1 Paulus nfalak ne,
“Yamang,
a'ang a waring averi,
era verin bir tinemun ma mryenar kikyai ma ulotar tenang!”
2 Ti ma rarenar ne,
Paulus nala vai Ibrani,
na wol vair lahir.
Ia nfalak ne,
3 “Ya'a ini tamata Yahudi ya'a.
Rarali ya'a na'a kota Tarsus i na'a propinsi Kilikia,
na'uk dawan ya'a na'a Yerusalem.
Ning tuan guru naran Gamaliel.
Ia nair ma dawan ubud-nusid ra rira adat ovu inukun ra verin ya'a,
ba orang urun Ubu,
wean mia myorang vali Ubu.
4 Uwi-uwa tamata ovi rorang Duila'a Yesus Ni Linga'an ma ti rfedan ira.
Utaha vata-brana sileti uti ma ra'abu'i ira.
5 Yahudi rira Mela Falurut Ila'a ovu Yahudi rira dawan ovi rdoku na'a rira sidovung dawan veka rfalyawang munuk ne,
wol usiklabir.
Ira rala roak surat ra verin ya'a ma ufaturu verin tamata Yahudi ovi rna'a kota Damsyik,
ba uti ineri ma utaha tamata ovi rorang Yesus ma amama Yerusalem ma rukun ira.”
Paulus nfamalik ni banbanan a
6 “Na'ut i uti Damsyik,
na snain a lera ndirlola,
na brian munuk lyawan ntali lanit nyeba ma nfitik-nyelar lilit lahir ya'a.
7 Uleka lahir usuta lanun,
na urenar vai isa nfalak verin ya'a ne,
‘Saulus,
Saulus!
Afakinimi mwi-mwa Ya'a i?’
8 Ya'a orat ia ne,
‘Iki Oa ta Duila'a?’
Ia nfalak ne,
‘Ya'a ini tamata i mwi-mwa a,
narang Yesus utali ahu Nazaret.’
9 Tamata ovi amamunuk rarea lyawan yai,
na'uk wol rarenar vai i nangrihi verin ya'a yai.
10 Ya'a orat ewal ne,
‘Ya'a veka otu aka ta Duila'a?’
Duila'a nfalak ne,
‘Bwatar ma muti Damsyik.
Na'a ineri,
na veka lyawan verin oa na'a afa ovi veka ufalak ma motu ra.’
11 Lyawan yai notu ma wol usirea lahir,
ba ning kida ra rtaha limang ma rfabana ya'a ma amati Damsyik ralan.
12 Tamata isa naran Ananias nleal inyai.
Ia not-orang afa ovi Ubu ralan nfalak a ovu not-orang Musa ni inukun ra,
ba tamata Yahudi ovi rna'a inyai ralang ma dawan ia.
13 Ananias nma ma nsi'ik ya'a,
ovu ndir-ebang ya'a ma nfalak ne,
‘Kida Saulus,
msirea kikyai!’
Nfalak munuk,
na usirea lahir ma usi'ik ia.
14 Ia nfalak vali ne,
‘Baba,
Ubu i ubud-nusid ra ba'i raraning a,
nfili oa ma mka'a afa ovi ralan nfalak,
ma msi'ik Ia i Ni vava'at nmalola,
ovu mrenar Ni vaivatul ra.*
15 Oa veka fwamalik afa ovi mrenar ovu msi'ik ra verin tamata ra munuk.
16 Ba fiang ini mnaban aka?
Mdiri kikyai muti ma rbaptis oa.
Mera verin Duila'a ma na'i vatuk mu salasilan ra.’ ”
Ubu nsinir Paulus ma nfamalik Ni vaivatul ra verin tamata ovi wol Yahudi ra
17 “Ewal ya'a uti Yerusalem ma ti uflurut na'a Rahan Dawan Falurut,
na wean i wol uka'a wang, ma
18 urea Duila'a Yesus nfalak verin ya'a ne,
‘Bwan talik Yerusalem kikyai,
tevek tamata ovi rna'a ini wol rorang afa ovi fwamalik na'a Ya'a.’
19 Ba ufalak ne,
‘Duila'a,
ira rka'a roak ne,
lan a,
na uti Yahudi rira rahan falurut ra ma utaha ovu uvaval tamata ovi rorang Oa.
20 Amar yai rfedan Stefanus i nfamalik lalawatan Oa,
na una'a inyai.
Ya'a utorung ma rfedan ia,
ba tamata ovi mane rfedan ia raling rira ravit blawat ra ma uwanar.’
21 Na'uk Duila'a nfalak verin ya'a ne,
‘Muti watan,
tevek usinir oa ma muti wan raroa veli,
ma fwamalik Ya'a verin tamata ovi wol Yahudi ra!’ ”
22 Tamata Yahudi rarenar afa ovi Paulus nfalak ra,
ti naran i nfamalik tamata ovi wol Yahudi ra.
Ira rafwak ila'a,
tevek nfamalik tamata ovi wol Yahudi ra,
ma rfalak ne,
“Tasba vatuk tamata ini ma tfedan a'uk ia!
Wol inovan roak ma nva'at.”
23 Rafwak ila'a ma raling vatuk rira ravit blawat ra ovu rasba kyavu tia ma watan.*
24 Suldadu dawan i nban-ulu yai nfareta ni suldadu ra ma rtaha Paulus rti rira markas a.
Ira mane rasveva ia,
boma rorat al rdava ne,
afakinimi Yahudi ra rafwak ia.
25 Ira rkeak Paulus mane rasveva ia,
na nfalak verin suldadu dawan isa i ndiri inyai ne,
“Inukun ba nfalak ma misveva tamata Roma,
velik ne wol rfaleka inukun verin ia obin?”*
Paulus norat afa tali suldadu dawan isa, tevek mane rasveva ia (Kisah 22:25)
26 Suldadu dawan yai nrenar afa ovi Paulus nfalak ra,
na nti ma nfalak verin ni suldadu dawan i nban-ulu na'a rira sidovung suldadu ne,
“Tamata yai Roma ia,
ba ki motu aka?”
27 Ba suldadu dawan i nban-ulu yai ti ntuan Paulus ma norat ia ne,
“Eka fwalak verin ya'a ne,
oa tamata Roma oa?”
Paulus nfalak ne,
“Kena ta baba,
ya'a tamata Roma ya'a.”
28 Ia nfalak verin Paulus ne,
“Na'ut i mane eluk tamata Roma,
na ubahir ma dawan.”
Paulus nfalak ne,
“Na'uk rarali ya'a,
na tamata Roma roak ya'a.”
29 Suldadu ovi mane rorat afa tali ia rsuka ewal lahir ira.
Rira suldadu dawan i nban-ulu verin ira yai nanari ne Paulus wol tamata Roma ia,
ba nbobar,
tevek nsinir ma rdadul roak Paulus.
Rovun Paulus ma ti ndir-ulu na'a Yahudi rira sidovung dawan ma nlotar tenan
30 Ni ilyan ana,
suldadu dawan i nban-ulu yai inan ma nka'a basil ne,
notu afakinimi Yahudi ra rmangadu Paulus.
Ba nfalak ma raling ewal dadadul ra tali ia,
beti nfareta Yahudi rira dawan mela falurut ra ovu tamata ovi rdoku na'a rira sidovung dawan ma rasdovu ira.
Nata novun Paulus ma ti ndiri waharira ralan ra.