Paulus nana'a nuhu isa naran Malta
1 Amda ma amdir-ear roak,
beti amka'a ne,
nuhu ini naran Malta.
2 Tamata ovi rleal nuhu yai rmarkai dalang ma rlobang ami.
Da'ut nsuta roak ovu radridin dawan,
ba rsidovuk yafu ma rera ami ma ti amafraran.
3 Paulus nasdovu aa sanan angaran boku ma nfadoku na'a yafu yai.
Aru isa ntali aa sanan avyai nma murin,
tevek ngnea da'in,
ma nkokat liman a.
4 Tamata ovi rna'a nuhu yai rsi'ik aru i naklo'i Paulus liman a,
na ka'i rsifalak afa verin ira ne,
“Ita tka'a basil ne,
tamata ini nsifedan!
Velik ne wol nmata na'a roal,
na'uk dida ubu vata i nukun tamata ra wol ntorung ma nva'at.”
Aru isa nma murin tali yafu ralan ma ti nkokat Paulus liman a (Kisah 28:3)
5 Na'uk Paulus nasmir vatuk aru yai nti yafu ralan.
Ia wol nfarnuang akataka lahir.
6 Ira rnarin ne tenan veka nbara,
te beta ne nleka ma nmata lahir.
Ira rnaban ma mnanat,
na'uk wol akataka nkena tenan a,
ba tamata avyai rira fikiran ra ratvali ewal ma rfalak ne,
ia ubu isa vali!
7 Dawan fareta* i naran Publius nfareta nuhu yai,
ni lanun sarseri ovu wan yai.
Ia ralan lolin urun ma nala ami neluk ni mangun,
ma amar itelu nsi'ik ma lolin ami na'a ni rahan.
8 Dawan fareta yai yaman a nawar ia,
ma tenan ngnea ovu ntimuri,
ba ntuba watan.
Paulus ti nsi'ik ia ma naflurut ovu nfadoku liman a na'a ia,
ma lolin ewal ia.
9 Publius yaman lolin roak ia,
ba tamata ovi rira suhut ra na'a nuhu yai rma ma Paulus notu vali ma lolin ira.
10 Ira ralang ma dawan ami,
ba ti naran amar i mane amban-talik ira ma amobal ewal a,
na rala munuk afa ovi amperlu na'a mami banbanan verin ami.
Amtali Malta mane amati Roma
11 Amna'a Malta vulan itelu,
beti amafnavul kabal lar isa i nlau inyai,
tevek radridin dawan roak.
Kabal yai ntali Aleksandria,
naran Dioskuri.*
12 Amobal nata ti amwelat kota Sirakusa,
ma amna'a inyai amar itelu.
13 Tali inyai,
na amobal ewal ma ti amaran kota Regium.
Ni ilyan ana,
nait tranan nbatar,
ba amafla watan ma amar isa ewal,
beti amaran kota Putioli.
14 Amtuan tamata ovi rorang Yesus boku na'a inyai,
na rasweang ami ma ti amlolak ira karedralan isa.
Nata amtali inyai,
na mane ambana amati Roma.
15 Tamata ovi rorang Yesus na'a Roma rarenar ne,
mane amati inyai,
ba rti ma rsa'a ami na'a ahu isa naran Apius Ni Wan i Rfedi Rfaha Afa Na'a,
beti na'a ahu isa vali naran Rahan Siwelat Itelu.
Ti ma Paulus nsi'ik ira,
na nfalak fara weninyai verin Ubu,
ma ralan a dawan ewal.
Paulus na'a kota Roma
16 Amaran Roma,
na rira fareta rtorung ma Paulus nleal rahan isa.
Suldadu isa nwanar ia na'a inyai.
17 Amar itelu nelak roak,
beti Paulus nasdovu tamata Yahudi rira dawan ovi rban-ulu verin ira na'a inyai.
Ia nfalak verin ira ne,
“Did tinemun,
velik ne wol otu sian dida tamata Yahudi ra te ubud-nusid rira adat ra,
na'uk rtaha ya'a na'a Yerusalem ma rala ya'a verin Roma rira fareta ra.
18 Ti ma fareta Roma ra rorat munuk afa tali ya'a,
na mane rfatalik ya'a,
tevek wol ning sala akataka ma rukun ya'a ma umata.
19 Na'uk Yahudi ra wol rtorung ma rfatalik ya'a,
ba wol ning linga'an liak roak ma era ma udiri Kaisar wahan ralan ma nfaleka inukun verin ya'a,
velik ne wol mane uti fareta ra ma umangadu ning tamata Yahudi ra.
20 Wean inyai,
bi era ma utuan mia ma ungrihi verin mia.
Ira rdadul ya'a,
tevek orang Raja i ntevut dida salasilan ra.
Ia Raja i Ubu ntorung roak ma nma verin tamata Israel ra.”
21 Ira rfalak ne,
“Yudea ra wol rotu surat verin ami obin ma al rfamalik oa.
Teramam-valimami ovi rtali ineri wol rfalak sian oa.
22 Na'uk inamami ma fwamalik mu inorang a ma amrenar,
tevek amka'a ne,
na'a wan inba watan tamata ra rfalak sian tamata ovi rorang Yesus rira sidovung.”
23 Ba irmunuk Paulus rfadoku amar ma rsituan ira.
Naran amar i rfadoku roak ma rsituan ira,
na dawan Yahudi rivun ira rma Paulus wan i nleal a.
Ia nair ira ma nfalyawang Ubu Ni Fareta Ralan verin ira,
tali varverak ti naran lervava.
Ia nfamalik afa ovi rtulis roak na'a Musa ni inukun ra ovu tali nabi rira kitab ra,
ma ndava ralarira ra ma rorang Yesus.
24 Tamata boku rorang afa ovi Paulus nfalak ra,
na'uk boku vali rafena ma rorang.
25 Tamata avyai wol ra'an vai isa na'a afa ovi Paulus nfalak ra.
Ira mane rdir-talik wan yai,
ba Paulus ntafal ma nfalak verin ira ne,
“Ubu Ni Roh kena lahir ma nfalak verin nabi Yesaya.
Ia nfalak verin ubud-nusid ra ne,
26 ‘Muti ma fwalak verin Yahudi ra wean ini:
Mia veka mryenar lalawatan,
na'uk wol fyan-aran ihin a.
Mia msyi'ik lalawatan,
na'uk wol mkya'a.
27 Tevek tamata ovi ralarira ra rasmotak,
ba rsibi arurira ra ovu rkubak matarira ra,
boma deka rsi'ik ovu matarira ra,
deka rarenar ovu arurira ra,
deka rfan-aran ovu ralarira ra,
ovu deka rahil ma rtalik tali rira salasilan ra,
ma rdava Ya'a i bis otu ma lolin ewal ira.’ ”*
28 Paulus ntafal ewal ma nfalak ne,
“Ba inak ma mkya'a ne,
Ubu Ni Ivar Lolin i nfamalik na'a i wean inba ma Ia nsikat tamata ra tali rira salasilan ra,
boma rira vava'at kakiwal nti roak verin tamata ovi wol Yahudi ra.
Ira veka rarenar Ivar Lolin yai ma rorang!”
[
29 Paulus nfalak munuk wean inyai,
na tamata Yahudi avyai rban-talik wan yai ma rsitaku ulurira ra na'a rira fikiran ra.]*