Paulus navul kabal lar ma nobal nti Roma
1 Festus nfadoku ma amavul* kabal lar ma amobal amati propinsi Italia,
ba ira rala Paulus ovu tamata boku tali bu'i ralan verin Roma ni suldadu dawan isa naran Yulius.
Yulius ini ntali Kaisar ni sidovung suldadu dawan a.*
2 Amarata kabal lar isa ntali kota Adramitium,
mane amobal oli kota ovi rna'a tahat nelan na'a propinsi Asia.
Tamata Makedonia isa ntali kota Tesalonika,
naran Aristarkhus,
novu vali ami.
3 Ni ilyan ana,
amaran kota Sidon.
Yulius ini notu lolin Paulus,
ba ntorung ma Paulus nsuta tali kabal,
ma ti nalola ni kida ra ma rsi'ik ia na'a afa ovi nperlu ra.
4 Tali inyai,
na amobal ewal ma amahu nuhu isa naran Siprus ni varvavan,
tevek nait a nangal kabal a.
5 Ti ma amobal ma ametal aletan ma amahu propinsi Kilikia ovu propinsi Pamfilia,
ma ti amaran kota Mira i na'a propinsi Likia.
6 Amna'a inyai,
na suldadu dawan yai ndav-nala kabal lar isa ntali Aleksandria mane nti Italia,
ba novun ami ma amarata kabal yai.
7 Amtali Mira,
na amafla ngalalahang watan,
ba mami amar rivun na'a roal,
beti susa dawan nkena ami ma ti amfaseri kota Knidus.
Nait nangal teri ami,
ba wol amahu nala varat.
Amahu tranan ma amaran nuhu isa naran Kreta,
ma amafla oli ni varvavan ma ambosal lalar isa naran Salmone.
8 Susa buas ma amafla oli nuhu yai,
nata ti amaran namdawan isa i rfanara ia ne “Namdawan Lolin.”
Wan yai nfaseri kota Lasea.
9 Amvatuk amar rivun roak na'a mami inobal a.
Yahudi rira amar dawan i irmunuk rtolat nbosal roak,
* ba nait ovu saksakan ra dawan roak.
Paulus nsurak ira ne,
10 “Did tinemun,
uka'a roak ne wean i tobal ma wol tatalik,
na veka tatuan susa dawan ila'a.
Wol mane kabal ovu ni vnuat ra watan veka rakvisal,
na'uk ita veka tmata vali.”
11 Na'uk suldadu dawan yai wol norang Paulus ni snurak a,
ma norang watan tamata i ntaha wilin ovu tamata i ni kabal a,
rira afa ovi rfalak ra.
12 Namdawan yai wol lolin ma kabal ra rlau na'ut radridin dawan ovu saksakan.
Ba tali tamata ovi rkarya na'a kabal yai,
na etal dawan ra'an vai isa ma robal watan,
boma rti lahir ahu isa naran Feniks na'a nuhu Kreta,
ma rwelat inyai,
ti naran radridin dawan nlia veki.
Wan ini ndoku ma ti inovan ovu tranan varat ovu marmar varat.*
Nait ovu saksakan
13 Ti ma nait salsoling tali tranan nbana,
na tamata ovi rkarya na'a kabal yai rsi'ik ne lolin roak,
ba rfar a'ur ma rafla oli Kreta ni ngur a.
14 Wol mnanat,
na nait fufakmetan i rfanara ia ne “Nait Marmar Timur” ntali nuhu yai ndoal,
15 ma nait dawan yai nkena ma nangal teri lahir kabal a.
Ba amafla orang watan nait.
16 Amaskolal watan ma amahu nuhu ko'u isa naran Kauda ni varvavan a.
Susa buas,
na'uk amfasaka nala skutyafu i kabal ntoda.
17 Tamata kabal ra rfasaka nala roak skutyafu yai,
beti rala kakeak van dawan ra ma rfaban-lilit kabal ma rkeak al rfangrebat kabal tain.
Ira rbobar,
beta ne rakreti iyaru ngur i na'a lala'in isa naran Sirtis,
ba rfasuka lar a ma rfof-orang watan nait a.
18 Nait fufakmetan notu ma saksakan ra rwi-rwa mami kabal a ma natli'ik tia ma.
Ba ni ilyan ana,
betfasa rvatuk rira vnuat boku rsuta tahat.
19 Nata ni ilyan ewal,
na rvatuk kabal ni bakreat ra.
20 Amar ifira lahir,
na wol amrea lera te nara ra.
Nait ovu saksakan ra dawan ila'a,
ba ralamami ra kako'u ila'a roak ma amanovak ne,
veka amamata watan.
21 Amar ifira roak wol rafna'an,
ba Paulus ti ndiri waharira ralan ma nfalak ne,
“Did tinemun!
