Paulus ni surat i ntulis lan verin sidovung tamata ovi rorang Yesus na'a kota Korintus
Paulus nala salam verin tamata ovi rorang Yesus rira sidovung na'a kota Korintus
1-3 Terang a valing ovi mnya'a kota Korintus!
Mia ini sidovung tamata ovi rorang Yesus.
Ubu nfili roak mia,
ovu notu ma bira vava'at ra rmerat urun nahu Yesus Kristus.
Mia mnya'a roak sidovung yai ma myeluk Ni tamata ovi rira vava'at ra rmalola,
tevek isa roak mia ovu Ia.
Tamata ovi rorang Duila'a Yesus Kristus wearira vali inyai na'a wan inba watan.
Ita munuk dida Duila'a verin Ia.
Ya'a Paulus,
ovu dida kida tamata inorang i naran Sostenes;
amaflurut verin Yamadida Ubila'a ovu Duila'a Yesus Kristus ma fara nala Ni rala lolin a verin mia,
ovu notu ma bira vava'at ra malinan watan.
Ubu ka'i nera ovu nfili ya'a ma eluk rasul verin Kristus Yesus,
ma ufamalik Ni Ivar Lolin a,
ovu utulis surat ini verin mia.
Paulus nfalak fara weninyai verin Ubu, tevek afa ovi nala roak verin tamata ovi rorang Yesus na'a kota Korintus
4 Ufalak fara weninyai lalawatan verin Ubu i uraning a,
tevek nala roak Ni rala lolin a verin mia.
Rala lolin yai ntali afa ovi notu roak verin mia na'a Kristus Yesus.
5 Ya'a ufalak fara weninyai verin Ubu,
tevek isa roak mia ovu Kristus,
ba nala roak afa lolin rivun verin mia na'a bira vava'at ra.
Ia notu wean inyai,
boma na'a afaka watan,
na mia bisma fyamalik urun Ni Ivar i nfamalik Yesus,
ovu vali bisma minovak nala munuk afa ovi nfalak ra verin mia.
6 Afa avyai rfaturu ne,
Ivar i amfamalik roak verin mia na'a Kristus,
nabwa'ar urun roak na'a ralabira ra.
7 Ba Ubu Ni Roh nala roak yabi* avyai munuk verin mia,
boma bisma mkyarya verin Ia na'a Ni va'i ralan a.
Ba fiang ini ralabira urun al mnyaban dida Duila'a Yesus Kristus Ni amar i veka nma ewal a.
Ia veka nma ma tamata ra munuk rsi'ik Ia.
8 Ia veka nfangrebat bira inorang a,
ti naran amar i Duila'a Yesus Kristus veka nma ewal a.
Ba na'a amar yai,
na wol bira sala roak na'a Duila'a wahan ralan a.
9 Ubu veka nfangrebat mia,
tevek Ia wol nablufang Ni tnorung i nala roak verin mia.
Ia nera mia ma bira vava'at isa roak ovu Yanan a Yesus Kristus.
Wean inyai bi ufalak fara weninyai verin Ubu.
Sidovung tamata ovi rorang Yesus rsingarahi-sikual ira
10 Terang a valing averi!
Duila'a Yesus nsinir ya'a ma ungrihi,
na ala lahir naran a ma ungrihi verin mia,
boma myorang afa ovi mane ufalak verin mia ini.
Era urun ma bir tinemun deka msyingarahi ma myotu bira sidovung alaling.
Era vali ma mian vai isa watan na'a bira fikiran ra ovu afa ovi fyalak ra.
11 Terang a valing averi,
ufalak wean ini,
tevek vata i naran Klo'e ni tamata ra rma ma rfalak verin ya'a ne,
mia msyingarahi-sikual mia ma fyalak na'a tamata i nban-ulu verin mia.
12 Ufalak wean inyai,
tevek ira rfalak ne,
tali bir tinemun,
na boku rfalak ne rorang ya'a,
Paulus.
Boku rfalak ne rorang Apolos,
boku vali rfalak ne rorang Petrus,
ovu vali boku rfalak ne rorang Kristus.
13 Bira vaivatul avyai rotu ma wean i msyiduk Kristus tenan a tia ma watan!
Afa yai wol kena lahir.
Ya'a,
Paulus,
wol umata na'a aa walwalur ma al ukvanak mia,
ovu wol rala narang a ma al rbaptis mia ovu myorang ya'a!*
14 Ufalak fara weninyai verin Ubu,
tevek tali bir tinemun,
na wol ubaptis munuk mia.
Ubaptis watan Krispus ovu Gayus.
15 Ba fiang ini,
wol bisma tamata isa vali ntali mia nfalak ne,
ya'a ala narang a ma al ubaptis ia ma norang ya'a.
16 Ya'a utorung ne,
ubaptis vali Stefanus ovu ni rahan teta a.
Na'uk wol ungnanang ma lolin ne,
betane nlia tali ira,
na ubaptis tamata liak boku vali na'a inyai.
17 Yesus Kristus wol nsinir ya'a ma ubaptis tamata,
na'uk nsinir ya'a ma ufamalik Ni Ivar Lolin.
