पिस्वर हियना बेरेड
22
1-2 अस्के पेनदा दूता नाकु बेस साप-सुतरा मत्ता पिस्वरता एर हियना बेरेटुन हुपिस्ता. अद बेरेड पेनदा आनि गोर्रे पोरिता राजगद्देताल सुरुव आसि, अद सहरता पेद्दा हरदा नड्डुमताल पोंगसेक मनुंदु. अद बेरेटा ओड्डुंक रोंडु पक्काने पिस्वर हियना मरां मत्तां. अव मराक वर्साता हरेक महिनाते पन्नेंड तीरकुना पंडि हादसेकेन मनुंदु. हरेक जातिनुर अव मराकुना आकिने बेस आयुंदुर. 3 अद सहरते वायना रोजकुने बस्केने सापनेम मन्नो. बारित्ते अगा पेनदा आनि गोर्रे पोरिता राजगद्दे मनंता. ओरा सेवकुल्कु पेनदा सेवा किंतुर. 4 ओर ओना मोकोम हूळांतुर. ओरां कपालमपोर्रो पेनदा पोर्रोल राससि मनंता. 5 अगा हीकट बस्केने मन्नो. ओर्कु वेडसिता आयि, पोड्दुना आयि वेलगुना अव्सरम हिल्ले. बारित्ते सामि पेन बाबाले ओर्कु वेलगु हियानुर. आनि ओर बस्केळ्क राज्येम ताकसंतोर. 6 अस्के अद पेनदा दूता नातोनि, “इदवेरादाका बतल अय्ते वेहामळ जर्गता अव पोल्लें बरोसातव आनि सत्तेमताद आंदु, बविस्यवक्तालुर्कुन ताकसना सामि पेन, बव पोल्ले अय्ते बिराना जर्गानव मंता, अव सेवकुल्कुंक हुप्सानाहाटिंक ओर ओना दूतातुन लोहतोर” इंचि इत्ता.येसु किरिस्तुना मरा वायमळ
7 इवन्नि आता पजा येसु सामि, “हूळाट! नना बिरानेन वासेक मंतान. इद पुस्तकमता बविस्यवानि परकारम ताकतोरु आर्शिवादम येतंतोर” इंचि वेहतोर. 8 बोरय्ते इव पोल्ले केंजुंदुर, हूळुंदुर ओर नन्नेने योहानुन आंदुन. आनि नना बस्के अय्ते हूळतन, केंजतन अस्के नाकु हुप्सना दूताता आरादना कींतन इंचि दाना काल्कुनपोर्रो अरतन, 9 गानि अद नातोनि, “अहन कियमा! नना नि लेह्का, पेनदा कबुरतोन लेह्का आनि इद पुस्तकमते राससि मत्ता पोल्लेन परकारम ताकानोर लेह्का ननागुडा वरोर सेवकुन आंदुन. अदुनहाटीं निमे पेनदादे आरादना कीम” इंचि वेहता. 10 अद दूता मरा नातोनि, “इद पुस्तकमता बविस्यता पोल्लेन मर्ममते इरमा, बारित्ते अव पोल्लो जर्गना वेला दगेर्क एवता” इंचि इत्ता. 11 “बोरे आयि तप्पुड हर्दे ताकसेक मनानय्ते, ओर अह्ने ताकसेक मन्निर. बोरे आयि कराब अलबटने ताकसेक मनानय्ते, ओर अह्ने ताकसेक मन्निर. बोरे आयि नितिमंतुड मनानय्ते, ओर अह्ने मन्निर. बोरे आयि पवित्र मनानय्ते, ओर अह्ने पवित्र मन्निर” इंचि वेहता.
येसु किरिस्तुना विस्वासुल्कुना हाटिंक गवाइ
12 पजा येसु सामि, “हूळाट! नना बिरानेन वासेक मंतान. हरेक मनकंक ओर कीता कबाटा परकारम, ओन्कु इनाम हींतन. 13 नन्नेने अल्पा आनि ओमेगा आंदुन. इत्ते, नन्नेने मोदाटोन आनि आकरितोन आंदुन. ननाने सुरुव कियानोन आनि महानोन आंदुन.” 14 बोरय्ते ओरा कपडिं नोर्कुत्तुर ओर आसिर्वादम दोर्कतोर आंदुर. ओर्क पिस्वर हियना मराता पंडि तिनालय आनि आ गल्माताल सहरते होळियालय अदिकारम दोर्कार. 15 गानि, नय्कु नसोंटुर, होदें कियानुर, बोगमतनम कियानुर, लोकुल्कुन हव्कानुर, बोम्मन मोळ्कानुर आनि आबद्दमतुन पावरम कीसि आबद्दम वळ्कानुर ईर अन्निटुर सहरता पलातेन मनांतुर. 16 “नना येसुन आंदुन. दाविदना वंसंमतोन नन्नेने आंदुन. हक्केटा मेर्सना सुक्कातुन नन्नेने आंदुन इंचि इव पोल्लेना गवाइ कलिसियातोर्क वेहनाहाटीं नना नावा उंदि दूतातुन मिहगा लोहतान” इंचि वेहता. 17 पेनदा आत्मा आनि नवरि, “हिक्के वा” इंचि वेहांता. इव पोल्लो केंजतुर गुडा, “हिक्के वा” इंचि इनानुर. दूपा आसि मत्तोर वायिर, मनसु मत्तोर बोरे आयिर इद पिस्वर हियना एतुन पुक्कटते उन्ना वच्चु.
आकिरता पोल्लें
18 इद पुस्तकमते मनना बविस्यता बारेमता वचनाल्कु केंजता हरेक मनकंक इल्हा गट्टिगा वेहासेक मंतान गदा, ओकाला इद पुस्तकमते मत्ता पोल्लेने बतलाना जोडांचते, इद पुस्तकमते रासि मत्ता गंडेल्कु पेन बाबाल ओना पोर्रो वायागोटनुर. 19 आनि बोरे आयिर ओकाला इद पुस्तकमताल, बविस्यते जर्गना पोल्लेनाल बदाना तेंडसि वाटते, इद पुस्तकमते राससि मनना, पिस्वर हियना मरा आनि पवित्र सहरताल पेन ओना हिस्सातुन तेंडकुंता. 20 इव अन्नि पोल्लेना गवाइ हिता येसु सामि, “हो नना बिरानेन वासेक मंतन” इंचि वेहासेक मंतोर. आमीन! येसु सामि वट! 21 पेनदा अंटुर लोकुल्कुना पोर्रो येसु सामिना दया मन्निकांटि! आमीन!