoku amar boku ma miflurut.
Myotu munuk wean inyai,
beti mtyuba isa ewal,
boma nitdawan a deka nweang nala mia,
tevek wol mtyahang nala bira ininan ra.
6 Ufalak watan ne,
wean i mia ovu awabira ra fyadoku ma wol mtyuba isa na'a amar boku,
na wol akataka.
Na'uk ya'a wol ufareta mia wean inyai.*
7 Ni lolin a,
wean i tamata ra munuk wearira ya'a ma wol rsifa.
Na'uk Ubu nala roak yabi lokat tamata,
ba dida yabi ra rsialing ira.
8 Na'uk tamata ovi wol msyifa ra ovu vata varu ra,
eka mryenar ma lolin ning snurak ini:
ni lolin a deka msyifa kikyai,
ma weabira watan ya'a.*
9 Na'uk wean i wol mtyahang nala bira ininan ra ma msyifa,
na lolin watan ma msyifa.
Tevek wean i wahal,
na bira ininan yai veka ntafal ma sian.
10 Tamata ovi msyifa roak a,
eka mryenar ma lolin fareta i ufalak ini,
tevek fareta ini wol ntali ya'a,
na'uk ntali lahir Duila'a.
Ihin a wean ini:
vata ovi msyifa roak a wol bisma mtyalik awabira ra.
11 Wean i mtyalik awabira ra,
na wol bisma msyifa ewal ovu tamata liak ra.
Na'uk bis myotu ma lolin,
ma msyifa ewal ovu awabira ra.
Brana ovi msyifa roak,
wol bisma mtyalik awabira ra.
12 Snurak isa ini wol ntali Duila'a,
na'uk ntali watan ya'a.
Snurak a wean ini:
Wean i teradida isa nsifa roak ovu vata i wol norang Yesus,
na'uk vata yai ntorung ma ni vava'at isa ovu teradida yai,
na deka mane brana ntalik ia.
13 Wean i vata isa nsifa roak ovu brana i wol norang Yesus,
na'uk brana yai ntorung ma ni vava'at isa ovu teradida yai,
na deka mane vata ntalik ia.
14 Brana i norang roak Duila'a Yesus,
na'uk awan a wol norang,
na Ubu notu ma awan ralan a ntafal ma lolin tevek ni vava'at isa ovu brana a,
ovu brana yai ni inorang.
Vata i norang roak Duila'a Yesus,
na'uk awan a wol norang,
na Ubu notu ma awan ralan a ntafal ma lolin tevek ni vava'at isa ovu vata a,
ovu vata yai ni inorang a.
Ubu notu vali wean inyai verin yanabira ra.
Wol wean inyai,
na yanabira ra wearira lahir kasiko'u ovi wol rorang Ubu.*
15 Na'uk wean i tamata isa i norang Yesus,
awan a wol norang Yesus,
ovu awan a inan ma ntalik ia,
na deka ntahang teri awan yai.
Notu wean inyai,
na nfaturu roak ne,
wol ni varvara na'a rira sifa yai.
Ubu nera roak mia ma bira vava'at ra malinan watan.
16 Mia musti mingnanang ne,
vata ovi myorang Yesus,
ka'a bi bisma mlyobang awabira ra ma rorang vali Ia.
Brana ovi myorang Yesus,
ka'a bi bisma mlyobang awabira ra ma rorang vali Ia.
Bira vava'at ra musti wean ewal amar i Ubu nera mia ma myorang Yesus
17 Terang a valing averi!
Era ma lokat tamata bira vava'at musti wean lahir afa ovi Duila'a nfadoku roak verin mia,
na'ut i nera mia ma myorang Ia.
Ufadoku roak ma afa i ufalak ini neluk fareta verin sidovung tamata ovi rorang Yesus munuk.
18 Ba wean i tamata isa rsunat roak ia,
na'ut i Ubu nera ia ma norang Yesus,
na deka nfonak ni sunat yai ma nfalak ne,
wol rsunat ia.
Wean vali inyai verin tamata i wol rsunat ia,
na'ut i Ubu nera ia ma norang Yesus,
na deka rsunat ia.*
19 Tevek rsunat te wol rsunat,
irua wearira isa watan,
ma wol ihir akataka.
Ba afa i lolin urun a,
tot-orang afa ovi Ubu nfareta ma totu ra.
20 Ba fara bira vava'at ra wean lahir i Ubu nfadoku roak verin mia,
na'ut i nera mia ma myorang Yesus.
21 Na'ut i Ubu nera mia ma myorang Yesus,
na myeluk tamata sansinir?
Afa yai wol akataka.
Na'uk wean i bira amar a nana'a ma bisma mdyir-talik tali bira dawan ra,
na bis watan.*
22 Tevek tamata sansinir i Duila'a nera roak ia yai,
ni vava'at isa roak ovu Ia.
Tamata yai wol neluk sansinir roak,
tevek Duila'a Ni roak ia.
Wean vali inyai verin tamata ovi wol reluk roak sansinir.
Kristus nera roak ira ma rkarya verin Ia,
wean lahir tamata sansinir.
