Ubu Ni Roh nala ngrebat verin ita, ma na'a dida vava'at ra torang afa ovi ralan nfalak a
1 Fiang ini Ubu wol nukun roak tamata ovi rira vava'at isa roak ovu Kristus Yesus,
2 tevek Ubu Ni Roh nala vava'at ngorva'an verin ita nahu Kristus Yesus.
Wean inyai bi,
nfatalik ita tali matmatan ovu dida salasilan ra.
Ba matmatan ovu salasilan wol rfareta roak ita.
3 Musa ni inukun ra wol rfatalik nala ita tali salasilan,
ba salasilan a nfareta watan ita,
tevek wol dida ngrebat ma tot-nala afa ovi rfadoku na'a Musa ni inukun ra.
Na'uk afa ovi Musa ni inukun ra wol rot-nala,
Ubu not-nala!
Ia ka'i nsinir lahir Yanan a ma nma lanit ivavan ini,
ma felan a wean tamata i ni salasilan a.
Ubu Yanan nmata al ntevut tamata rira salasilan ra.
Ni matmatan a nfaleka salasilan ovi rna'a tamata ralarira ra.
4 Ubu notu wean inyai,
boma teluk tamata ovi rira vava'at ra rmalola na'a wahan ralan a,
wean afa ovi rfadoku roak na'a Musa ni inukun ra.
Ita wol tot-orang ininan sian ovi rtali tenadida ra,
na'uk torang watan ininan i ntali Ubu Ni Roh.
5 Tamata ovi rira vava'at ra rorang watan ininan sian ovi rna'a tenarira ra,
na ira rfikir watan ininan sian avyai.
Na'uk tamata ovi rira vava'at ra rot-orang ininan tali Ubu Ni Roh a,
na ira rfikir watan ininan avyai.
6 Tamata i nfikir a'uk ininan sian ovi rna'a tenan a,
na veka nmata kakiwal,
na'uk wean i nfikir a'uk ininan ovi rtali Ubu Ni Roh a,
na ia ni vava'at a malinan,
ovu veka ni vava'at kakiwal.
7 Tamata i nfikir a'uk ininan sian ovi rna'a ralan a,
na ia nangal roak Ubu.
Tamata yai wol nsoak verin Ubu Ni inukun ra,
ovu wol not-nala lahir inukun avyai.
8 Tamata ovi rfikir watan ininan sian ovi rna'a tenarira ra,
na ira wol rfaloling nala Ubu ralan a.
9 Na'uk bira ininan sian ovi rna'a tenabira ra wol rfaret-nala mia.
Wean i Ubu Ni Roh a nleal ralabira ra,
na Ni Roh nfareta bira vava'at ra.
Wean i Kristus Ni Roh a wol nleal ralabira ra,
na Kristus wol Ni roak mia.
10 Na'uk wean i Kristus nana'a ralabira ra,
na velik ne tenabira ra musti rmata tevek salasilan ra,
Ubu Ni Roh a nala vava'at kakiwal verin mia,
tevek notu roak ma bira vava'at ra rmalola na'a wahan ralan a.
11 Ubu Ni Roh i nfava'at ewal roak Kristus tali matmatan yai nleal raladida ra.
Ba velik ne tenadida ra veka rmata,
na Ubu veka nfava'at ewal tenadida ra ovu Ni Roh i nleal raladida ra.
12 Ba terang a valing averi,
ita dida varvara ma torang Ubu,
na'uk wol dida varvara ma tot-orang ininan sian ovi rna'a tenadida ra.
13 Wean i myorang watan bira ininan sian ovi rna'a tenabira ra,
na veka myata.
Na'uk wean i myorang Ubu Ni Roh a,
na Ia nfangrebat mia,
ma byatuk bira ininan sian ovi rna'a tenabira ra,
ovu veka bira vava'at kakiwal.
14 Tamata ovi Ubu Ni Roh nban-ulu verin ira yai,
Ubu yanan ira.
15 Ba Ubu Ni Roh i nala verin mia yai wol notu ma myeluk tamata sansinir ma byobar,
na'uk nsikat mia ma myeluk roak Ubu yanan ra.
