Deka totu salasilan, na'uk totu a'uk afa ovi Ubu ralan a nfalak ra
1 Terang a valing averi.
Betane tamata boku rfikir ma rfalak ne,
“Ubu nfaturu Ni rala lolin verin ita,
ba tatafal ma totu salasilan,
boma ntafal ewal Ni rala lolin yai verin ita.”
2 Tfalak wean inyai,
na wol kena lahir!
Ba bisma tfalak ne,
ita wean i tmata roak ovu Kristus ma salasilan wol nfareta roak ita.
Ba wean inbinimi na'a dida vava'at ra,
na ba'i totu watan salasilan ra?
3 Terang a valing averi!
Mia mkya'a roak ne,
na'ut i rbaptis ita,
na inyai neluk faneak ne,
isa roak ita ovu Kristus Yesus.
Inyai ihin a ne,
isa vali ita ovu Ni matmatan a.
4 Na'ut i rbaptis ita,
na dida vava'at mnanat a,
wean i tmata roak ma roving ita ovu Kristus na'a Ni matmatan a.
Yaman nfava'at ewal roak Ia tali Ni matmatan a ovu Ni ngrebat i dawan ila'a.
Notu wean inyai,
boma dida vava'at ngorva'an a,
naling ia tali dida vava'at mnanat a.
5 Dida vava'at isa roak ovu Kristus ma tovu vali Ia na'a Ni matmatan a.
Ba wean inyai,
na Ubu veka nala vava'at ngorva'an verin ita,
wean lahir i nala roak verin Kristus na'ut i nfava'at ewal Ia.
6 Ita tka'a roak ne,
lan a totu lalawatan salasilan ra.
Dida vava'at i wean inyai wol nana'a roak na'ut i tmata ovu Kristus na'a aa walwalur,
boma salasilan wol nfareta roak ita.
Ba wean inyai,
na salasilan wol nfareta roak ita na'a dida vava'at ra.*
7 Tevek wean i tamata isa nmata roak,
na salasilan a wol nfareta roak ia.
8 Ba wean i tovu roak na'a Kristus Ni matmatan a,
na torang urun ne,
veka tva'at vali ovu Ia.
9 Ita tka'a ne,
Kristus nva'at ewal roak tali matmatan,
ba veka wol nmata roak.
Matmatan ni ngrebat a wol nfaret-nala roak Ia.
10 Kristus nmata fasa watan,
boma not-visal salasilan ni ngrebat a.
Fiang ini Ia nva'at,
nata ti wol ni wahan,
boma notu watan afa ovi rfaloling Ubu ralan a.
11 Ba mia musti minovak vali ne,
isa roak mia ovu Kristus na'a Ni matmatan,
ba salasilan wol nfareta roak mia.
Minovak vali ne,
bya'at boma myotu watan afa ovi rfaloling Ubu ralan a,
tevek bira vava'at isa roak ovu Kristus Yesus.
12 Deka mtyorung ma salasilan a nfareta tenabira ovi veka rakvisal a,
boma deka myorang lahir bira ininan sian ra.
13 Deka myala eabir-limabira ra,
te afa ovi rna'a tenabira ra munuk ma salasilan nfareta mia,
ma myotu afa ovi sian ra.
Na'uk myala tenabira ra verin Ubu,
tevek matmatan wol nfareta roak mia,
ovu fiang ini bira vali vava'at ngorva'an.
Myala tenabira ra munuk lahir verin Ubu,
boma myotu watan afa ovi kena ra,
ovu wean lahir Ubu ralan nfalak a.
14 Ba salasilan a wol nfareta roak mia,
tevek wol msyoak roak verin Musa ni inukun ra.
Na'uk bira vava'at ra rna'a watan Ubu Ni rala lolin i nfaturu roak verin mia.*
Ita musti tot-orang afa ovi kena ra, wean tamata sansinir not-orang afa ovi duan a nfalak ra
15 Ubu notu ma dida vava'at ra rmalola,
tevek Ni rala lolin a.
Ia wol notu wean inyai tevek tot-orang Musa ni inukun ra.
Ba deka tfalak ne,
“Ubu nala roak Ni rala lolin verin ita,
ba totu watan salasilan!”
16 Mia mkya'a roak ne,
wean i mtyorung ma myot-orang afa ovi tamata isa nfalak,
na mia myeluk tamata sansinir verin tamata yai.
Wean i ba'i myotu salasilan,
na inyai nfaturu ne,
salasilan nfareta roak mia,
wean tamata isa nfareta ni tamata sansinir.
Ba wean inyai,
na veka myata kakiwal.
Na'uk wean i myot-orang afa ovi Ubu nfalak ra,
na mia veka myeluk tamata ovi rira vava'at ra rmalola.
17 Ita tfalak fara weninyai verin Ubu,
tevek lan ana,
mia myeluk tamata sansinir verin salasilan a.
Na'uk fiang ini ralabira urun ma myot-orang afa kena ovi rair roak verin mia.
18 Ubu nfatalik roak mia tali salasilan,
ba salasilan wol nfareta roak mia,
ovu fiang ini myeluk roak tamata sansinir verin Ia,
ma myot-orang afa ovi kena ra.
19 Ufalak wean inyai,
tevek mia tamata watan mia,
ma wol ka'i fyan-aran ma lolin afa ovi ufalak ra.
Lan ana,
mia myala munuk tenabira ra ovu bira fikiran ra,
ma myeluk tamata sansinir verin bira ininan sian ra,
ba mtyafal lalawatan ma myotu afa ovi sian ra.
Fiang ini myala lahir tenabira ra ovu bira fikiran ra munuk,
ma myeluk tamata sansinir verin Ubu,
ma myot-orang watan afa ovi kena ra,
boma Ubu nfamerat mia.
20 Na'ut i myeluk tamata sansinir verin salasilan a,
na wol mtyorung ma myot-orang afa ovi Ubu ralan nfalak ra.
21 Utubira aka tali afa ovi myotu na'ut lalan a?
Afa avyai munuk rotu ma fiang i mya'it,
ovu rvua matmatan.*
22 Na'uk fiang ini,
Ubu nfatalik roak mia tali salasilan,
ba salasilan wol nfareta roak mia,
ovu myeluk roak tamata sansinir verin Ia.
Utubira,
tevek myala munuk roak bira vava'at ra verin Ubu ma nfamerat mia,
ba veka bira vava'at kakiwal.
23 Tamata ovi rotu salasilan ra veka rira matmatan kakiwal.
Na'uk Ubu nala vava'at kakiwal verin tamata ovi rira vava'at isa roak ovu dida Duila'a Kristus Yesus.
Ia notu wean inyai wol ntali afa ovi totu ra,
na'uk Ia ka'i nala watan.