Raja Agripa nfalak ma Paulus nlotar tenan a
1 Agripa nfalak verin Paulus ne,
“Utorung ma mungrihi ma mlotar tenam a.”
Paulus nala liman a ma al notu faneak,
ma nfalak ne,*
2 “O raja Agripa!
Ya'a utung ma dawan,
tevek mtorung ma amar ini udiri waham ralan a,
ma ulotar tenang tali afa ovi Yahudi ra rfalak ma rmangadu ya'a.
3 Tevek oa mka'a lahir Yahudi rira adat ra,
ovu wol ra'an vai isa na'a afa boku,
ba era verin oa ta baba,
ma mtahang ralam veki ma mrenar afa ovi mane ufamalik ini.
Paulus ndiri Agripa irua Bernike waharira ralan a ma nlotar tenan (Kisah 26:2)
4 Tali ning kako'u na'a ning ahu,
* na Yahudi ra munuk rka'a roak ning vava'at a.
Ira rka'a vali ning vava'at na'a Yerusalem.
5 Ira rka'a ya'a mnanat roak,
ba wean i rtorung,
na bisma rfamalik ne,
ya'a orang Yahudi rira sidovung isa naran Farisi.
Tamata Farisi ra rorang dida agama ni inukun ra nlia tali sidovung liak ra.
6 Amar ini udiri waham ralan ma fwaleka inukun verin ya'a,
tevek orang tnorung i Ubu nala verin ubud-nusid ra.*
7 Israel ra rira arun dawan vutu rahin irua ovan-amar raraning Ubu,
tevek inar urun ma rsi'ik Ubu Ni tnorung i mane nfakena yai.
O Raja Agripa,
ya'a orang vali tnorung yai,
ba Yahudi ra rmangadu ya'a.
8 Tamata Yahudi averi,
afakinimi wol myorang ne,
Ubu nfava'at ewal tamata ovi rmata roak i?
9 Lan ana,
orang lahir ma otu afa sian rivun ma angal tamata ovi rorang Yesus i ntali Nazaret.
10 Otu lahir wean inyai na'a Yerusalem.
Yahudi rira dawan mela falurut ra rala ngrebat verin ya'a,
ma ala tamata rivun ovi rorang Yesus ma ti rna'a bu'i ralan.
Utorung vali ma rukun ira ma rmata.
11 Lan ana,
ya'a ba'i utali Yahudi rira rahan falurut isa ma uti rahan falurut liak ra,
ma uwi-uwa tamata ovi rorang Yesus.
Ukiwal ira ma rfalak sian Ubu.
Ralang a nwa'uk urun ira,
ba uti vali ahu ovi rna'a negara liak ra ma otu sian ira.”
Paulus nfamalik amar i nahil ma ntalik tali ni salasilan ra ma norang Yesus
12 “Amar isa,
na Yahudi rira dawan mela falurut ra rsinir ya'a ovu rala surat kuasa verin ya'a ma uti kota Damsyik.
13 O raja Agripa,
amar yai lera ndirlola,
na una'a linga'an i nti Damsyik.
Brian munuk,
na usi'ik lyawan isa ntali lanit,
vanan nrahi lera a,
ma nlilit lahir ya'a ovu ning kida ra,
14 ma amleka munuk amsuta lanun.
Nata urenar vai isa na'a vai Ibrani nfalak ne,
‘Saulus,
Saulus!
Afakinimi mwi-mwa Ya'a i?
Oa mangal Ya'a,
na veka mtuan susa dawan ila'a.’
15 Ba ya'a orat ne,
‘Iki Oa ta baba?’
Duila'a nfalak ne,
‘Ya'a ini Yesus i mwi-mwa a.
16 Eka bwatar ma mdiri.
Ufalyawang tenang verin oa ma ala oa meluk Ning tamata sansinir,
ma ti fwamalik verin tamata ra na'a afa ovi mrea roak tali Ya'a,
ovu afa ovi veka ufaturu verin oa na'a amar ovi veka rma ini.
