Inukun wol nkeak roak ita
1 Terang a valing averi!
Mia mkya'a roak ne,
inukun nfareta tamata ra na'ut i tamata ra rva'at obin.
Ufalak wean ini,
tevek uka'a ne,
mia fyan-aran roak inukun ra.
2 Inukun isa nfalak ne,
wean i vata isa nsifa ovu brana isa,
na na'ut i brana nva'at obin,
inukun nkeak vata yai ovu awan a.
Na'uk wean i nmata,
inukun yai wol nkeak roak ia ovu awan a.
3 Ba inukun yai nfalyawang ne,
wean i vata yai awan a nva'at obin,
na'uk nsifa ovu brana liak isa,
na vata yai sala roak ia,
wean lahir i vata yai ntuba ovu tamata i wol awan verin ia.
Wean i vata yai awan a nmata roak,
na inukun yai wol nkeak roak ia,
ba wean i nsifa ewal,
na ia wol sala ia,
tevek wol ntuba ovu tamata i wol awan verin ia.
4 Terang a valing averi,
mia weabira vali inyai.
Musa ni inukun ra wol rfareta roak mia,
tevek myovu vali ma myata ovu Kristus na'a aa walwalur.
Ba bira vava'at isa roak ovu Kristus i Ubu nfava'at ewal roak Ia.
Bira vava'at isa roak ovu Kristus,
ba afa ovi myotu na'a bira vava'at ra,
lolin ovu fyawan urun verin Ubu.
5 Lan ana,
ita torang watan dida ininan sian ovi rotu ma inadida ma totu lalawatan salasilan.
Na'ut inyai,
na tsoak nulu Musa ni inukun ra ma dida ininan sian ra rtafal lalawatan,
ba totu watan salasilan ma rvua matmatan a.
6 Na'uk fiang ini Musa ni inukun ra wol rkeak roak ita,
tevek ita wead i tmata roak ma wol tot-orang inukun avyai.
Ba fiang ini ita wol tsoak roak verin Musa ni inukun ra,
na'uk tsoak verin Ubu ovu dida vava'at ngorva'an i Ubu Ni Roh a nfaturu verin ita.
Musa ni inukun ra rfaturu dida salasilan ra
7 Ita veka tfalak afaka na'a Musa ni inukun ra?
Inukun avyai wean lahir afa ovi sian ra?
Wahal lahir!
Inukun avyai lolin,
tevek ntali inukun avyai,
na uka'a ne,
otu salasilan.
Musa ni inukun nfalak ne,
“Deka byo'itea afa ovi tamata liak rira.”
* Wean i wol nfalak wean inyai,
na wean inba ma uka'a ne,
afa yai kena te sala.
8 Na'uk ya'a tamata salasilan ya'a,
bi ning ininan sian ntafal ma ala tamata rira metan ra,
tevek Musa ni inukun ra rfalak teri ma deka inadida tamata rira metan ra.
Wean i Musa ni inukun ra wol rna'a,
na salasilan wol ni ngrebat ma nfareta ya'a.
9 Lalan a,
na'a ning vava'at a,
na wol ufan-aran Musa ni inukun ra.
Na'uk amar i ufan-aran inukun avyai,
na salasilan i nana'a ralang a ntafal ma inak ma otu salasilan.*
10 Wean inyai,
na inovan ma matmatan kakiwal nkena ya'a.
Ba inukun ovi Ubu nala ma tva'at,
rotu ma umata,
tevek otu salasilan.
11 Salasilan ndav-nala linga'an ma nlabir ya'a,
tevek unarin ne,
ala vava'at kakiwal tali inukun avyai.
Na'uk velik aba,
salasilan notu ma veka umata kakiwal.*
12 Ba Musa ni inukun ra ovu afa ovi rfareta na'a inukun avyai rmerat,
kena ovu rmalola,
tevek rtali Ubu.
13 Wean inyai,
na inukun lolin avyai rala matmatan verin ya'a?
Velik aba,
wahal lahir!
Ba tali inukun lolin avyai,
na lyawan lahir ne,
salasilan nana'a ralang a.
Salasilan nweang ya'a,
boma otu afa ovi sian ra,
ma veka umata.
Ba utorung ne,
salasilan yai sian urun i lahir.
Angangal ovi rna'a tamata ralarira ra
14 Ita tka'a roak ne,
Musa ni inukun ra lolin,
tevek rtali Ubu Ni Roh a,
na'uk ya'a ini tamata watan ya'a.
Ba salasilan nfareta ya'a wean tamata i rkiwal ia ma neluk tamata sansinir.
15 Wol ufan-aran afa ovi otu ra.
Ya'a wol otu afa lolin ovi ralang a nfalak ma otu ra,
na'uk otu watan afa ovi wol inak lahir ma otu ra.
16 Ba wean i otu afa ovi ralang a nfalak ma deka otu ra,
na utorung ne,
Musa ni inukun ra lolin.
17 Ba otu afa ovi sian ra,
velik ne ufena ma otu,
na'uk salasilan i nana'a ralang a,
nkiwal ya'a ma otu afa sian avyai.
18 Ya'a uka'a ne,
tamata watan ya'a,
ba wol afa lolin isa na'a ralang a.
Na'a ralang a,
na inak ma otu lolin a,
na'uk wol ot-nala.
19 Ya'a inak ma otu afa ovi lolin ra,
na'uk wol ot-nala afa ovi lolin ra.
Ya'a wol inak ma otu afa ovi sian ra,
na'uk otu watan afa ovi sian ra.
20 Ba wean i otu afa ovi ralang a nfalak ma deka otu ra,
na inyai nfaturu ne,
ya'a wol otu afa avyai,
na'uk salasilan i nfareta ralang a ka'i notu.
21 Ba afa avyai munuk ba'i rna'a ralang watan:
inak ma otu afa ovi lolin ra,
na'uk otu watan afa ovi sian ra.
22 Ya'a ralang lolin urun,
tevek Ubu Ni inukun ra.
23 Na'uk uka'a na'a tenang a ne,
ngrebat liak nfareta vali ya'a.
Ngrebat yai nangal inukun i utorung na'a ralang ila'a a.
Ba afa yai notu mi ngrebat i nfareta ralang a ma otu salasilan ra,
ka'i nkeak ya'a.
24 Wora ya'a,
tevek ralang a nwa'uk urun!
Iki veka nfatalik ya'a tali ralang i notu ma umata,
nata ti wol ni wahan a?
25 Ufadawang Ubu i nfatalik ya'a tali matmatan ni ngrebat a,
nahu dida Duila'a Yesus Kristus.
Ba tali ralang ila'a a,
na usoak verin Ubu Ni inukun ra,
na'uk tali ning fikiran wean tamata a,
na usoak verin salasilan a.