Ni Roh yai nleal lokat ita raladida ra,
ma bisma tera Ubu ne,
“Bapa,
o Bapa!”
16 Ubu Ni Roh ka'i nkarya na'a raladida ra ma tfan-aran urun ne,
Ubu yanan ita.
17 Ubu yanan ita,
ba musti dida vali kalolin* ovi Ia ntorung roak verin yanan ra.
Ubu veka nala kalolin avyai verin Kristus,
ovu vali verin ita.
Wean i tatuan susa wean Kristus ntuan a na'a lanit ivavan a,
na veka tna'a vali ovu Ia na'a vanan i nfitik nyadat a.
Ubu veka nala vanan i nfitik nyadat a verin yanan ra
18 Terang a valing averi,
ya'a orang urun ne,
Ubu nalang ma dawan ita,
ovu nala vava'at i lolin urun verin ita.
Vava'at i Ubu nala yai dawan lia susa ovi tatuan fiang ini,
ba bisma tfalak ne,
dida susa ra ko'u watan.*
19 Afa ovi Ubu notu na'a lanit ovu lanit ivavan a munuk inar urun ma rnaban amar i Ubu veka nma ma nfaturu lahir yanan ra.
20-21 Ubu nfadoku roak ne,
Ia near nfasoba afa ovi rna'a lanit ovu lanit ivavan ini,
munuk lahir ma wol ihir akataka.
Ia notu wean inyai,
tevek ralan a nfalak,
wol mane norang ininan ovi rtali watan lanit ovu lanit ivavan a.
Velik ne wean inyai,
na'uk Ia nfadoku roak na'a ralan a ne,
afa avyai munuk rnaban amar isa,
ma Ia veka nfatalik afa ovi rna'a lanit ovu lanit ivavan a tali matmatan ni ngrebat a.
Ia notu wean inyai,
ba afa avyai munuk ovu Ubu yanan ra veka rti rna'a vava'at i lolin urun ma matmatan ni ngrebat wol nfareta ira.*
22 Ita tka'a ne,
susa rivun ila'a rna'a lanit ovu lanit ivavan a.
Bis tfalak ne,
susa avyai rotu ma afa ovi rna'a lanit ovu lanit ivavan rvakar,
tevek rfarnuang wawa'uk wean lahir i vata ra rfanuang na'ut i mane rarali ira.
23 Wol mane afa ovi rna'a lanit ovu lanit ivavan a watan rtuan susa,
na'uk ita tatuan susa vali ma raladida rwa'uk.
Ubu nala roak Ni Roh ma neluk afa i nala lan lalean verin ita.
Na'uk ita tnaban watan amar i Ubu veka nfatalik ita tali dida salasilan ra ovu susa ra,
ma nsikat ita ma teluk yanan ra,
ovu nala tenadida ngorva'an ovi wol bisma rmata roak.
24 Ubu nsikat roak ita tali dida salasilan ra,
ma dida vava'at kakiwal,
ovu tfaklo'i a'uk dida vava'at verin Ia,
ma tnaban Ni tnorung ovi mane nala verin ita.
Wean i tatuan roak tnorung avyai,
na veka wol tfaklo'i roak dida vava'at ra ma al tnaban afa avyai.
Tamata ra wol rfaklo'i rira vava'at ra ma al rnaban afa ovi rtuan roak a.
25 Na'uk wean i tfaklo'i dida vava'at ra ma al tnaban tnorung ovi wol tatuan lahir obin,
na ita veka tatahang nal raladida ra ma al tnaban afa avyai.
Wean i taflurut, na Ubu Ni Roh nlobang ita
26 Ubu Ni Roh a nlobang vali ita na'a afa lolin ovi tnaban ma nala verin ita,
ovu na'a afa ovi wol tot-nala lahir.
Ubu Ni Roh nlobang ita,
tevek ita wol tka'a ne,
musti taflurut na'a afaka.
Na'uk Ni Roh a ka'i naflurut ma al nlobang ita.
