Deka myotu afa ovi rotu ma bira sidovung a veka nama'ar
1 Terang a valing averi!
Na'ut i itmunuk ana,
wol ungrihi nala verin mia wean tamata ovi Ubu Ni Roh nleal ralarira ra.
Na'uk ungrihi watan verin mia wean tamata ovi rira ininan sian ra rtali tenarira ra ma rorang afa avyai,
tevek mia weabira kasiko'u yanat ra ma bira inorang a wol nabwa'ar obin na'a Kristus.
2 Kasiko'u yanat ra bisma renu susu watan,
ba wol bisma ra'an afamtahan obin.
Mia weabira vali inyai.
Lan ana,
ya'a wol air mia ovu vaivatul ovi inovan verin tamata ovi rira inorang rangrebat verin Yesus,
tevek mia wol bisma fyan-aran afa avyai obin.
Ba ma naran amar ini,
na mia wol bisma mryenar ovu fyan-aran vaivatul avyai obin.
3 Mia bira vava'at ra rtali watan bira ininan sian ovi rtali tenabira ra.
Ba wean i wol inabira ma msyi'ik tamata liak rira lolin ra ovu msyingarahi-sikual mia,
na inyai nfaturu lahir ne,
myorang watan bira ininan sian ovi rtali lanit ivavan a,
ma weabira tamata ovi wol rka'a Ubu.
4 Wean i tamata boku rfalak ne,
“Ami amorang Paulus,”
na liak ra rfalak vali ne,
“Ami amorang Apolos,”
na inyai nfaturu roak ne,
bira afa ovi myotu ra myorang watan bira ininan sian ovi rtali lanit ivavan ini.
5 Ba wean inyai,
na fyikir ne ya'a ini iki ovu Apolos yai iki,
ma msyingarahi-sikual mia?
Ami tamata sansinir ami watan verin Duila'a,
ma amsurak amair roak mia,
boma myorang Kristus.
Ba amfabana watan karya i Duila'a nala roak verin lokat ami.
6 Na'a Ubu Ni va'i ralan a,
na ya'a,
Paulus,
ufamalik Yesus Kristus Ni vaivatul ra,
wean tamata ovi rotu rira va'i ma ravuri-rava nabat ra.
Apolos nair mia ma bira inorang nmela,
wean tamata ovi rala wear ma rtitik nabat ra.
Na'uk Ubu sa'i nkarya na'a ralabira ra,
wean i notu ma nabat avyai rarubu.
7 Na'a karya ini,
na tamata ovi ravuri-rava te rtitik nabat ra,
wol rarekan ira.
Trekan a'uk Ubu,
tevek Ia sa'i nfarubu nabat ra.
8 Tamata i navuri-nava nabat ra,
ovu tamata i nala wear ma ntitik nabat ra,
irua wear isa watan.
Ubu veka naval rira rala lolin ra lokat ira ma inovan ovu afa ovi rotu ra.
9 Ami amkarya na'a Ubu Ni va'i ralan a ovu amotu karya i nala verin ami.
Mia ini Ubu Ni va'i a ovu Ni rahan a.
Yesus Kristus neluk fanderen na'a dida vava'at ra
10 Ubu nala yabi* verin ya'a ma ufamalik lan Yesus Kristus verin mia.
Ning karya yai wean tamata i ni kaka'a dawan ma notu rahan,
na nfadoku lan fanderen a.
Tamata ovi rair mia,
ira wearira tamata ovi rfadiri rahan na'a fanderen i otu roak yai ratan a.
Na'uk tamata ovi rfadiri rahan yai lokat ira musti rsi'ik ma lolin rira karya ra na'a fanderen yai.
11 Ubu ka'i nfadoku roak Yesus Kristus ma neluk fanderen verin mia,
ma fyadiri bira inorang a.
Ba wol tamata isa vali bisma nair mia na'a fanderen liak.
12 Wean tamata ovi rma ma rkarya ma lolin,
ovu karya i Ubu nala verin ira ma rair mia,
na ira wearira watan tamata ovi rfadiri rahan na'a fanderen yai ratan a ovu masa,
perak,
ovu vali vatmasmasa i fyawan urun a.
Na'uk wean i tamata liak rma ma wol rkarya ma lolin na'a karya yai,
na ira wearira tamata i nfadiri rahan ovu aa,
ria,
ovu lavurun ovi rangaran roak a.
13 Lokat tamata rira karya ra veka rvotuk na'ut amar i Yesus Kristus veka nma ewal a,
tevek na'a amar yai vali,
na Ia veka nma ovu yafu ma nfavotuk lahir lokat tamata rira karya ra.
Ia veka nala yafu yai ma al nlanat ira,
boma nsi'ik lahir ne,
rira karya ra mnga'un te wahal.
14 Ba wean i rira karya ra rtahang nala yafu yai,
na Ubu veka naval* ira na'a rira rala lolin ra.
15 Wean i yafu nasnuri nala rira karya ra,
na ira raruki ma dawan.
Na'uk Ubu veka nsikat ira tali rira salasilan ra,
boma rira vava'at kakiwal.
Na'uk wearira lahir tamata ovi rfaturu linga'an ma raling vatuk tamata ra tali yafu ralan ma rti murin.
16 Mia wol mkya'a ne,
mia weabira lahir Ubu Ni Rahan Dawan Falurut?
* Mia wol mkya'a vali ne,
Ubu Ni Roh nleal mia?
17 Mimunuk weabira lahir Ubu Ni Rahan Dawan Falurut i nmerat urun yai.
Ba tamata iki watan wean i not-visal Ubu Ni Rahan Dawan Falurut a,
na Ia veka not-visal tamata yai.
18 Deka tamata isa vali tali mia ka'i nlabir watan tenan a.
Wean i tamata boku ranovak ne,
rira kaka'a dawan wean tamata ovi rna'a lanit ivavan ini rfikir a,
na tamata avyai musti rotu ma felarira ra wean tamata boda-badi ra.
Ira rotu felarira wean inyai,
boma rira vali kaka'a dawan tali Ubu.
19 Tamata ovi ranovak ne,
rira kaka'a dawan wean tamata ovi rna'a lanit ivavan ini,
na Ubu nfadoku ne rboda urun.
Rtulis roak na'a Surat Ralan ne,
“Ubu nala rira kaka'a ra ma al nfabriang lahir ira ma nfaleka ira.”*
20 Rtulis vali na'a Surat Ralan wean ini,
“Duila'a nka'a munuk lahir tamata ovi rira kaka'a dawan rira afa ovi ranovak a.
Afa avyai munuk wol ihir akataka.”*
21 Wean inyai bi era verin mia ma deka myalang ovu fyakaratat a'uk tamata boku,
na boku wahal.
Deka fyikir wean inyai,
tevek Ubu notu afakataka munuk roak verin mia ma na'a bira lolin.
22 Ubu nera ya'a,
Apolos ovu Petrus ma amlobang mia,
ba mia bira vali ami.
Lanit ivavan ini ovu bira vava'at ra,
ovu bira matmatan ra,
amar ini ovu amar ovi veka rma ini,
Ubu nfadoku munuk roak afa avyai verin mia.
23 Ubu Ni Kristus,
ovu Kristus Ni munuk roak mia.