Paulus ndiri Festus wahan ralan
1 Festus nfareta propinsi Yudea amar itelu roak,
beti ntali kota Kaisarea nti Yerusalem.
2 Na'a inyai,
na Yahudi rira dawan mela falurut ra ovu Yahudi rira dawan ovi rban-ulu verin ira,
rdiri Festus wahan ralan a ma rmangadu Paulus.
3 Ira rera lablobang verin ia ma ntorung ma tamata ra rovun Paulus nma Yerusalem,
tevek ra'an vai isa roak ma rfedan ia na'a linga'an ralan.
4 Festus nfalak ne,
“Fiang ini ra'abu'i Paulus na'a Kaisarea.
Wol mnanat,
na veka uti vali ineri.
5 Ba fyalak verin bira dawan ovi rban-ulu verin mia ma rban-orang ya'a ma amati Kaisarea,
boma wean i Paulus notu sala,
na myangadu ia na'a ineri.”
6 Festus nalola ira amar iwalu te vutu,
beti newal ia nti Kaisarea.
Ni ilyan ana,
nasdovu ira na'a wan i ba'i nfaleka inukun verin tamata ra,
ma nfareta suldadu ra ma rovun Paulus ti ndiri wahan ralan a.
7 Ti ma Paulus naran wan yai,
na Yahudi ovi rtali Yerusalem rma inyai ma rdir-lilit ia ma rfasala ma dawan ia.
Na'uk wol rfaturu nala afa ovi rfalak ra ma rmangadu ia.
8 Ba Paulus nlotar tenan ma nfalak ne,
“Ya'a wol otu sala akataka ma angal Yahudi rira inukun ovi Ubu nala verin Musa,
te Yahudi rira Rahan Dawan Falurut,
ovu vali wol ufalak sian Roma rira Kaisar a.”
9 Festus inan ma nala tamata Yahudi ralarira ra,
ba norat Paulus ne,
“Oa mtorung ma muti Yerusalem ma mdiri wahang ralan a,
ma ukun oa na'a afa ovi tamata averi rfalak ra?”
10 Paulus nfalak ne,
“Baba,
fiang ini udiri wan i Kaisar ba'i nfaleka inukun verin tamata ra,
ba inovan ma fwaleka inukun verin ya'a na'a wan ini.
Baba,
mka'a urun roak ne,
wol ning sala akataka verin tamata Yahudi ra.
11 Ba wean i otu sala ma dawan ma mukun ya'a ma umata,
na utorung watan ma umata!
Afa ovi rfalak ma rmangadu ya'a wol kena lahir,
ba wol tamata isa bisma nala ya'a verin ira.
Era ma Kaisar nfaleka inukun verin ya'a watan!”
12 Nata Festus ovu ni tamata ovi rsurak ia rfamalik afa ini.
Ba ia nfalak verin Paulus ne,
“Oa mera ma Kaisar nfaleka inukun verin oa,
ba veka muti ma mdiri lahir wahan ralan a!”
Paulus ndiri raja Agripa ovu Bernike waharira ralan ra
13 Amar ifira nelak roak,
na Raja Agripa* irua uran Bernike rma Kaisarea ma rtaha Festus liman a.
14 Rira amar rivun na'a inyai,
ba Festus nfamalik Paulus ni ngrihi a verin raja Agripa.
Festus nfalak ne,
“Feliks wol nfatalik Paulus tali bu'i ralan na'ut i nsuta tali ni fareta.
15 Amar yai una'a Yerusalem,
na Yahudi rira dawan ra ovu rira dawan mela falurut ra rmangadu ia,
beti rera ma ukun ia.
16 Na'uk ufalak verin ira ne,
tamata Roma rira adat nfalak ma wol bisma rukun tamata ovi wol rlotar tenarira obin.
Tamata i rmangadu ia yai musti nma veki,
ma ndiri tamata ovi rfasala ia waharira ralan ra,
ma nlotar tenan a na'a afa ovi rfalak ma rfasala ia.
17 Naran amar i rma ini,
na wol unaban roak.
Ba ni ilyan ana,
usdovu lahir tamata ra na'a wan i ba'i ufaleka inukun verin tamata ra ma ufareta ma rovun tamata yai,
nma ndiri wahang ralan a.
18 Tamata ovi rfasala ia yai rdiri ma rfamalik ne,
afakinimi rfasala ia.
Ufikir ne,
mane rmangadu ia ma rfalak ni sian ra,
na'uk afa ovi rfalak ra wol wean afa ovi unovak ra.
19 Yahudi avyai ovu ia rsitaku ulurira na'a rira fikiran ra na'a afa boku na'a rira agama,
ovu na'a tamata isa naran Yesus.
Tamata yai nmata roak,
na'uk Paulus nta'i ila'a ma nfalak ne,
Ia nva'at ewal roak tali matmatan.
20 Ya'a wol uka'a ne,
veka ufadoku ngrihi yai wean inba,
ba orat ia ne,
veka ntorung te wahal ma nti Yerusalem ma urus ia?
21 Na'uk Paulus nafena,
ba nera ma rwanar ia na'a inyai watan,
ti naran amar i Kaisar veka nfaleka inukun verin ia.
Ba ufareta ma suldadu ra rsi'ik ma lolin ia,
ti naran i ufalak ma rovun ia nti verin Kaisar.”
22 Ba Agripa nfalak verin Festus ne,
“Ya'a inak vali ma urenar tamata yai nangrihi.”
Festus nfalak ne,
“Ilyan ki mrenar ia ta baba.”
23 Ba ni ilyan ana,
Agripa irua Bernike rma rahan sidovung dawan isa ma tamata ra ralang ma dawan ira.
Roma rira suldadu dawan ovi rban-ulu verin rira sidovung suldadu dawan ra,
ovu kota yai ni tamata dawan ra rovun irua ma rti ralan.
Nata Festus nfareta suldadu boku ma rovun Paulus nti ralan.
24 Festus nfalak ne,
“Raja Agripa ovu ita did tinemun!
Tamata Yahudi ovi rna'a ini munuk ovu ovi rna'a Yerusalem munuk,
rmangadu tamata ini ma rafwak ne,
ni lolin a nmata a'uk!
25 Wol utuan ni sala akataka ma rfedan ia,
na'uk ia nera ma ti ndiri Kaisar wahan ralan,
ba uvolan ma rovun ia nti Roma.
26 Na'uk ki utulis aka verin Kaisar,
tevek wol utuan ni sala isa vali!
Wean inyai bi ufalak ma ndiri waham ralan a ta raja Agripa,
ovu vali bir tinemun,
boma torat ma lolin ia.
Beta ne veka uka'a afa boku ma utulis surat isa.
27 Ya'a unovak ne,
wol lolin lahir ma tsinir tamata i ra'abu'i roak ia nti Kaisar,
wean i wol tfadoku afa ovi tamata ra rfalak ma rmangadu ia.”