Tamata ovi myorang Yesus deka myovun bira kida ra verin fareta i wol nka'a Ubu ma nfaleka inukun verin ira
1 Terang a valing averi!
Wean i msyingarahi ovu terabir-valibira tamata inorang isa,
na deka ti myangadu ia verin tamata i wol nka'a Ubu,
ma nfaleka inukun verin ia.
Afakinimi wol myera verin Ubu Ni sidovung tamata ovi rorang Yesus ma rfaleka inukun verin ia?
2 Mia betane wol mkya'a ne,
Ubu Ni tamata ovi rorang Yesus veka rfaleka inukun verin tamata ovi rna'a lanit ivavan a?
Wean i kena ma fyaleka inukun verin tamata ovi rna'a lanit ivavan ini,
na afaki notu mi wol myurus nala tamata ovi rsingarahi na'a rira afa ovi wol ihir akataka na'a bira sidovung ralan a?
3 Mia betane wol mkya'a vali ne,
ita veka tfaleka inukun verin Ubu Ni sansinir ra tali lanit ratan?
Ba wean i kena,
na ita bis lahir ma turus nala angangal ovi lokat amar,
na ba'i tatuan na'a dida vava'at ra.
4 Ba afaki notu mi myangadu afa sala ovi ba'i totu lokat amar na'a dida vava'at ra verin tamata ovi wol rna'a bira sidovung tamata ovi rorang Yesus,
ma rfaleka inukun verin ira?
Mia wol myalang tamata avyai.
5 Ufalak wean ini ma al ufama'it mia,
tevek uka'a lahir ne,
tali mia,
na tamata boku rira kaka'a dawan ma rurus nala afa ovi rotu ma msyingarahi ovu terabir-valibira tamata ovi rorang Yesus!
6 Na'uk mia myotu ma naling ma lolan watan.
Mia myangadu terabir-valibira tamata ovi rorang Yesus verin tamata ovi wol rorang Ubu,
ma rfaleka inukun verin ira.
7 Ba wean i msyingarahi ovu terabir-valibira ra ma msyimangadu mia na'a tamata ovi wol rorang Ubu waharira ralan ra,
na wol utubira lahir,
na'uk rfaruki munuk mia.
Ni lolin a,
terabir-valibira rfaruki mia ovu rotu sian mia watan.*
8 Na'uk mia ini ka'i myotu afa ovi sala ra,
ovu ka'i fyaruki watan tamata liak ra,
velik ne terabir-valibira avyai tamata inorang ira.
9 Mia mkya'a roak ne,
tamata ovi rira vava'at ra rkiluk-rkiban,
ira veka wol warira na'a Ubu Ni Fareta a.
Mia deka ka'i mlyabir tenabira ra,
tevek tamata ovi rsifa tia ma watan ovu tamata ovi wol awarira verin ira,
ovu tamata ovi rsoak nulu walut ra,
ovu tamata ovi rsifa roak na'uk rtuba ovu tamata ovi wol awarira verin ira,
ovu vali brana ovi ka'i rsifa ovu brana,
irmunuk veka wol warira na'a Ubu Ni Fareta a.
10 Tamata barborin ra,
tamata ovi inar ma rtafal ila'a rira metan ra,
tamata boranavut ra,
tamata ovi rfalak sian tamata liak ra,
tamata ovi rsiklabir boma rala tamata liak rira metan ra,
na ira vali veka wol warira na'a Ubu Ni Fareta a.*
11 Lan ana,
tamata boku tali bira sidovung a rotu lahir wean inyai.
Na'uk fiang ini,
Ubu nfamerat roak mia tali bira salasilan ra ma mnya'a roak Ni sidovung a.
Ia notu vali ma bira vava'at ra rmalola,
nahu Duila'a Yesus Kristus Ni afa ovi notu a,
ovu vali Ubu Ni Roh nkarya na'a ralabira ra.*
Snurak ma tamata ovi rorang Yesus deka rsifa tia ma watan ovu tamata ovi wol awarira verin ira
12 Terang a valing averi!
Tamata boku rfalak ne,
“Ita bisma totu afaka watan,
wean i raladida ra rfalak.”
Na'uk afa boku wol rlobang ita na'a dida inorang a.
Velik ne bisma otu afaka watan na'a afa ovi Ubu wol nfalak teri,
na'uk wol utorung ma otu afa avyai,
tevek ufena ma afaka watan rfareta tenang a.
13 Tamata boku tali mia rfalak ne,
“Afamtahan ovi ta'an ra rsuta evudida ralan a,
ovu vali evudida ralan a nsa'a afamtahan ovi ta'an roak a.”
Na'uk ti naran amar i veka tna'a lanit ratan a,
na Ubu veka nfamwear munuk afamtahan ra ovu tenadida ra.
Ba deka tala tenadida ra ma tatuba ovu tamata ovi wol awadida verin ira,
na'uk tala tenadida ra ma al tkarya verin Ubu.
Totu wean inyai,
tevek Ia Duila'a verin ita,
ma nfalak afa ovi totu ra na'a tenadida ra.
14 Ubu nfava'at ewal Duila'a Yesus tali matmatan ovu Ni ngrebat a,
ba Ia veka nfava'at vali ita wean inyai.
15 Mia musti mkya'a ne,
Kristus Ni roak tenabira ra,
ba wol bisma myala tenabira ra verin vatlean ra.
Wol bisma myotu wean inyai,
tevek wean i myotu,
na inyai wean watan i myala roak Kristus tenan boku ma isa roak ovu vata i wean inyai.
16 Betane mia wol mkya'a obin ne,
tamata i nala roak tenan a verin vatlean,
na isa roak ia ovu vata yai?
Surat Ralan a nfalak ne,
“Brana ovu vata a veka ikisa watan ira.”*
17 Na'uk tamata iki watan,
wean i isa roak ia ovu Duila'a,
na tamata yai ni roh a isa roak ovu Duila'a.*
18 Ba deka msyifa tia ma watan ovu tamata ovi wol awabira verin ira.
Tamata i nsifa tia ma watan wean inyai,
na ia ka'i not-visal watan ni vava'at a,
nlia tali salasilan liak ra munuk.*
19 Mia mkya'a urun ne,
Ubu Ni Roh nleal tenabira ra,
ovu tenabira ra wean lahir Ubu Ni Rahan Dawan Falurut.
Ba mia wol bira watan tenabira ra,
tevek Ubu Ni munuk tenabira ra.
20 Velik aba,
mia mkya'a roak ne,
Ubu nbahir ma dawan roak mia.
Ia nala Yesus verin tamata ra ma rfedan roak Ia ma al nakvanak mia,
ovu afa yai fyawan urun!
Ba myotu munuk a'uk afa ovi lolin ra ovu tenabira ra,
boma tamata ra rfadawang Ubu.