23 Ubu nala Yesus ma tamata ra rfedan roak Ia,
ma al nakvanak mia,
ba afa yai fyawan urun!
Ia notu wean inyai,
ba deka mtyorung ma myeluk tamata sansinir verin tamata ra.
24 Terang a valing averi!
Ubu nera roak mia ma mnya'a sidovung isa ovu Ia.
Ba wean inyai,
na fara lokat tamata bira vava'at a nana'a watan afa ovi Ubu nfadoku roak a.
Snurak verin tamata ovi wol rsifa obin
25 Mane ufamalik na'a tamata ovi wol rsifa obin a.
Duila'a wol nala fareta verin ya'a ma ufamalik afa ini verin mia,
na'uk ya'a ala watan ning fikiran a verin mia,
tevek Ubu nfili roak ya'a ovu nala Ni rala lolin a verin ya'a.*
26 Ita tka'a roak ne,
fiang ini dida susa dawan urun,
ba ufikir ne,
ni lolin a deka msyifa ma weabira watan inyai.
27 Wean i awabira roak,
na deka mdyava linga'an ma mtyalik awabira ra,
ovu vali wean i wol awabira obin,
na ni lolin a deka mdyava linga'an ma msyifa.
28 Wean i wol awabira obin,
na'uk inabira ma msyifa,
na inyai wol salasilan.
Vata mnelat ra vali,
wean i rsifa,
na inyai wol salasilan.
Na'uk tamata ovi msyifa roak veka mtyuan susa na'a bira vava'at ra.
Wean inyai bi,
inak urun ma ufaroa susa yai tali mia.
29 Terang a valing averi!
Ya'a ufikir ne,
dida amar a mamahin,
ba tali amar ini,
na deka fyikir da'in awabira ra.
30 Tamata ovi byakar,
tevek ralabira lalau urun a,
eka myotu vali ma felabira ra wean tamata ovi ralarira ra wol lalau a.
Tamata ovi ba'i myotu inabira lolin a,
eka myotu felabira ra wean tamata ovi wol rotu roak inarira lolin.
Tamata ovi ba'i fyaha afa,
eka myotu felabira ra wean tamata ovi wol rfaha roak afa.
Myotu wean inyai,
boma iva'ubira ma mkyarya verin Ubu.
31 Tamata ovi ba'i fyikir a'uk afa ovi rna'a lanit ivavan a,
deka fyikir kikyai afa avyai,
tevek wol mnanat,
na lanit ivavan a veka namwear munuk.
32 Ya'a inak vali ma deka fyikir da'in bira vava'at ra.
Tamata ovi wol awarira,
rfikir a'uk Duila'a.
Tamata ovi wearira inyai,
rfikir a'uk ne,
rotu wean inba,
boma Duila'a ralan a lolin ira.
33 Na'uk brana ovi rsifa roak ba'i rfikir a'uk afa ovi rna'a lanit ivavan ini,
ma rdava a'uk mane rfaloling awarira ra.
34 Ira rotu wean inyai,
ba ralarira ra wol rna'a wan isa roak.
Vata ovi wol rsifa ovu mnelat ra,
ira bisma rfikir a'uk afa ovi Duila'a notu ra,
boma tenarira ra ovu ralarira ra rmerat urun verin Ia.
Na'uk vata ovi rsifa roak ra rfikir a'uk afa ovi rna'a lanit ivavan ini,
tevek inar ma rfaloling watan awarira ra.
35 Ufalak munuk afa avyai verin mia ma na'a bira lolin.
Ya'a wol mane ufalak teri mia ma deka myotu wean inyai,
na'uk inak ma myotu afa lolin ra ovu vali afa ovi kena ra,
boma wol angangal verin mia ma mkyarya verin Duila'a.
36 Na'uk wean i tamata isa nfikir ne,
veka notu afa ovi wol inovan ra verin ni vata i rtavun teri roak a,
te vata yai ni amar ma nsifa nlia roak,
na ni lolin ana,
tamata yai nsifa a'uk.
Wean i rsifa,
na wol salasilan.
37 Na'uk wean i tamata isa nvolan roak na'a ralan a ma wol nsifa ovu ni vata a,
na inyai lolin urun,
tevek tamata ra wol rkiwal ia ma notu wean inyai.
Ia ralan a ka'i nfalak,
ba wol akataka.
38 Ba tamata i nsifa ovu ni vata a,
ia notu vali afa ovi lolin ra.
Na'uk tamata i wol nsifa lahir ovu ni vata a,
ni afa ovi notu ra,
lolin lia tali afa ovi tamata i nsifa yai notu ra.
39 Vata ovi rsifa roak a,
wean i awarira ra rva'at obin,
na deka rtalik ira.
Wean i awarira rmata roak,
beti bisma rsifa ewal ovu brana ovi ralarira ra rfalak a,
asal ne tamata avyai tamata ovi rorang Duila'a.
40 Na'uk ya'a ufikir ne,
vata yai veka inan lolin wean i wol nsifa ewal.
Ya'a ufikir vali ne,
afa i ufalak ini wol ntali watan ya'a,
na'uk ntali vali Ubu Ni Roh a.