पुना स्वर्गम आनि पुना बूमि
21
1 पजा नना उंदि पूना स्वर्गम आनि उंदि पूना बूमितुन हूळतन. बारित्ते, मोदाटा स्वर्गम, मोदाटा बूमि मायम आसि होत्ता, इंका समुद्रमगुडा मन्ना हिल्ले. 2 अस्के, पेनदागटाल पवित्र सहर पूना येरुसलेम, स्वर्गमताल हिळु रेय्यानद नना हूळतन. मरमिना पेडानाहाटीं, मरमिना पेगिड बल्हा तयार आंता, अल्हा अद सहर तयार दिस्सेक मत्ता. 3 पजा राजगद्देतगटाल उंदि पेद्दा लेंग इल्हा केंजा वाता, “हूळाट, पेन इंदके मनकलोरा नड्डुम जेगा आता. अद ओरातोने मनंता. ओर दाना लोकुल्क आंतुर, अद कुद्दु ओरा पेन आसि ओरातोने मनंता. 4 अद ओरा कळ्कुना कांडेह्कुन उस्मंता. इंदकेटाल ओर्कु हामुर, दुक्काल्क, बादां, तिप्पल्क मन्नों. बारित्ते मोदाटा पोल्लें मायसोत्तां,” इंचि केंजा वाता. 5 अस्के राजगद्देपोर्रो उद्दिस मत्तोर ओर, “हुळाट! नना अन्निटवुन पूनाव कीसि वाटंतन” इंचि इत्तोर. मर्रा ओर, “इव पोल्लें सत्तेम आनि विस्वासमलायकतव आंदूं, इवुन रासा,” इंचि नाकु वेहतोर. 6 पजा मर्रा उंद मल्का नाकु इल्हा वेहतोर, “इव पोल्लें पुरागा आतां. अल्पा आनि ओमेगा ननाने आंदुन. मोदोल आनि आकिर ननाने आंदुन. दूपाते मत्तोर्कुंक नना पिस्वरता एता उटाताल एर पुक्कटते हींतन. 7 गेल्सानोर अंटुर इव अन्निटवुना वारसदार्क आंतुर. नना ओरा पेनदुन आंतन, ओर नावा मर्क-मियाह्क आंतुर. 8 गानि वेरियानोर, विस्वासम हिल्वोर, कराब कबाह्क कियानुर, हव्कानुर, बोगमतनम कियानुर, होदें कियानुर, बोम्मान मोळ्कानुर आनि आबद्दम वळ्कानुर अंटोर, गंदकमते गबा-गबा पोत्सेके मनना तळमिता सेरवुने अर्रानुर. इदु रोंडो हामुर आंद,” इंचि वेहतोर.पुना येरुसलेम सहर
9 पजा, आकिरता एडूं गंडाल्कुन एडूं वाटिने पीसि मत्ता एडूं दूतानाल उंदि दूता नहगा वासि, “हिक्के वा! नना नीकु मरमिना पेगिटुन, इत्ते गोर्रे पोरिना मुत्तोन हुप्संतन” इंचि इत्ता. 10 अस्के आ दूता, नना पवित्र आत्माते निंडिसि मन्नेंके नाकुन उंदि पेद्दा एत्तु गुट्टापोर्रो ओता. ओसि, पेनदागटाल पवित्र येरुसलेम सहर स्वर्गमताल हिळु रेय्यानदुन नाकु हूपिस्ता. 11 अद सहर पेनदा महिमाते निंडिस मत्ताहेंका दाना वेड्सि यसब इनना वेल्लेन दाराता बंडालेसीं मेर्सेक मत्ता. 12 अद सहर सुट्टु उंदि पेद्दा एत्तु गूरे मत्ता. दान्कु पन्नेंड गल्मां मत्तां. पन्नेंड गल्मानगा पन्नेंड दूतां मत्तां. आ गल्मानपोर्रो इस्राएल लोकुल्कुना पन्नेंड वंसांल्कुना पोर्रोलीं रासि मत्तां. 