No Ester ɗaɓɓiri kaananke hisina Alhuudiyankooɓe
5
1 Nde nyalaaɗe tati ɗeen njottinoo fuu, Ester ɓornii kaddule muuɗum laamu de yehi naatowi ley galle to kaananke woni toon. Tawi kaananke na jooɗii dow jooɗorgal laamu muuɗum na hucciti dammbugal naatirgal. 2 Nde o yi'unoo Ester ley galle ɗoon fu, o ndaardi ɗum jam de o ɓantani ɗum sawru kaŋŋe ndu o tiiginoo e junngo makko. Ester ɓattii, meemi hoore sawru nduun. 3 Kaananke ƴami mo wi'i:— Ɗume waɗi, Ester? Ɗume kaajaɗaa? Mi hokkete fay feccere laamu am, si wo ɗuum woni muuyɗe maaɗa.
4 Ester jaabii wi'i:
— Si nii kaananke yardake, warda e Haman weltaare nde ngaɗanammi ɗum hannden ndeen.
5 Kaananke wi'i:
— Noddee Haman wara law faa muuyɗe Ester ngaɗee.
Noon Kaananke e Haman ngardi weltaare nde Ester waɗani ɗum'en ndeen. 6 Wakkati ɓe njarannoo cabijam ndeen, kaananke ƴami Ester wi'i:
— Ɗume njiɗuɗaa? Mi waɗante ɗum! Ɗume ŋaarotoɗaa kam? Mi hokkete ɗum, fay si wo ɗum feccere laamu am.
7 Ester jaabii wi'i:
— Ko kaajaami? Ko ŋaarotoomi? 8 Si nii wo goonga mi heɓii hinney yeeso kaananke, miɗo ŋaaro kaananke warda e Haman weltaare nde ngaɗanammi on jaango katin. Ndeen, mi hollete ko ɗum laatii.
No Haman segilorii warude Mordakay
9 Nyannde ndeen, Haman dillidi e seyo e ɓernde welnde suudu Ester toon. Ammaa nde o yottinoo dammbugal suudu laamordu fuu, o taykii ko Mordakay waldaa e anniya teddinde mo hono no heddiiɓe ngaɗirta noon. Ndeen ɓernde makko mettani ɗum sanne. 10 De fay e noon, o nanngitii, o hooti ɓaade makko. O noddi yigiraaɓe makko e deekiiko Jerees. 11 O jooɗii yeeso maɓɓe, imo mantoroo jawdi makko ɗuunndi e ɓiɓɓe makko ɗuuɗɓe e ko kaananke teddini o faa waɗi o laatii mawɗo dow tinndinooɓe e yimɓe muuɗum tedduɓe fuu. 12 O ɓeydi o wi'i:
— Wooɗi du, dee kaananke baantake kam miin tan e kaananke weltaare nde waɗani min hannden. Jaango du, wo miin tan o suɓii warda e kaananke weltaare nde o waɗanta min ndeen. 13 Ammaa ɗum fuu wo faa'e, si miɗo heddi miɗo yi'a Mordakay, Alhuudiyanke jooɗiiɗo dammbugal suudu laamordu o.
14 Jerees deekiiko e yigiraaɓe makko fuu njaabii mo mbi'i:
— Ndelle waɗu leggal jorfitorgal ngal piyanɗe 50 moƴƴinee de jaango subaka ŋaaroɗaa kaananke waɗa Mordakay oon jorfitee. Ndeen a heɓan njaadaa e mbelirka aan e kaananke weltaare mooɗon.
Ɗum fotani Haman, o waɗi leggal ngaal moƴƴinaa.