Ubu sa'i nfaleka inukun verin tamata ra, ba deka fyaleka inukun verin Ni rasul ra
1 Terang a valing averi,
ya'a,
Paulus,
utulis surat ini verin mia ma ufalak ne,
mia musti fyikir watan ne,
ya'a ovu Apolos,
Kristus Ni tamata sansinir verin ami.
Ba amfabana karya i nala verin ami ma amotu a.
Ubu nala varvara verin ami tamata ovi amfamalik ivar fanfonak ovi lan ana,
Ia wol nfavotuk obin verin tamata ra.
2 Ba wean i tamata isa nvara karya tali ni dawan a,
na tamata yai musti nfabana ma lolin karya yai ovu ralan urun.
3 Na'uk verin ya'a,
velik ne mia ka'i fyaleka inukun verin ya'a,
te myala ya'a ti udiri tamata i ba'i nfaleka inukun verin tamata ra wahan ralan a ma al mdyava ning sala a,
na ralang a wol sian na'a afa avyai.
Ya'a vali wol mane ka'i ufaleka inukun verin ya'a tali karya i otu ra verin Ubu.
4 Ufikir na'a ralang a ne,
wol ning sala akataka na'a karya i Ubu nala roak verin ya'a ini.
Na'uk afa yai wol mane nfaturu ne,
wol ning sala.
Duila'a sa'i nfadoku ne,
ning karya verin Ia yai,
kena te sala.
5 Ba terang a valing averi,
deka fyamalik tamata liak rira karya ra ne,
lolin te sian.
Mnyaban ma Duila'a nma ewal.
Ia veka nfavotuk afa fanfonak ovi rna'a ngarmeran ralan a,
ovu vali Ia veka nfalyawang afa fanfonak ovi tamata ra ranovak na'a ralarira ra.
Amar yai vali,
na Ubu veka nraning tamata ra lokat ira,
ma inovan ovu afa ovi rotu ra.*
6 Terang a valing averi,
tali afa ovi ufalak na'a tenang a,
na ufalak vali verin Apolos.
Lolin ma otu wean ini,
boma nlobang mia ma misahak ma mkya'a vaivatul ini:
“Deka myotu ma nlia tali vaivatul ovi Ubu nfadoku roak yai,”
boma deka fyakaratat tenabira ra ma fyadawang tamata boku,
na fyalak sian tamata liak ra.
7 Iki nfadoku roak ne,
fyawabira nlia tamata liak ra?
Wol mkya'a ne,
bira yabi ovu kaka'a,
ovu vali afa ovi na'a bira vava'at ra munuk lahir Ubu nala verin mia?
Afakinimi mingrihi ma fyefik buburbira ra al fyakaratat tenabira ra?
Mia wean i fyakaratat tenabira ra ne,
afakataka munuk Ubu wol nala verin mia?
8 Mia minovak ne,
afa ovi inabira ra rna'a munuk roak ovu mkya'i roak?
Mia fyikir vali ne,
bira munuk yabi ra ovu kaka'a ra?
Fyakaratat tenabira ra ma wean raja mia?
Inak urun ma bira inorang rangrebat wean raja ra,
ovu wean ami.
Fara wean inyai,
boma itmunuk a tfareta na'a isa!*
9 Ya'a unovak na'a ralang a ne,
na'a sidovung tamata ovi rorang Yesus,
na Ubu nfadoku roak van i ko'u rahi lia munuk a verin ami rasul ra.
Weamami lahir tamata ovi rfaleka roak inukun matmatan a verin ira,
ma tamata ra ovu Ubu Ni sansinir ra tali lanit ratan irmunuk rbana al ramunin ira.
10 Tamata ovi rna'a lanit ivavan a rfikir ne,
tamata boda-badi ami,
na'uk mia minovak ne,
bira kaka'a dawan,
tevek isa roak mia ovu Kristus.
Tamata boku rfalak ne,
wol mami ngrebat,
na'uk fyefik buburbira ra ma fyalak ne,
bira ngrebat tali Ubu.
Tamata ra ralang mia,
na'uk ami wahal!
11 Ami mami kadaravit ra viar watan,
ovu tamata ra ba'i rvaval ami.
Ami wol mami rahan ma amleal ovu wol afamtahan ma ama'an,
ovu vali wol wear ma amenu.
Ami wol mami afa avyai munuk ma naran amar ini.
12 Ami amkarya ma rati fala ami,
beti amafna'an.
Tamata ra ri'it ami,
na'uk amera verin Ubu ma naflahar ira.
Tamata ra rwi-rwa ami,
na amtahang ralamami watan.
13 Wean i tamata ra rfalak sian ami,
na amvalat ira ovu mami vaivatul lolin ra watan.
Tamata ra rfikir ne,
ami weamami watan bebu ovi rna'a lanit ivavan a.
Ma naran amar ini,
tamata ra rotu ami wean afa ngra-ngrodi ra ma wol fyawamami lahir!
14 Ya'a utulis afa avyai verin mia,
wol mane al ufama'it mia.
Na'uk mane ufangnanang lahir mia,
tevek weabira roak yanak lalean ra.
15 Ba velik ne tamata rivun vutu reluk tuan guru ma rair Kristus verin mia,
na'uk ya'a sa'i eluk yamabira,
tevek ufalyawang lan Yesus Kristus Ni Ivar Lolin a verin mia ovu myorang Ia.
16 Ba era verin mia ma na'a bira vava'at ra,
na musti myot-orang lahir afa ovi otu roak verin mia.*
17 Wean inyai bi,
usinir Timotius ma nti nalola mia.
Ia wean lahir yanak lalean a,
ba ulobang urun ia.
Ia not-orang lalawatan afa ovi Duila'a nfalak ra,
ba veka nfangnanang mia na'a afa ovi air verin mia,
ovu afa ovi otu ra na'a ning vava'at i orang Yesus Kristus.
Afa avyai air munuk roak verin sidovung tamata ovi rorang Yesus na'a wan inba watan.
18 Na'uk tamata boku tali mia fyakaratat tenabira ra ma fyalak ne dawan mia,
tevek fyikir ne,
veka wol ewal roak ya'a.
19 Na'uk wean i Duila'a nfaturu linga'an verin ya'a,
na wol mnanat,
na veka uti ulola mia ma usi'ik lahir tamata avyai rira afa ovi rotu ra,
boma uka'a lahir ne,
tamata avyai rala ngrebat tali inba ma rotu afa avyai.*
20 Tevek wean i Ubu nfareta tamata ra wean lahir Raja,
na ira wol mane rangrihi watan,
na'uk rfaturu ngrebat yai na'a rira vava'at ra.
21 Ba inabira ma otu aka?
Mingnanang,
ma mkyati bira fikiran sian i fyakaratat tenabira ra,
boma na'ut i uma,
na deka ungrova mia.
Myotu wean inyai,
na ralang lolin ma air mia ovu ning silobang a.