13 पोड्द पेय्सनहेके मूड गल्मां, पोड्द अर्रनहेके मूड गल्मां, दक्सिनतेके मूड गल्मां आनि उत्तरतेके मूड गल्मां मत्तां. 14 अद सहर सुट्टु मत्ता गुरे पन्नेंड पुनादिनपोर्रो निल्सि मत्ता. आ पन्नेंड पुनादिनपोर्रो गोर्रे पोरिना पन्नेंड प्रेरितुल्कुना पन्नेंड पोर्रोलीं रासि मत्तां. 15 नातोनि वळ्कता दूतातगा, अद सहरतुन, दाना गूरेन आनि दाना गल्मान कहालय, बंगारमता उंदि सलाकि मत्ता. 16 अद सहर चौकोनि दोहाचि मत्ता. अद सहरता पोडगु आनि दाना नेर्वु समानम मत्ता. अद बंगारमता पट्टिते सहरतुन कहता, अद सहर पोडगुने आनि नेर्वुने दग्गेर-दग्गेर 2,400 किलोमिटर मत्ता. 17 पजा आ दूता सहरता गूरेतुन कह्तस्के, आ गूरे मनकना कूटाते इत्ते दूताता कूटाते गुडा नूटा नल्पै नालूं कूटां मत्ता. 18 अद गुरे यसब इनना एक्को दराता बंडाते दोहाचि मत्ता आनि अद सहर काचुनलेसीं मेर्सना पिव्वर बंगारमते दोहचि मत्ता. 19-20 अद सहरता पूनादि, रका-रकाल्कुना एक्को दराता बंडां वाटसि दोहाचि मत्ता. मोदाटा पूनादि यसब बंडाते, रोंडो पूनादि निलमनि बंडाते, मुडो पूनादि यमुना बडांते, नालूंगो पूनादि मरकत बंडाते, हेय्युंगो पूनादि गोमेद बंडाते, हारुंगो पूनादि मानिक बंडाते, एडूंगो पूनादि पीतमनि बंडाते, एनमिदो पूनादि पेरोज बंडाते, तोम्मिदो पूनादि पुकराज बंडाते, पदो पूनादि लहसनि बंडाते, पदाकोंडो पूनादि दुम्रकांत बंडाते आनि पन्नेंडो पूनादि याकूत बंडाते दोहाचि मत्ता. 21 आ पन्नेंड गल्मां पन्नेंड मुत्त्याल्कुनतोनि तयार कीसि मत्तां. उंद-उंदि गल्मा उंद-उंदि मुत्तेमतोनि दोहाचि मत्ता. आनि सहरता हर्रि, काचुनलेसीं मेर्सना पिव्वर बंगारमते तयार कीसि मत्ता. 22 अद सहरते नाकु गुळि दिस्सा हिल्ले. बारित्ते अगाटा गुळि अन्निटकन्ना ताकतवान पेन बाबाल आनि गोर्रे पोरि आंद. 23 अद सहरते वेलगु हियालय पोड्दु, वेडसिता अव्सरम हिल्ले, बारित्ते पेनदा महिमा अगा वेलगु हींता आनि गोर्रे पोरि दाना वेळसि आंद. 24 अन्नि जातिता लोकुल्कु दाना वेडसिता वेलगुने ताकानुर आनि दुनियाता राजालोर अद सहरते ओरा पेद्दातनम पीसि वायानुर. 25 अद सहरते नर्का बस्केने आयो. अदुनहाटीं दाना गल्मां बस्केळ्क कुल्लाये मनंता. 26 अद सहरता लोप्पो अन्नि जातिना लोकुल्क ओरा पेद्दातनम आनि कदर पीसि वांतुर. 27 गोर्रे पोरिना पिस्वरता पुस्तकमते बोरा पोर्रोलीं अय्ते रासि मंतां, ओरे अद सहरते होळिया परांतुर. गानि अपवित्र लोकुल्कु, पापि कबाह्क कियानुर हिलाकोंटे आबद्दम वळ्कानुर अद सहरते होळिया पर्रुर.