Paulus nti Yerusalem
1 Ami amsifalak ralamami munuk roak ovu dawan kareda ovi rtali Efesus,
beti amban-talik ira ma amavul kabal lar ma amobal amati lahir nuhu isa naran Kos.
Ni ilyan ana,
amobal amati nuhu isa vali naran Rodos.
Amobal tali inyai ma ti amaran kota Patara.
2 Amsuta tali kabal yai ma amdav-nala kabal isa vali i mane netal nti propinsi Fenisia,
ba amarata kabal yai ma amati.
3 Amrea nuhu Siprus,
na amahu ni lihir tranan ma amobal amati propinsi Siria.
Amwelat kota Tirus ma rfasuka kabal ni vnuat ra.
4 Na'a inyai,
na amsuta tali kabal ma amdav-nala tamata boku ovi rorang Yesus.
Ba amlolak ira ti naran karedralan isa.
Ubu Ni Roh nfalak verin tamata avyai ma rsurak Paulus ma deka nti Yerusalem.
5 Karedralan isa nelak roak,
beti amban-talik wan yai.
Tamata ovi rorang Yesus ovu awarir-yanarira ra rdoal ma rfaturat ami,
ba amamunuk amsangatur na'a ngur ratan ma amaflurut.
6 Amaflurut munuk,
na amsituli ami ma amarata kabal,
beti tamata avyai rewal ira rti rira rahan ra.
7 Nata amobal ewal tali Tirus ma ti amaran kota Ptolemais.
Na'a inyai,
na amsuta tali kabal ma amtuan tamata ovi rorang Yesus,
ba mami ovan isa ovu ira.
8 Ni ilyan ana,
amban-talik ira ma amobal ewal,
nata ti amaran kota Kaisarea.
Na'a inyai,
na ti amlolak tamata isa naran Filipus.
Ia nfamalik vali Ubu Ni Ivar Lolin verin tamata ra.
Tali tamata ifitu ovi kareda na'a Yerusalem nfili ira,
na ia naran na'a vali.*
9 Ia yanan vata ifa'at,
mnelat ira obin.
Nabi ira,
ba rarenar lahir tali Ubu ma ti rfamalik Ni vaivatul ra verin tamata ra.
10 Amna'a inyai amar ifira roak,
na tamata isa i nabi ia,
tali propinsi Yudea nma.
Tamata yai naran Agabus.
11 Ia nma ma ntuan ami,
ma nala Paulus ni ngesa a,
ma ka'i nkeak ean ovu liman a ma nfalak ne,
“Ubu Ni Roh nfalak ne,
tamata Yahudi ovi rna'a Yerusalem veka rkeak tamata i ni ngesa ini,
ma rala ia verin tamata ovi wol Yahudi ra.”
12 Amrenar afa i nfalak yai,
na amamunuk tamata ovi rorang Yesus tali Kaisarea amera ovu ralamami urun verin Paulus ma deka nti Yerusalem.
13 Na'uk ia nfalak ne,
“Kida averi,
notu afakinimi byakar ma myotu ma ralang lalau urun?
Utorung roak ma rkeak ya'a.
Nlia tali inyai utorung vali ma rfedan ya'a na'a Yerusalem,
tevek orang Duila'a Yesus.”
14 Paulus nafena ma nrenar afa ovi amfalak ra,
ba amtalik watan ma amfalak ne,
“Fara Duila'a nfaturu lahir afa ovi ralan nfalak verin Paulus.”
15 Amar ifira nelak roak,
na amasusan afa ovi mane amtaha ra,
ma amati Yerusalem.
16 Tamata ovi rorang Yesus tali Kaisarea,
boku rovun ami ma ti amna'a Manason ni rahan.
Ia ntali Siprus,
ovu norang Yesus mnanat roak.
Paulus nti ma ntuan Yakobus na'a Yerusalem
17 Amaran Yerusalem,
na tamata ovi rorang Yesus na'a inyai inar urun ma rala ami.
18 Ni ilyan ana,
amamunuk Paulus ti amlolak Yakobus,
* na dawan kareda ovi reluk penatua rma munuk vali.
19 Paulus nala salam verin ira,
ma nfamalik afa ovi Ubu notu na'ut i nfabana ni karya verin tamata ovi wol Yahudi ra.
20 Rarenar afa ovi Paulus nfamalik yai,
na raraning Ubu.
Nata rfalak verin ia ne,
“O kida,
eka msi'ik ma lolin,
tevek tamata Yahudi rivun ila'a rorang roak Yesus.
Irmunuk iva'urira ma rot-orang vali Musa ni inukun ra.
21 Ba rarenar roak vaivatul siklabir ovi rfalak ne,
oa mair tamata Yahudi ovi rna'a tamata ovi wol Yahudi rira nuhu ra ma deka rorang Musa ni inukun ra.
Ira rarenar ne,
mair ira ma deka rsunat yanarira ra,
ovu vali deka rorang ita tamata Yahudi dida adat.
22 Yahudi ovi rorang Yesus veka rarenar ne,
mwa roak ini,
ba ki totu aka?
23 Eka morang lahir mami snurak ra ta baba.
Tamata ifa'at ini rotu roak rira tnorung verin Ubu.
