Sidovung tamata ovi rorang Yesus na'a kota Korintus rotu salasilan
1 Terang a valing averi,
tamata ra rarenar roak ne,
na'a bira sidovung a,
na tamata ra rsifa tia ma watan ovu tamata ovi wol awarira verin ira.
* Urenar ne,
tamata isa ntuba lahir ovu renan fareling a!
Velik ne tamata boku wol rka'a Ubu,
na'uk wol tatuan afa sian i wean ini obin na'a rira vava'at ra.
2 Velik ne mia musti mya'it,
tevek afa i brana yai notu a,
na'uk mia fyakaratat watan tenabira ra.
Velik aba,
ralabira ra musti lalau urun ovu myaling vatuk lahir tamata yai tali bira sidovung a.
3 Tevek mia mkya'a roak ne,
itmunuk wol tna'a wan isa,
na'uk ufikir lalawatan mia.
Velik ne wol tna'a wan isa,
na'uk wean watan i una'a roak bira sidovung a,
ma ya'a ufaleka lahir inukun verin tamata i notu afa sian yai.
4-5 Wean i misdovu mia ovu ngrebat i tali dida Duila'a Yesus Kristus,
na fyikir watan ne,
ya'a una'a roak bira sidovung a.
Ba myala Duila'a Yesus Kristus naran a ma myaling vatuk tamata yai tali bira sidovung a,
ma myala ia ti verin nitdawan a,
boma nwi-nwa ia ma ni susa dawan ila'a.
Myotu wean inyai,
boma ti naran amar i Duila'a veka nma ewal ma nukun tamata ra,
na Ia veka nala tamata yai ni roh a ma nsikat ia tali ni salasilan ra,
ma ni vava'at kakiwal.*
6 Ba wol inovan lahir ma fyakaratat tenabira ra na'a afa ovi sian ra.
Mia wol mkya'a ne ragi,
velik ne ko'u watan,
na'uk bisma nfamela terigu ma dawan ila'a.
Inyai wean vali tamata i notu afa sian isa watan,
na'uk bisma nlabir nala munuk mia.
7 Byatuk kikyai bira afa sian ovi myotu ra,
tevek afa sian avyai wean lahir ragi i mnanat a.
Myotu wean inyai,
na mia weabira lahir roti i wol rotu ragi na'a,
ba myerat roak,
tevek Ubu Ni roak mia.
Kristus neluk roak domba yanan ma nmata al nakvanak ita.
Ia notu wean inyai ma neluk linga'an ma Ubu naling vatuk dida salasilan ra,
wean lahir domba i tamata Yahudi rfedan na'a rira amar dawan Paskah.*
8 Ba mya ma totu snoba al tangnanang amar dawan yai,
ma deka ta'an roti i rfadoku ragi mnanat na'a.
Inyai ihin a ne,
na'a dida vava'at ra,
deka totu lahir afa ovi sian ra munuk,
ovu deka tfikir sian tamata liak ra.
Na'uk totu a'uk afa ovi lolin ra ovu afa ovi kena ra,
ma deka tsileti lahir ovu afa ovi sian ra.*
9 Utulis roak na'a ning surat lan a,
ma ufalak verin mia ne,
deka myotu kida ovu tamata ovi rsifa tia ma watan ovu tamata ovi wol awarira verin ira.
10 Ya'a wol mane ufalak ma deka myotu kida ovu tamata ovi wol rorang Ubu na'a lanit ivavan ini.
Tamata avyai rsifa tia ma watan ovu tamata ovi wol awarira verin ira,
te inar ma rtafal ila'a rira metan ra ma rfikir a'uk tenarira ra,
te rsiklabir,
boma rala tamata liak rira metan ra,
te rsoak nulu walut ra.
Wean i mdyir-talik lahir lanit ivavan ini,
beti bisma fyaroa tenabira ra tali tamata ovi wol rorang Ubu.
11 Na'uk inak ma ufalyawang afa ovi utulis roak verin mia na'a ning surat a ne,
deka myotu kida ovu tamata ovi rfalak ne rorang Yesus,
na'uk rsifa tia ma watan ovu tamata ovi wol awarira verin ira.
Deka myotu kida vali ovu tamata ovi rfalak ne rorang Yesus,
na'uk inar ma rtafal ila'a rira metan ra ma rfikir a'uk tenarira ra,
tamata ovi rsoak nulu walut ra,
tamata ovi rfalak sian tamata liak ra,
tamata ovi boranavut ira,
ovu vali tamata ovi rsiklabir,
boma rala tamata liak rira metan ra.
Deka myotu kida ovu tamata ovi rfalak ne rorang Yesus,
na'uk rotu afa sian avyai,
ovu vali deka ti naran i mdyoku ma mifna'an ovu ira!
12-13 Ya'a wol bisma ufaleka inukun verin tamata ovi wol rna'a sidovung tamata ovi rorang Yesus,
tevek wol ning varvara yai.
Ubu a'uk sa'i nfaleka inukun verin ira.
Na'uk mia tamata ovi myorang Yesus bisma fyaleka lahir inukun verin terabir-valibira ovi rotu salasilan na'a bira sidovung a.
Tevek rtulis roak na'a Surat Ralan ne,
“Mila'ing vatuk tamata ovi rotu afa ovi sian ra tali bira sidovung a.”*