No Haman doolɗiraa teddina Mordakay
6
1 Ley jemma oon, kaananke hunngii ɗaanaade. O ɗaɓɓi o waddanee dewtere kabaaruuji laamu makko. Dewtere ndeen waddaa de o janganaa nde. 2 Ley dewtere ndeen na winndaa no Mordakay faamiri de holli ko gollanooɓe kaananke, ɗum woni Bigitan e Teres doomooɓe dammbuɗe laamordu na ngondunoo e anniya warude kaananke. 3 Kaananke ƴami wi'i:— Ɗume Mordakay oon teddiniraa saabe majjum?
Gollooɓe makko njaabii mbi'i:
— O waɗanaaka faa'e.
4 Ndeen kaananke wi'i:
— Moy woni ley laamordu ɗo joonin?
Tawi wakkati oon pay, Haman yotti naati ley ɓaade ndeen, faa ŋaaro kaananke Mordakay jorfitoree leggal ngal moƴƴinani ɗum ngaal.
5 Gollanooɓe kaananke njaabii ɗum mbi'i:
— Wo Haman tan woni ɗo joonin.
Kaananke wi'i:
— O naata!
6 Haman naati. Kaananke ƴami mo wi'i:
— Ɗume kaanumi waɗande neɗɗo mo kaajaami teddinde sanne?
Haman miili ley ɓernde muuɗum wi'i: «Moy kaananke haaja teddinirde nii fu, si wanaa miin?» 7 O wi'i kaananke:
— Si nii kaananke na haajaa teddinde joomum fuu, 8 hokka ɗum kaddungal ngal kam e hoorem ɓorninoo de waɗɗina ɗum puccu ngu kam e hoorem waɗɗinoo, tawa pilkol laamu na hippii dow hoore puccu nguun. 9 Ndelle gollanooɓe ma ɓorna joomum saayo laamu ngoon, mbaɗɗinaa ɗum puccu maaɗa de naanda ɗum hakkunde galluure, na peekoo na mbi'a: «Inan no kaananke waɗanta neɗɗo mo yiɗi teddinde!»
10 Kaananke wi'i Haman:
— Yahu law kooƴowaa kaddungal ngaal e puccu nguun de ngaɗanaa Mordakay hono no mbiiruɗaa noon. Mordakay oon wo Alhuudiyanke jooɗiiɗo dammbugal laamordu oon. Taa njeggitaa fay gootum e ko mbiiɗaa imo haani waɗaneede ɗuum fuu. 11 Haman yehi, ɓornowi Mordakay saayo laamu de waɗɗini ɗum puccu nguun, o dillidi e muuɗum, o nanndi ɗum ley galluure imo feekoo imo wi'a: «Inan no kaananke waɗanta neɗɗo mo yiɗi teddinde!»
12 Caggal ɗuum, Mordakay warti dammbugal suudu laamordu. Haman du hootidi wuro muuɗum e mettorgal ɓernde, na suddi yeeso muuɗum saabe semteende. 13 O haalani tindinooɓe makko, ɗum woni deekiiko Jerees e yigiraaɓe makko ko hewtii mo, de ɓeen mbi'i mo:
— Saabe Mordakay mo puɗɗuɗaa leeƴineede yeeso muuɗum oon wo Alhuudiyanke, a waawataa ɓantude hoore maaɗa yeeso makko katin. Lamnu a heddoto aɗa leeƴi yeeso makko faa abada.
14 Ɓe timminaay haala maɓɓe de gollooɓe kaananke njottodii e henyaare faa njaara Haman weltaare Ester ndeen.