24 Movun ira ma mimunuk miti ma myot-orang ita tamata Yahudi dida adat ma fyamerat tenabira ra.
Oa ki bwahir rira varvara ra tali afa yai,
beti bisma racukur lahir rira vut ra.
* Motu wean inyai,
na tamata ra veka rka'a ne,
afa ovi rarenar tali tamata liak na'a oa wol kena,
tevek mu vava'at nfakena vali Musa ni inukun ra.
25 Tamata ovi wol Yahudi ira na'uk rorang roak Yesus,
ami amala roak surat verin ira,
ma deka ra'an afamtahan ovi rala roak verin walut ra,
deka renu te ra'an lara,
deka ra'an afwatan ovi rfungal ma rfedan ira,
ovu deka rsifa tia ma watan ovu tamata ovi wol awarira verin ira.”
26 Ba ni ilyan ana,
Paulus novun tamata ifa'at yai ma irmunuk rfamerat tenarira ra.
Nata nti Rahan Dawan Falurut ralan ma nfadoku amar ma wean i rira amar ifitu ma rfamerat munuk roak ira,
na veka rala rira korban ra lokat ira verin Ubu.
Tamata Yahudi rasweang tamata ifira ma rtaha Paulus na'a rira Rahan Dawan Falurut
27 Amar ifitu nelak roak,
na tamata Yahudi boku tali propinsi Asia rarea Paulus na'a Yahudi rira Rahan Dawan Falurut ralan,
ba rfakeri tamata rivun ralarira ra ma ti rtaha Paulus.
28 Ira rafwak ne,
“Wou tamata Israel averi,
eka mlyobang ami o!
Tamata ini nbana tia ma ma nair tamata ra munuk ma nfalak sian ita,
tamata Yahudi ra,
ovu nair afa ovi rangal dida inukun ra ovu dida Rahan Dawan Falurut ini!
Ia novun vali tamata ovi wol Yahudi ra ma rna'a dida Rahan Dawan Falurut ini,
ba rfangra lahir wan marmerat ini.”
29 Rafwak wean inyai,
tevek rarea Paulus ovu tamata Efesus isa naran Trofimus,
ba rnarin ne,
Paulus novun ia nti Rahan Dawan Falurut ralan.
30 Vangoa-vanga dawan na'a kota ralan lahir,
ba tamata ra rafla tali wan inba watan rma ma rtaha Paulus.
Rving soli-sasan ia rti murin,
ovu rfolat lahir falfolat ila'a ra na'a Rahan Dawan Falurut ni tembok dawan.
31 Mane rfedan ia,
na tamata boku ti rfalak verin suldadu dawan i nban-ulu verin Roma rira sidovung dawan suldadu isa ne,
fiang ini vangoa-vanga dawan na'a Yerusalem ralan lahir.*
32 Ba suldadu dawan i nban-ulu yai novun lahir ni suldadu ra ovu ni suldadu dawan boku,
ma rafla rti wan i vangoa-vanga yai.
Tamata rivun ovi rotu vangoa-vanga rarea suldadu dawan i nban-ulu yai ovu ni suldadu ra,
na rtalik lahir ma wol rvaval Paulus.
33 Suldadu dawan i nban-ulu yai ti ma ntaha Paulus,
beti nfareta ni suldadu ra ma rdadul ia ovu kakeak tma'an irua.
Nata norat ira ne,
“Ini tamata iki?
Ia notu afaka roak?”
34 Na'a tamata rivun avyai,
na boku rfalak wean ini,
boku rfalak wean inyai.
Ba suldadu dawan i nban-ulu yai wol nka'a ne,
inba kena te sala,
ba nfareta ni suldadu boku ma rovun Paulus rti rira markas.
35 Rovun ia ma ti raran trap i nrata markas yai,
na tamata ovi rotu ma vangoa-vanga yai ntafal ma dawan ila'a,
ba suldadu avyai rvara Paulus ma rti.
36 Tamata avyai rban-orang ira ma rafwak ne,
“Fyedan ia o!”
Suldadu ra rovun Paulus ma rti rira markas (Kisah 21:35)
Paulus nlotar tenan a
37 Suldadu ovi rtaha Paulus mane rovun ia rti rira markas ralan a,
na Paulus nfalak verin suldadu dawan i nban-ulu yai ne,
“Baba,
bis orat afa isa tali oa?”
Ia norat Paulus ne,
“Oa mka'a vai Yunani te wahal?
38 Oa ini beta ne tamata Mesir i lan ana,
notu ulun dawan ma nangal fareta?
Oa movun tamata ktufan rivun ifa'at ovi rtaha rira nahin blawat ra,
ma miti wan lean vu dawan?”
39 Paulus nfalak verin ia ne,
“Ya'a ini tamata Yahudi ya'a,
utali kota Tarsus na'a propinsi Kilikia.
Tamata rivun rka'a roak kota yai.
Era verin oa ta baba ma ungrihi kedan verin ira.”
40 Suldadu dawan i nban-ulu yai ntorung,
ba Paulus ndiri markas ni trap,
ma nala liman a ma al notu faneak ma deka vairira.
Wol vairira roak,
beti nala vai Ibrani ma nangrihi nulu ira.