1 Paulus nsi'ik nanuang tamata ovi rdoku na'a Yahudi rira sidovung dawan yai ma nfalak ne,
“Terang a valing averi!
Ralang ila'a lolin watan na'a afa ovi otu ra verin Ubu,
ma naran amar ini.”
2 Nangrihi munuk wean inyai,
na Yahudi rira Mela Falurut Ila'a i naran Ananias nfareta lahir ma tamata ovi rdir-ebang ia rfari sumarn.
3 Ba Paulus nfalak verin Mela Falurut Ila'a yai ne,
“Ubu veka nfari oa,
tevek mweang tamata ra ma fwalak afa isa,
na'uk motu afa liak!
* Oa mdoku inyai ma fwaleka inukun verin ya'a ovu Musa Ni inukun ra,
na'uk mangal inukun avyai,
tevek fwareta tamata ra ma rfari ya'a!”
4 Tamata ovi rdiri ebang Paulus rfalak ne,
“Hei,
deka fwalak sian Ubu Ni Mela Falurut Ila'a!”
5 Paulus nfalak ne,
“Did tinemun,
ya'a wol uka'a ne ia Mela Falurut Ila'a ia.
Surat Ralan nfalak ne,
‘Deka fwalak sian tamata dawan i nban-ulu verin mu tamata ra.’ ”*
6 Paulus nka'a ne,
tamata ovi rdoku sidovung dawan yai,
boku rtali sidovung isa naran Saduki,
boku vali rtali sidovung i naran Farisi,
ba nafwak ne,
“Wou,
terang a valing averi!
Ya'a tamata Farisi ya'a,
ovu ubung-nusing ra Farisi vali ira.
Mia fyaleka inukun verin ya'a na'a ini,
tevek orang ne,
Ubu veka nfava'at ewal tamata ovi rmata roak!”
7 Nfalak munuk wean inyai,
na tamata Farisi ovu Saduki ra rsitaku ulurira ra na'a rira fikiran,
ba rira sidovung dawan nama'ar na'ut irua.
8 Tamata Saduki ra rfalak ne,
tamata ovi rmata roak veka wol rva'at ewal.
Rfalak vali ne,
Ubu Ni sansinir ra tali lanit ratan ovu roh ra wol rna'a.
Na'uk Farisi ra rorang ne,
afa avyai rna'a munuk.
9 Vangoa-vanga ntafal ma dawan,
na Farisi boku ovi rair Musa ni inukun ra rdiri lahir ma rangal Saduki ra ma rfalak ne,
“Ami wol amdav-nala tamata ini ni sala!
Beta ne roh isa te Ubu Ni sansinir isa ntali lanit ratan nangrihi lahir verin ia!”
10 Vangoa-vanga ntafal ma dawan ila'a roak,
ba suldadu dawan i nban-ulu verin sidovung suldadu yai nbobar beta ne,
rsit-rsat Paulus.
Ba nfareta ni suldadu ra ma ti rala ia tali ira,
ma rovun ia rti rira markas a.
11 Ovan yai,
na Duila'a nma ma ndir-ebang Paulus ma nfalak ne,
“Ralam deka kako'u ta baba!
Fwamalik roak Ya'a na'a Yerusalem,
ba wean inyai vali veka fwamalik Ya'a na'a Roma.”
Yahudi ra rvolan ma rfedan Paulus
12 Ni ilyan varverak a,
na Yahudi boku rasdovu ira ma ra'an vai isa mane rfedan Paulus.
Ira rafwaba lahir ne,
wol rafna'an te rafnenu,
ti naran i rfedan ia.
13 Tamata ovi rasdovu ira ma rfedan Paulus,
vutfa'at rahin.
14 Ira rti ma rfalak verin Yahudi rira dawan mela falurut ra ovu Yahudi rira dawan liak ra ne,
“Ami amafwaba roak ma wol amafna'an te amafnenu lahir,
ti naran i amfedan Paulus.
15 Ba amera tali mia ovu dawan ovi rdoku Yahudi rira sidovung dawan ma myera verin suldadu dawan i nban-ulu yai,
ma novun Paulus ma ndiri wahabira ralan ra.
Fyalak ne,
inabira ma myorat ma lolin afa tali ia.
Amasusan roak tenamami ra ma amnaban watan ia ma wol nma naran ini obin,
na amfedan roak ia.”
16 Na'uk Paulus uran a,
yanan brana nrenar afa ovi rfalak ra,
ba nti suldadu rira markas a,
ma nfalak verin Paulus.
