Paulus ndiri Gubernur Feliks wahan ralan
1 Amar ilima nelak roak,
na Yahudi rira Mela Falurut Ila'a naran Ananias,
ovu dawan Yahudi boku ovu vali mela ngrihi isa naran Tertulus,
rti kota Kaisarea ma rmangadu Paulus na'a Gubernur Feliks wahan ralan a.
2 Rera Paulus ma nma,
beti Tertulus nfalak verin Feliks ne,
“Baba Gubernur,
oa dawan oa!
Na'a mu fareta a,
afa ovi motu ra rala malinan lalawatan.
Mu kaka'a dawan notu ma mami vava'at ra lolin rahi roak lan a.
3 Fara weninyai ta baba na'a afa avyai munuk,
tevek msi'ik ma lolin mam tinemun lalawatan na'a inba watan.
4 Wol mane ufafrea oa ta baba,
ba era verin oa ma fara ralam lolin al mrenar ning vaivatul etal i mane ufalak ini.
5 Amka'a lahir ne,
tamata ini notu afa sian rivun roak.
Ia suhut duan ia,
ma notu ma tamata Yahudi ra vangoa-vanga lalawatan na'a wan inba watan.
Ia ntaha vali sidovung isa naran Nazaret.
6 Nlia tali inyai,
na mane nfangra mami Rahan Dawan Falurut a,
ba amtaha ia.
[Mane amukun ia ovu mami inukun ra.
7 Na'uk suldadu dawan i nban-ulu verin Roma rira sidovung dawan suldadu isa,
nma ovu ngrebat ma nala ia tali ami.
Suldadu dawan yai naran Lisias.
8 Ia nfareta tamata ovi rmangadu Paulus ma rma ma rdiri waham ralan a.]
* Ba wean i morat ia al mdava afa ovi notu ra,
na veka mka'a munuk afa sian ovi notu ra ma amangadu ia.”
9 Yahudi ovi rna'a inyai rovu vali ma rmangadu ia,
ma rtorung afa ovi Tertulus nfalak ra.
Paulus nlotar tenan a na'a Gubernur Feliks wahan ralan a
10 Gubernur Feliks notu faneak verin Paulus ma nangrihi,
ba Paulus nfalak ne,
“Ya'a uka'a roak ne,
varat nkati varat,
na oa ba'i fwaleka inukun verin mami bangsa ini.
Wean inyai bi inak ma ulotar tenang na'a waham ralan a.
11 Baba,
oa bisma mka'a lahir ne,
wol nlia tali amar vutu rahin irua nti roak veli,
na uva'al urata Yerusalem ma uraning Ubu.
12 Tamata ovi rmangadu ya'a wol rarea ne,
usingarahi ovu tamata na'a Rahan Dawan Falurut,
te wol rarea ne,
otu ma vangoa-vanga na'a rahan falurut ra,
te na'a wan inba watan na'a kota yai ralan.
13 Tamata ovi wol rfaturu nala afa ovi rfalak ra ma rmangadu ya'a.
14 Na'uk utorung verin oa ta baba ne,
ya'a ufadawang Ubu i ubumam-nusimami ra ba'i raraning a,
ma orang Duila'a Yesus Ni Linga'an i tamata Yahudi ra rfalak ne,
wol kena.
Ya'a orang munuk Musa ni inukun ra,
ovu orang vali afa ovi nabi ra rtulis roak na'a rira kitab ra.
15 Ya'a ufaklo'i a'uk ning vava'at verin Ubu,
wean tamata ovi rdoku ini raklo'i vali rira vava'at ra verin Ia.
Ya'a orang ne,
tamata ovi rmata roak veka rva'at ewal,
velik ne rira vava'at ra rmalola,
te wol rmalola.
16 Wean inyai,
bi otu lalawatan ma ralang ila'a nmerat na'a Ubu wahan ralan a,
ovu na'a tamata waharira ralan ra.
17 Wol una'a Yerusalem varat ifira roak,
ba ewal ya'a uti ineri ma utaha kubang,
ma ulobang tamata Yahudi ovi kasian ra.
* Ya'a vali ala ning korban ra verin Ubu.
18 Amar i utaha ning korban ra uti Rahan Dawan Falurut a,
na tamata ovi rmangadu ya'a rarea ya'a.
Ya'a beti ot-orang mami adat Yahudi ma ufamerat tenang a,
* na wol ka'i tamata na'a inyai,
ovu wol vangoa-vanga akataka.
19 Na'uk Yahudi boku tali propinsi Asia rarea vali ya'a na'a inyai,
ba wean i mane rfasala te rmangadu ya'a,
na eka rma ini vali ma rdiri waham ralan a.
20 Te ni lolin a,
tamata ovi rmangadu ya'a fiang ini,
eka rfalyawang ne,
rfasala ya'a na'a aka na'ut amar i udoku Yahudi rira sidovung dawan.
21 Teran a'uk afa isa na'ut amar i udiri waharira ralan a ma ufwak ne,
‘Amar ini udiri wahabira ralan a ma ulotar tenang a,
tevek orang ne,
Ubu veka nfava'at ewal tamata ovi rmata roak.’ ”
22 Nata Feliks i nka'a ma dawan roak na'a Duila'a Yesus Ni Linga'an nfalak ne,
“Eka tnaban Lisias,
suldadu dawan i nban-ulu yai,
nma veki,
beti ufadoku ning vaivatul na'a bira ngrihi ini.”
23 Ia nfareta suldadu dawan isa ma nwanar ma lolin Paulus,
na'uk deka rdadul ia,
ovu musti rtorung watan ma ni kida ra rma ma rlobang ia.
24 Nata amar ifira nelak roak,
beti Feliks irua awan rma.
Awan a tamata Yahudi ia,
naran Drusila.
Feliks nsinir suldadu ra ma rala Paulus nma,
beti nrenar Paulus nfamalik na'a tamata rira inorang verin Yesus Kristus.
25 Paulus nfamalik na'a i wean inba ma tamata ni vava'at nmalola,
tatahang ralad na'a afa ovi sian ra,
ovu nfamalik vali amar i Ubu veka nma ma nfaleka inukun verin tamata ra munuk.
Ba Feliks nbobar roak ma nfalak ne,
“Naran roak ta Paulus.
Muti kikyai!
Wean i ning amar lean vu,
na era ewal oa.”
26 Feliks inan vali ma Paulus veka nala kubang verin ia,
boma nfatalik ia.
Ba Feliks ba'i nera ia ma irua rfamalik afa.*
27 Varat irua nelak roak,
beti Perkius Festus nkati Feliks ma nrata Gubernur.
Feliks mane nsuta roak,
ba ndava Yahudi ralarira ra ma wol nfatalik Paulus tali bu'i ralan.