स्वर्गमते पेनदा स्तुति
19
1 अस्के स्वर्गमते वेल्लेन मंदिलेसि पेद्दा आवाजते, “हालेलुया! मुक्ति, महिमा आनि ताकत मा पेनदा कय्देन मंता, 2 अद कियाना न्यायम सत्तेमताद आनि नितिता आंदु, बारित्ते बाबेल सहर दाना बोगमतनमता हेंदाल अद पुरा दुनियातुन कराब कीताहाटिंक पेन दान्कु सिक्सा हिसि, दाना सेवकुल्कुना नेत्तुरता बदला एतता” इनानद नना केंजतन. 3 ओर मरा उंदाम, “हालेलुया! अद सहर वेयानद पोया बस्केळ्क पेय्सेकेन मनंता” इंचि इत्तुर. 4 अस्के एनकटा इरवै नालुर पेद्दाल्क आनि आ नालुं जिवरासिं राजगद्देपोर्रो उद्दिस मत्ता पेनदा काल्कुनगा टोंगरां ऊनसि, आमीन हालेलुया! इंचि मोळ्कतुर. 5 अस्के राजगद्देताल उंदि आवाज, “पेनदा वेर्रे इर्रनुर सिन्ना- पेद्दा अंटुर ओना सेवकुल्कु मिमेट पेनदा स्तुति कीम्ट” इनानद केंजा वाता. 6 अस्के नाकु वेल्लेन मंदितालेसि आवाज, वेल्लेन एता तळाना आवाज आनि मब्बु उरुमताप आवाज केंजा वाता. अद आवाज, “हालेलुया! सामि मना पेन बाबाल वेल्लेन ताकततोर आंदुर. ओरे राज्येम ताकिचेके मंतोर. 7 गोर्रे पोरिता मरमिं आयाना मंतांग, ओनाहाटीं नवरि दाना अदे तयार आसि मंता, ते वटु मनम आनंदमते आनि कुसिते दाना स्तुति किकोम. 8 दान्क पोंडालय साप-सुतरा तेल्लाटा आनि मेर्सना मलमल कपडीं हितुर. इवु मलमलता कपडि इत्ते, पवित्र लोकुल्कुना नितिता कबाह्क आंदु” इंचि वेहानद नना केंजतन. 9 पजा पेनदा दूता नाकुन, “गोर्रे पोरिता मरमिना गाटो तिनालय केयतोर ओरे नसिबगल्लोड आंदुर. इद पेनदा सत्तेम वचन आंदु दिनु रासा” इंचि वेहता. 10 इव पोल्लों केंजता पजा, नना स्तुति कीकन इंचि आ दूतान मोळ्कालय दाना काल्कुनपोर्रो अरतन, गानि अद नाकुन, “निमे अल्हा कियमा, नना नीवा असोंटोने आनि नीवा दंटातुर विस्वासुल्कुना असोंटोन आंदुन, ननागुडा पेनदा सेवा कियानोन आंदुन. येसुना सत्तेमताद गवाइ वेहानोन आंदुन निमे पेनदुने मोळ्का.” येसुना बारेमता गवाइ इत्तेने बविस्यवानिता आत्मा आंदु.तेल्ला गुर्रमपोर्रो उदमळ
11 अस्के स्वर्गम कुल्ला आसि मत्तद हूळतन, अगा नाकु उंदि तेल्ला गुर्रम दिस्ता. दानपोर्रो उद्दिस मत्तोना पोर्रोल विस्वासमतोर आनि सत्तेमतोर आंदुर आनि ओर नितिते न्यायम कीसि लडाइ कींतोर. 12 ओना कळ्क पोत्तना तळिमतालेसिं मंतां आनि ओना तल्लापोर्रो वेल्लेन किरिटाल्कु मत्तां. ओना उंदि पोर्रोल राससि मत्ता. अद पोर्रोल ओनतप्पा बोनके तेळियो. 13 ओर नेत्तुरते मुळहाता कपडीं केरसि मत्तोर. आनि ओना पोर्रोल “पेनदा वचन” आंद. 14 आनि स्वर्गमते मनना सिपाइल्कु तेल्लाटा साप-सुतरा मलमल कपडीं केरसि, तेल्ला गुर्राल्कुनपोर्रो उद्दिस ओना पजो-पजो होंचेके मत्तुर. 15 अन्नि जातिनुरकुन हव्कनाहाटीं ओना तोडदाल उंदि वेल्लेन दार मत्ता तलवार पलाते पेय्संता. ओर ओरपोर्रो कडक राज्येम ताकसंतोर आनि ओर अन्निटकन्ना ताकतवान पेनदा होंगुना अंगुर रसमता गानगु पोक्कातुन जारांतोर. 16 ओना कपडिनपोर्रो आनि ओना तोळापोर्रो “राजालुरकन्ना राजाल आनि सामिंकन्ना सामि” इंचि पोर्रोल राससि मत्ता.
17 अस्के पोड्दुनपोर्रो उंदि दूतातुन नितसि मननद नना हूळतन. अद मब्बुन पोर्रो परियना अन्नि पिट्टेन पेद्दा आवाजते, “वट! पेनदा गाटो तिन्नालासिंक जमा आम्टु, 18 मिमेट वाते, राजालोरा हव्वि, सिपाइल्कुना हव्वि, अदिकारिल्कुना हव्वि, गुर्राल्कुना हव्वि, गुर्राल्कु ताकसानुरा हव्वि, दासुल्कुना हव्वि, दासुल्क आयवुरा हव्वि, इल्हा सिन्ना-पेद्दा अन्नि लोकुल्कुना हव्वि तिनालय मिकु दोर्कंता” इंचि इत्ता. 19 अस्के अद जिवरासि, दुनियाता राजालोर आनि ओरां सिपाइल्कु जमा आसि, गुर्रमपोर्रो उद्दिस मत्तोनतोनि आनि ओना सिपाइल्कुनतोनि लडाइ कियालय जमा आतुर. 20 पजा अद जिवरासितुन आनि आबद्दम पोल्लें वेहानोर बविस्यवक्तान दोर्का पितुर. ओरां इव इचंत्रम आता चिन्ह हेंदाले, अद जिवरासिता सिक्का तंचि मत्तुर्कुन आनि दाना बोम्मातुन मोळ्कानोर्कुन पसांचेके वाता. ईर इव्वुरकुनगुडा गंदकमते रमा-रमा पोतसेके मनना तळमिता गुंडमते जिवातेने वाटसि हितोर. 21 अद गुर्रमपोर्रो उद्दिस मत्तोन तोडदाल पेय्सता तलवारते कळमातोर्कुन हव्कीसि हियमळ जर्गता. पिटें वासि ओरा अंटोरा हव्विन पीरमेड तित्ता.