17 Ba Paulus nera suldadu dawan isa ma nfalak verin ia ne,
“Baba,
movun kasiko'u ini ti verin bira suldadu dawan i nban-ulu yai,
tevek mane nfalak afa isa verin ia.”
18 Suldadu dawan yai novun ia ti verin ni suldadu dawan i nban-ulu yai ma nfalak ne,
“Baba,
Paulus i ra'abu'i ia yai nera ma ovun kasiko'u ini nma,
tevek mane nfalak afa isa verin oa.”
19 Suldadu dawan i nban-ulu yai ntaha kasiko'u yai liman ma ti rdir-aling ira ma norat ia ne,
“Baba,
mane fwalak aka verin ya'a?”
20 Kasiko'u yai nfalak ne,
“Baba,
Yahudi ra ra'an vai isa roak ma rlabir waweang oa,
ma rera verin oa ma ilyan veka movun Paulus muti rira sidovung dawan,
boma rorat ma lolin ewal afa boku tali ia.
21 Na'uk era verin oa ma deka morang ira,
tevek tamata vutfa'at rahin rfonak roak ira mane rfedan ia.
Ira rafwaba roak ma wol rafna'an te rafnenu lahir,
ti naran i rfedan Paulus.
Fiang ini ira rnaban watan ne,
mtorung te wahal.”
22 Ba suldadu dawan i nban-ulu yai nfalak verin ia ne,
“Deka fwalak verin tamata isa vali ne,
fwamalik roak afa ini verin ya'a.”
Nata nfalak ma kasiko'u yai newal ia.
Rovun Paulus verin Gubernur Feliks
23 Nata suldadu dawan i nban-ulu yai nsinir ni suldadu dawan irua ma nfalak verin ira ne,
“Misdovu suldadu ratut irua,
ovu suldadu vutfitu ovi rarata kuda ra,
ovu vali suldadu ratut irua ovi rtaha vunut ra,
ma ovan ini ka'a bi jam sembilan,
na miti Kaisarea.
24 Myala vali kuda ifira verin Paulus,
boma msyi'ik ma lolin ia ma myovun ia ti verin Gubernur Feliks.”
25 Nata ntulis surat isa ma nala verin ira ma rtaha.
Surat yai ngoan a ne,
26 “Gubernur Feliks,
ya'a alang ma dawan oa.
Ya'a ini Klaudius Lisias,
ala salam verin oa.
27 Yahudi ra rtaha tamata ini ma sarseri mane rfedan watan ia.
Ya'a urenar roak ne,
tamata Roma ia,
ba ovun ning suldadu ra ma amala ia tali tamata ovi mane rfedan ia.
28 Ya'a inak ma uka'a ne,
rmangadu ia na'a aka,
ba ovun ia ma amati Yahudi rira sidovung dawan.
29 Urenar ne,
afa ovi rfalak ma rmangadu ia rtali rira inukun ra watan ma vair ia,
na'uk wol udav-nala ni sala ma ta'abu'i te tfedan ia.
30 Urenar vali ne,
Yahudi ra rafwaba ma rfedan ia,
ba ufareta ning tamata ra ma rovun ia ti verin oa ta baba.
Ufalak vali verin tamata ovi rmangadu ia ma rtaha ngrihi ini ti verin oa.
Ning surat a lawan watan ini.”
31 Ba ovan yai,
na suldadu avyai rot-orang afa ovi rira dawan nfareta verin ira,
ma rovun Paulus rti ahu isa naran Antipatris.
32 Ni ilyan a ma raran ahu yai,
na suldadu ovi ravul kuda ra rovun Paulus rti Kaisarea,
na ovi rban-earira rewal ira rti rira markas a na'a Yerusalem.
33 Suldadu ovi ravul kuda ra ti raran Kaisarea,
na rala lahir surat yai verin Gubernur Feliks,
ovu rovun vali Paulus verin ia.
34 Gubernur yai nbas munuk surat yai,
beti norat Paulus ne,
ntali propinsi inba.
Paulus nfalak ne,
ntali propinsi Kilikia,
35 ba ia nfalak verin Paulus ne,
“Ya'a veka urenar oa,
na'uk unaban tamata ovi rmangadu oa rma raran ini veki.”
Nata nfareta ni suldadu boku ma rsi'ik ma lolin Paulus na'a Raja Herodes ni rahan fareta dawan.