Paulus nfamalik Kristus Ni matmatan na'a aa walwalur wol ntali ni kaka'a, na'uk ntali Ubu Ni ngrebat
1 Terang a valing averi!
Na'ut inyai,
na uma roak ma ufamalik Ivar i ntali Ubu verin mia.
Ya'a wol utang afa i tamata ovi rna'a lanit ivavan a rtang a,
tevek wol ala vaivatul ovi karatat ra,
te vaivatul ovi rfaminak tamata ralarira ra.*
2 Na'ut i itmunuk ana,
uvolan roak ma ufamalik watan Yesus Kristus,
ovu Ni matmatan a na'a aa walwalur verin mia.
Ya'a uvolan ma wol ufamalik afa liak.
3 Na'ut i una'a Korintus,
na ungrihi,
na'uk tenang a wol nangrebat,
ovu vali ubobar ma raruru lalean ya'a,
betane wol ot-nala ning karya a.
4 Afa ovi ufalak verin mia yai,
wol rtali tamata rira fikiran ra ma usweang mia ma myorang ya'a.
Na'uk wean i ufamalik Ubu Ni vaivatul ra na'a Yesus,
na Ubu Ni Roh a'uk sa'i nkarya na'a tamata ovi rarenar afa ovi ufalak ra,
ralarira ra.
Afa yai nfaturu lahir Ni ngrebat a.
5 Otu munuk afa avyai,
boma wol miklo'i bira inorang a na'a tamata rira fikiran ra,
na'uk miklo'i watan na'a Ubu Ni ngrebat a.
Ubu Ni Roh notu ma ita bisma tfan-aran Ni kaka'a dawan
6 Wean i amfamalik Ubu Ni vaivatul ra verin tamata ovi rira inorang nangrebat roak verin Yesus,
na amfamalik ovu kaka'a dawan ntali Ia.
Na'uk,
mami afa ovi amanovak ra wol rtali lanit ivavan ini,
te wol rtali dawan ovi fiang ini rna'a obin,
tevek amar isa,
na ira veka rmamu munuk.
7 Kaka'a dawan i amala al amanovak ovu amfamalik Ubu Ni vaivatul ra tali lahir Ia.
Lan ana,
tamata ra wol rka'a kaka'a dawan yai obin.
Wean inyai bi,
na'ut i Ubu wol notu lanit ivavan a obin,
na nvolan roak ma ita veka tovu vali Ia na'a Ni vanan i nfitik nyadat ma felan lolin urun a.*
8 Tali tamata ovi rban-ulu verin tamata ra na'a lanit ivavan ini,
na wol tamata isa vali nka'a kaka'a dawan yai.
Ubu nfadoku roak afa yai na'a Yesus.
Wean i afa yai lyawan roak verin ira,
na wol rfedan Duila'a i ba'i raraning Ia,
na'a aa walwalur a.
9 Na'uk wol rka'a,
ba kena lahir wean i rtulis roak na'a Surat Ralan ne,
“Tamata ra wol rarenar ovu wol rarea,
ovu vali wol rfikir lahir obin,
na'a afa ovi Ubu nfadoku roak verin tamata ovi rala lahir ralarira ra verin Ia.”*
10 Tamata ra wol rka'a kaka'a i Ubu nvolan roak yai,
na'uk Ni Roh nfalyawang munuk roak afa yai verin ami.
Ni Roh nrea ovu nka'a munuk lahir afaka watan,
ti naran afa fanfonak ovi rna'a Ubu ralan a.
11 Wean i tamata isa,
ia a'uk sa'i nka'a afa ovi rna'a ralan a.
Ubu Ni Roh a wean vali inyai.
Ia a'uk sa'i nka'a Ubu ralan a.
12 Na'uk Ubu nala Ni Roh verin ami.
Wean inyai bi,
ami wol amorang kaka'a ovi rtali lanit ivavan a.
Wean vali inyai bi,
ami bisma amka'a munuk afa ovi Ubu nala roak verin ami.
13 Ba amfalyawang vava'at ngorva'an na'a Yesus i Ubu nala roak verin ami yai,
na wol amala kaka'a tali tamata,
na'uk amala afa ovi Ubu Ni Roh a nfalak roak na'a ralamami ra.
Ami amfamalik vaivatul kena avyai tali Ni Roh a,
ma amfalyawang afa avyai verin tamata ovi Ni Roh nleal roak ralarira ra.
14 Na'uk tamata ovi Ubu Ni Roh wol nleal ralarira ra,
na ira wol rorang afa ovi Ubu Ni Roh nfalak ra.
Ira rfalak ne,
“Vaivatul avyai,
afa boda-badi watan.”
Ira wol rfan-aran vali ne,
Ubu Ni Roh a'uk sa'i bisma nlobang tamata ra ma rfan-aran vaivatul avyai.
15 Tamata ovi Ubu Ni Roh a nleal ralarira ra,
ira a'uk sa'i rka'a afa ovi kena ra munuk.
Na'uk tamata ovi Ubu Ni Roh a wol nleal ralarira ra,
wol isa vali bisma nfan-aran tamata ovi Ubu Ni Roh a nleal ralarira ra,
rira afa ovi ranovak ra.
16 Tevek rtulis roak na'a Surat Ralan ne,
“Iki veka nka'a Duila'a ralan a,
ovu iki bisma nsurak Ia?”
Na'uk ita,
tamata ovi Ni Roh nleal roak ita,
dida fikiran ra wear isa roak ovu Kristus.*