Ya'a wol ufamalik Ni Ivar Lolin a ovu kaka'a ovi rtali tamata rira afa ovi rfalak ra,
tevek wean inyai,
na Kristus Ni matmatan a na'a aa walwalur wol ni ngrebat akataka.*
Ubu nfaturu Ni ngrebat a, Ni kaka'a a, ovu Ni fikiran a, nahu Yesus i nmata al nakvanak ita
18 Ba amfamalik Ivar i nfamalik Yesus Ni matmatan na'a aa walwalur ma al nakvanak tamata ra.
Ivar yai vu watan verin tamata ovi Ubu mane nukun ira,
tevek wol rorang Yesus.
Na'uk Ivar yai nfaturu lahir Ubu Ni ngrebat verin ita,
ma nsikat ita tali dida salasilan ra,
ma dida vava'at kakiwal.
19 Afa yai wean watan afa ovi Ubu nfalak roak na'a Surat Ralan ne,
“Ya'a veka ufasmoang tamata batbitar rira fikiran ra,
ovu vali ufamwear kaka'a dawan tali tamata ra,
boma wol rot-nala afa ovi ranovak ra.”*
20 Ba wean inba ovu tamata batbitar ra,
ovu tamata ovi rira kaka'a dawan a,
dawan ovi rair Ubu Ni inukun ra,
ovu vali tamata ovi rka'a rangrihi ma uturira tamata liak rira fikiran ra?
Ubu nfaturu roak ne,
tamata ovi wol rorang Ia rira kaka'a yai wol fyawan akataka.
21 Ubu Ni kaka'a dawan urun ma nvolan wean ini:
tamata ovi rna'a lanit ivavan ini rira kaka'a dawan,
na'uk ira wol rka'a Ubu na'a rira kaka'a ra.
Ubu nfadoku roak ma nsikat tamata ovi rorang Ia tali rira salasilan ra,
nahu Ni Ivar Lolin i amfamalik roak a,
ma rira vava'at kakiwal.
Ia notu wean inyai,
velik ne tamata ovi wol rka'a Ubu rfalak ne,
Ivar yai vu watan.
22 Tamata Yahudi ra rera faneak veki,
beti rorang afa ovi rarenar ra.
Tamata Yunani ra inar ma rka'a lan veki kaka'a dawan ovi rtali lanit ivavan ini,
beti rorang.
23 Na'uk ami wol amangrihi wean inyai.
Ami amfamalik watan Kristus i nmata na'a aa walwalur a.
Ivar yai nfakeri lahir tamata Yahudi ralarira ra ovu vali tamata ovi wol Yahudi ra ranovak ne,
Ivar yai vu watan.*
24 Na'uk Ubu nera tamata boku ma rorang Ia.
Tamata avyai boku Yahudi ira,
ovu vali boku wol Yahudi ira.
Na'ut i rarenar Ubu Ni Ivar Lolin i nfamalik Yesus ma rorang Ia,
na ira rfan-aran ne,
Ia wean lahir ngrebat ovu kaka'a tali Ubu.
25 Tamata boku ranovak ne,
Ivar i nfamalik Kristus ne,
nmata na'a aa walwalur yai,
Ivar vu watan.
Velik aba,
Ivar yai nlia munuk tamata rira kaka'a ra.
Ira ranovak vali ne,
afa ovi Ubu notu nahu Kristus wol ni ngrebat akataka.
Velik aba,
Ubu Ni ngrebat a nlia munuk tamata rira ngrebat ra.
26 Terang a valing averi!
Eka mingnanang na'ut i Ubu nera mia ma myorang Yesus.
Na'ut inyai,
na tamata ovi rna'a lanit ivavan ini ranovak ne,
tamata ifira watan tali mia rira kaka'a dawan,
ovu tamata boku watan,
tamata ra ba'i rarenar ira,
ovu vali tamata boku watan,
tamata dawan ira.
27 Na'uk Ubu nfili tamata ovi lanit ivavan a nfalak ira ne,
rboda,
boma nfama'it tamata ovi rira kaka'a dawan ra.
Ia nfili vali tamata ovi tamata liak ra rfalak ne wol fyawarira,
boma nfama'it tamata ovi tamata ra ba'i rsoak nulu ira.
28 Ubu nfili vali tamata ovi tamata ra wol ka'i ralang ira,
ovu nfili tamata ovi rfalak ne,
wol fyawarira ovu vali tamata ovi wol rira van akataka lahir.
Ia ka'i notu wean inyai,
boma afa ovi tamata ranovak ne,
fyawarira na'a lanit ivavan ini veka wol fyawarira lahir.
29 Notu wean inyai,
boma deka tamata isa vali nfakaratat tenan a na'a Ubu wahan ralan a.
30 Na'uk Ubu ka'i notu watan ma isa roak mia ovu Kristus Yesus.
Tali Ia,
na ita tka'a Ubu Ni kaka'a dawan a ovu Kristus nfamerat ita,
ovu notu vali ma ita bisma lolin ewal ovu Ubu,
ovu vali nfatalik ita tali afa ovi sian ra.
31 Ba terang a valing averi,
wean watan i rtulis roak na'a Surat Ralan ne,
“Wean i mane tfadawang afaka watan,
na tfadawang a'uk Duila'a,
tevek Ni afa ovi notu ra.”*