Ni lolin a,
na myorang ning snurak ovi lan ufalak roak verin mia ma deka taroal talik Kreta,
boma kabal a deka sian,
ovu deka tvatuk vnuat ra.
22 Ba fiang ini era lahir verin mia ma ralabira deka kako'u.
Kabal ini veka sian,
na'uk tali did tinemun,
na wol tamata isa vali veka nmata.
23 Ufalak wean inyai,
tevek indean a,
Ubu Ni sansinir isa ntali lanit ratan nsuta ma ndir-ebang ya'a.
Ubu i uraning ovu nfareta ya'a,
nsinir ia
24 ma nfalak ne,
‘Paulus,
deka bwobar!
Oa veka ti mdiri Roma rira Kaisar wahan ralan ma nfaleka inukun verin oa.
Eka mrenar,
Ubu nala Ni rala lolin a verin mia,
ma tamata ovi mimunuk na'a inobal ini veka rva'at watan.’
25 Ba wean inyai ta kida averi,
fyangrebat ralabira ra!
Tevek ya'a orang Ubu.
Ia veka nfakena lahir afa ovi nfalak roak verin ya'a.
26 Na'uk ita veka takreti nuhu isa.”
27 Nait dawan yai nfafofa ami,
ma amar vutu rahin ifa'at roak na'a tahat i naran Adria.
Ka'a bi nafafruan tenan roak,
na tamata kabal ra ranovak ne,
kabal nfaseri roak raa.
28 Ba rkeak afa aleman isa na'a kakeak a,
beti rtolar suta aletan tain ma al rsavat ne,
bilaman te kiretin.
Rsavat aletan ni bilaman a,
na refa vutrua.
Nata wol mnanat,
na rsavat ewal vali ma ni laman a refa vutu rahin ilima.
29 Ira rbobar beta ne kabal nakreti vunun,
ba relik a'ur ifa'at tali kabal ni muri a ma deka nfofa.
Ira rera ma fara yarak amar.
30 Tamata kabal ra ra'an vai isa roak mane rafla talik kabal,
ba rtolar skutyafu yai.
Ira rlabir tamata ra ma rotu ma ranovak ne,
mane rtolar a'ur ra tali kabal ni ulu a.
31 Wean inyai,
bi Paulus nfalak verin dawan suldadu yai ovu suldadu ra ne,
“Wean i tamata kabal ra rafla talik kabal ini,
na ita veka wol tda tdir-ear!”
32 Ba suldadu avyai rafat etal kakeak ra tali skutyafu yai,
ma nsuta tahat ma nfofa watan.
33 Sarseri mane amar roak,
na Paulus nasweang ira ma rafna'an,
ma nfalak ne,
“Amar vutu rahin ifa'at roak,
na byobar lalawatan ma wol mifna'an,
34 ba era verin mia ta kida averi ma eka mifna'an veki boma mingrebat,
tevek itmunuk veka tda tdir-ear!”
35 Paulus nangrihi munuk wean inyai,
beti nala roti a ma nfalak fara weninyai verin Ubu na'a waharira ralan ra.
Nata nvisul kedan ma na'an.
36 Ba irmunuk ralarira ra rangrebat ewal roak,
ma rala afamtahan ma ra'an.
37 Tamata ovi amamunuk amna'a kabal yai ratut irua vutfitu rahin inean.
38 Amafna'an munuk,
nata rvatuk gandum ra rsuta tahat ma al nfamarang kabal.
Kabal nakreti
39 Lera wol ndata obin,
na tamata kabal ra rarea roak nuhu,
na'uk wol ref nala wan yai.
Ti nata rarea lala'in isa ovu ni ngur,
ba rvolan mane rtav-teri kabal na'a inyai.
40 Ba retal vatuk a'ur ra,
ovu raruvat kakeak ovi rkeak wilin ra,
beti rfasaka lar ulu a,
boma nait nean ma kabal yarak nra ma ntavu ia.
41 Na'uk kabal yai nakreti kilun ma ni ulu wol nfangoak tia ma roak,
ba saksakan ra rfar-fefar lahir ni muri a ma nama'ar.
42 Suldadu ra rvolan mane rfedan tamata ovi rtaha roak ira,
boma deka rnanu rara ear ma rfonak ira.
43 Na'uk suldadu dawan yai inan ma Paulus nva'at,
ba nfalak teri ma deka rfedan ira.
Ia nfareta ma tamata ovi rka'a rnanu rtobur ula ira ma rnanu rara ngur.
44 Tamata ovi rban-muri ra rtobur ma rtaha kba etal te kabal van boku ma rara ngur.
Rotu wean inyai,
bi tamata ra munuk rda rdir-ear.
Tamata ra rtaha kba etal ra ma rnanu rara rdir-ear (Kisah 27:43)