Afa ovi Ubu Ni Roh nera yai bilaman urun,
ma wol bisma tfalak nala ovu dida vaivatul ra.
27 Ubu nka'a munuk afa ovi rna'a tamata ralarira ra,
ovu nka'a vali afa i Ni Roh nfalak ovu nfikir ra.
Ba Ubu Ni Roh naflurut wean lahir i ralan a nfalak a ma al nlobang Ni tamata ovi rorang Ia.
Tatuan sian te lolin, na Ubu nasusan afakataka munuk ma na'a dida lolin
28 Fiang ini tka'a roak ne,
Ubu nasusan afakataka munuk,
boma nala Ni lolin verin tamata ovi rlobang urun Ia.
Ubu notu wean inyai,
ma wean lahir i ralan a nfalak roak verin tamata ovi nera roak ira ma reluk yanan ra.
29 Tamata ovi Ubu nfili lan roak ira ma reluk Ni tamata ra,
Ia nfadoku roak tali lalan ma tamata avyai felarira ra rtafal ma wean Yanan a.
Ia notu wean inyai,
boma Yanan i Yesus Kristus neluk iya'an lalean verin teran a valin tamata ovi rorang Ia.
30 Ba Ubu nfili tamata ovi ralan a nfalak roak ma nera lan ira ma reluk yanan ra.
Ubu nala linga'an verin tamata avyai ma rira vava'at ra rmalola.
Nata Ia veka nalang vali ira ovu notu ma rira vava'at ra lolin urun na'a vanan i nfitik nyadat a.
Ubu nfaturu Ni silobang i dawan urun a verin ita nahu Yesus Kristus
31 Ita veka tfalak afaka na'a afa avyai munuk?
Wean i Ubu nlotar ita,
na iki veka bisma nangal ita?
32 Ubu wol nfalak teri ma Yanan a deka ntuan sian a,
na'uk Ia ntorung ma nala Yanan a ma tamata ra rfedan Ia.
Ba Ia nala roak Yanan verin ita ovu tka'a ne,
veka nala vali afakataka munuk verin ita.
33 Iki bisma nfasala tamata ovi Ubu nfili roak ira?
Wol tamata,
tevek Ubu nfadoku roak ne,
ita weadida roak tamata ovi rira vava'at ra rmalola.
34 Iki bisma nukun ita?
Wol tamata,
tevek Kristus Yesus nmata ma al nakvanak ita.
Na'uk nlia tali inyai,
na Ia nva'at ewal tali matmatan.
Ia ndoku wan i tamata ra ba'i ralang urun na'a Ubu Ni lihir mela a,
ma nlotar ita.*
35 Wol tamata isa vali nangal nala Kristus Ni silobang a verin ita.
Velik ne tatuan susa dawan,
tamata ra rwi-rwa ita,
lafar dawan kena ita,
dida kadaravit wol naran ma tung a teluk ita,
rworuk-rwak te rfedan ita,
na afa avyai munuk wol rangal nala Kristus Ni silobang a verin ita.*
36 Rtulis roak na'a Surat Ralan ne,
“Lokat amar,
na tamata ra rdava mane rfedan watan ami,
tevek mami inorang a verin Oa.
Tamata rotu sian ami wean afwatan ovi mane rfedan ira.”*
37 Na'uk velik ne tatuan susa avyai munuk,
na susa avyai wol rfalek-nala ita,
na'uk utudida lahir,
tevek Yesus Kristus nlobang ita.*
38-39 Ya'a orang urun ne,
wol afa isa vali bis notu teri ma Ubu wol nlobang roak ita,
velik ne tmata te tva'at.
Ubu Ni sansinir ra tali lanit ratan,
te fareta ra te nait sian ra wol rotu teri nala vali Ubu Ni silobang a verin ita.
Afa ovi rvotuk amar ini,
te amar ovi veka rma a,
afa ovi rira ngrebat na'a lanit ratan,
te ovi rna'a letvava,
te afa liak ovi Ubu notu ra munuk,
wol rira ngrebat ma rotu teri nala Ubu Ni silobang i nfaturu verin ita,
nahu dida Duila'a Kristus Yesus.