17 Ya'a veka ubelat oa tali tamata Yahudi ra ovu tamata ovi wol Yahudi ra.
Ya'a veka usinir oa ma muti ma fwamalik Ning vaivatul ra verin ira.
18 Muti ma motu ma matarira ra ratvelar,
ma rahil ma rtalik tali rira vava'at i na'a dedan ralan ma rti lyawan a,
ma rafla talik nitdawan ni ngrebat a ma rti Ubu.
Rotu wean inyai,
boma rorang Ya'a ma veka a'i vatuk rira salasilan ra,
ma irmunuk tamata ovi otu roak ma rira vava'at ra rmerat urun.’
19 Ba wean inyai ta raja Agripa,
ya'a ot-orang lahir afa ovi urenar na'ut i lyawan yai ntali lanit ratan nsuta ma nlilit ya'a.*
20 Ya'a ufalak verin tamata ra ma rahil ma rtalik tali rira salasilan ra ma rorang Ubu,
ovu rfaturu na'a rira vava'at ra ne,
rahil ma rtalik roak tali rira salasilan ra.
Ufamalik afa avyai verin tamata Yahudi ra na'a Damsyik veki,
beti uti Yerusalem ma ufamalik vali.
Nata ufamalik verin ira na'a munuk propinsi Yudea.
Ti ufamalik vali verin tamata ovi wol Yahudi ra.
21 Otu wean inyai,
bi Yahudi ra rtaha ya'a na'a Rahan Dawan Falurut mane rfedan ya'a.
22 Na'uk Ubu nlobang ma dawan ya'a ma naran amar ini,
ba udiri ini ma ufamalik afa ovi uka'a ra verin tamata ra munuk,
ko'u te dawan.
Afa ovi ufalak ini wear isa watan ovu afa ovi lalan a Musa ovu nabi ra rfalak roak.
23 Ira rfalak ne,
Raja i ntevut dida salasilan ra veka ntuan sian dawan ila'a ti naran i nmata,
na'uk Ia nva'at ula Ia tali matmatan ma nfamalik Ubu Ni Ivar Lolin ma neluk lyawan verin tamata Yahudi ovu ovi wol Yahudi ra.”
24 Paulus nangrihi ma nlotar tenan obin,
na Festus netal vain a ma nafwak ne,
“Paulus,
oa fwoar roak!
Mu kaka'a dawan da'in roak ma notu ma fwoar.”
25 Paulus nfalak verin ia ne,
“O baba Festus,
ya'a wol ufoar.
Afa ovi ufalak ra kena,
ovu ungrihi wean tamata i nka'a wan.
26 O raja Agripa,
oa mka'a munuk roak afa ovi ufalak ra,
bi ubrahi ma ungrihi lahir verin oa.
Ya'a uka'a basil ne,
baba mka'a afa avyai munuk,
tevek wol rotu afa avyai na'a wan fanfonak.
27 Baba,
oa morang afa ovi lalan a,
nabi ra rtulis roak?
Ya'a uka'a roak ne,
baba oa morang vali nabi ra!”
28 Agripa nfalak verin Paulus ne,
“Deka munovak ne wol mnanat,
na mot-nala ma orang vali Yesus.”
29 Paulus nfalak ne,
“Asnga'ut te mnanat,
uflurut verin Ubu,
boma oa ovu bir tinemun i fiang ini mryenar afa ovi ufalak ini,
weabira vali ya'a,
na'uk deka rdadul mia ovu dadadul tma'an wean ya'a.”
30 Nata raja Agripa ovu Gubernur Festus irua Bernike,
ovu vali tamata liak munuk rdiri,
31 ma rban-talik wan yai,
ma rsifalak afa na'a murin.
Ira rfalak ne,
“Tamata ini wol ni sala ma tukun ia ma nmata,
te ta'abu'i ia.”
32 Agripa nfalak verin Festus ne,
“Wean i tamata ini wol nera ma Kaisar nfaleka ni vaivatul ra na'a rira ngrihi a,
na tfatalik watan ia.”