देय्यमतुन 1000 वर्सांदाका पोक्काते वाटसि हियमळ
20
1 पजा उंदि दूता, स्वर्गमताल हिळु रेय्सि वायनद नना हूळतन. दानागा वेल्लेन लोत पोक्काता तालम कय्क आनि उंदि पेद्दा गोल्सु मत्ता. 2 अद देय्यम इनना आ पळाना मासुल तरासतुन पीसि वेय वर्सानाहाटीं दोहाचि वाटता. 3 अद दूता, वेरे-वेरे जातिनोर्कुन वेयि वर्सां निंडनदाका मर्रा बस्केन पसांचा मन्नि इंचि दान वेल्लेन लोत पोक्काते वाटसि बंद कीसि दानपोर्रो सिक्कां तंता. वेयि वर्सां निंडतस्के जेरासेपताहाटीं दान होळसा पिय्यार.4 अस्के राजगद्दें हूळतन. अवुनपोर्रो उद्दिस मत्तोरा कय्दे न्यायम कियाना अदिकारम हीसि मत्ता. इंका येसुना बारेमते ओरा गवाइ आनि पेनदा पोल्ले वेहताहाटीं बोरां तल्लां अय्ते कोयमळ जर्गता, बोरय्ते जिवरासितुन हिलाकोंटे दाना बोम्मातुन मोळ्का हिल्लुर आनि ओरा कपालमपोर्रो हिलाकोंटे कय्दापोर्रो दाना चिन्ह वाटकुना हिल्लुर असंटोरा आत्मान नना अगा हूळतन. ओर मर्रा जीवाते तेदतुर, तेदसि किरिस्तुनतोनि कलियसि वेयि वर्सांदाका राज्येम कीतुर. 5-6 इदे मोट्टा मोदाटा हासि मर्रा जीवाते तेदमळ आंद. कळमातोर बोरय्ते हासि मत्तुरो, ओर इव वेयि वर्सां निंडनदाका मर्रा जीवाते तेदा हिल्लुर. इल्हा मोट्टा मोदाटा मर्रा जीवाते तेदतोर बोरय्ते मत्तुरो ओर पवित्र आनि नसिबतोर आंदुर. ओरपोर्रो रोंडो हामुरता ताकत कबळ किय्यो. गानि ओर पेनदा आनि किरिस्तुना पेर्मालोर आंतुर. आसि किरिस्तुनतोनि कलियसि वेयि वर्सां राज्येम कींतुर.
देय्यमतुन तळमिते वाटमळ
7 वेय्य वर्सां आतारित्ते, अद दोहाचि मत्ता देय्यमतुन होळगिसि हियमळ जर्गार. 8 अस्के आ देय्यम पलाते वासि, बूमिपोर्रो नालूं मूलाने मनना अन्नि जातिनोर्कुन इत्ते, गोग, मागोग इनना लोकुल्कुन नडेह कीसि लडाइहाटीं जमा कींता. समुद्रमता उस्केलेसीं लेक्का परवच्चोन लोकुल्कु ओर मंतुर. 9 ओर पूरा बूमिअंता पैलांचि होत्तुर. पजा ओर पेनदा लोकुल्कुना डेरां आनि पेनदा पावरमगल्ला सहरता सुट्टु आतुर. गानि स्वर्गमताल तळमि हिळु रेय्सि ओर्कुन नासडेम कीसि पोह्ता. 10 अस्के, जिवरासितुन आनि आबद्दम कबुरतोर्कुन बगा अय्ते मुन्नेन वाटतुरो, अदे गंदकमतोनि बगा-बगा पोत्सेक मनना तडमिते, ओर्कुन नडेह कियाना देय्यमतुन वाटमळ जर्गता. अगा ओर नर्का-पिय्यलि बस्केळ्क तडमी मंटाते तनलाळसेक मनांतुर.
हासि मत्तोरा न्यायम कियमळ
11 पजा नना, उंदि तेल्ला राजगद्दे आनि दानपोर्रो उद्दिस मत्तोन हूळतन. अगा जेगा दोर्कका, बूमि, मब्बु ओना मुन्नेटाल पेय्सि वित्तुतां. 12 पजा, हासि मत्ता सिन्नाल्कुन-पेद्दाल्कुन अंटोर्कुन राजगद्देता मुन्ने नित्तिसि मत्तद नना हूळतन. पुस्तकाल्क विच्चिसि मत्तां. पजा इंकुंदि पुस्तकम विच्चुमळ जर्गता, अद पुस्तकम इत्ते पिस्वरता पुस्तकम आंद. पुस्तकाल्कुने राससि मत्ता पोल्लेनपोर्रोटाल, हासि मत्तोर कीता कबाह्कुन पीसि ओरा न्यायम कियमळ जर्गता. 13 अस्के समुद्रम, दानागा हासि मत्तोर्कुन अप्पाजेप्ता. पातालम आनि नरकम, अवुनगा हासि मत्तोर्कुन अप्पाजेप्ता. ओर कीता कबाह्कुन पीसि ओरा अंटोरा न्यायम कियमळ जर्गता. 14 पजा पातालमतुन आनि नरकमतुन तळमिता सेरवुने वाटमळ जर्गता. ई तळमिता सेरवु इत्ते रोंडो हामुर आंदु. 15 पिस्वरता पुस्तकमते बोरा-बोरा पोर्रोलीं अय्ते रासि मना हिल्लेंगों, ओर्कुन अंटोर्कुन तळमिता सेरवुने वाटमळ जर्गता.