बाबेलता नासडेम
18
1 अद आता पजा नना उंदि पेनदा दूतातुन स्वर्गमताल हिळु रेय्सेक मत्तद हूळतन, आ दूताक वेल्लेने अदिकारम हीसि मत्ता. आनि दाना महिमाता वेल्गुने बूमि बय्यार आता. 2 आ दूता पेद्दा आवाजते वरगेयसि, “हिळारता, बाबेल पेद्दा सहर हिळारता अद पेद्दा सहर नासडेम आता. इंदके अगा देय्याल्क आनि दुस्ट आत्मां मनना जागा आता. अन्नि ओजवव आनि हैय्सवा पिट्टे अगा जागा पितां. 3 बारित्ते, दाना बोगमतनमता रिम्मा अन्नि देसेल्कुनोर उट्टुर. बूमिपोर्रोटा राजालोर दानतोनि बोगमतनम कीतुर, व्यवसायम कियानुर दाना बोगमतनमता दनमता हेंदाल सिरमंतुल्कु आतुर” इंचि वेहता. 4 अस्के स्वर्गमताल मरा उंदि आवाज इल्हा केंजा वाता गदा, ना लोकुल्कुनिटा दाना पापमते कलियमटु, दानपोर्रो वायना गंडाल्कु मिपोर्रो वायामन्नि इत्ते दानगटाल पलाते पेय्सट. 5 दाना पापाल्कुन पेन बाबाल मत्ति कितोर, बारित्ते दाना पापाल्क इच्चोन बेर्सता गदा अव स्वर्गमदाका एवतां 6 अद मितोनि बल्हा कितनो अल्हे मिमेटगुडा दानतोनि कीम्टु, अद कीता कबाह्कुना हेंदाल दान्कु रोंडु अंताल्कु हीम्ट. आनि बद वाटिते अय्ते अद मिकु निहाचि हिता अवटेने मिमेटगुडा रोंडु अंताल्कु निहाचि हीम्ट. 7 अद बल्हा अय्ते पेद्दिरकेमते आनि सुकमते मत्ता, अल्हेने दान्कु तिप्पल्क आनि दुक्काल्क हीम्ट. बारित्ते अद दाना मनसुल्कुने, “नना रानिन आसि मंतान, नना मुंडामोस्ता दान आयोन आनि नना बस्केने तिप्पल्कुने अर्रोन” इंचि इनकुंता. 8 अदुनहाटीं हामूर, दुक्कम, कर्वु इवन्नि तकलिपकु उंदे रोजुने दानपोर्रो वायानुं, दान न्यायम कियाना सामि पेन बाबाल वेल्लेन बलम मत्तोर आताहाटीं अदुन तळमिते बोळ्सि हिय्यानुर. 9 बूमिपोर्रो मनना बोर राजालोर अय्ते दानतोनि बोगमतनम कीसि सुकमते मत्तुर, आ राजालोर दानु वेयानद हूळसि, सतता साति तंचेके अळानुर. 10 ओर दाना तकलिपकुन हूळसि, वेरियसि वेल्लेन लक्कु होंचि नित्तिसी, “अय्यो पेद्दा सहर आनि ताकत मत्ता बाबेलतुना, उंदे गंटातलोपो निपोर्रो पेनदा सिक्सा वासि अर्ता” इंचि इनानुर.11 ई बूमिपोर्रो व्यवसायम कियानोर, अद वेय्यना सहरतुन हूळसि, इंदके ओरा सामानतुन अस्सानोर बोरे हिल्लुर इंचि अळानुर, दुक्कम कियानुर. 12-13 अव सामान बव इत्ते, बंगारम, वेंडि, हिरा, मोति, मेत्ताटा कपडीं, नेंडि पंडि रंगुना कपडीं, एर्रा रंगुना कपडि, रेसिम कपडीं, गम-गम गब्बु वायना कट्टें, एनिता पल्कुनाल तयार कीता वस्तुल्कु, एक्को किम्मतव कट्टें, कच्चि, इत्तोळ आनि बेसता बंडाता सामानकु,दालचिनिa, मसालां, ऊदू, गमा-गमा गब्बु वायना निय्कु, अंगुर कल्लु, निय्कु, मैदा, गोह्कु, गोडकु-कोंदा, एटीं- गोर्रें, गुर्राल्कु, रताल्कु, दासुल्क आनि दासुल्क आयवुरा लोकुल्कुना जिवांन अम्मुंदुर, गानि इंदकेटाल इवुन बोरे अस्सुर. 14 बव पंडि अय्ते निक पसंद मत्तां अव निहागटाल लक्कु होत्तां, निमे सुकम एतानव वस्तुल्कु नासडेम आतां. आनि नीकु अव्वु बस्केन दोर्को. 15-17 इव वस्तुल्कुन अमसि अद सहरता हेंदाल दनवंतुल्कु आता आ व्यवसायम कियानुर, दाना तिप्पल्कुन हूळसि वेरियसि लक्कु होंचि, “नेंडि पंडि रंगुना आनि एर्रा रंगुना कपडीं, बंगारम, रत्नाल्कु, मोति कळहाचि मत्ता पेद्दा सहरतुना उंदे गंटातलोपो नासडेम आसोत्तिन इंचि बादा पळसेके अळांतुर.” जहाजकु ताकसानुर, अव्टे उद्दिस होनानुर, अव्टे कबळ कियानुर आनि समुद्रमताहेंदाल कोत्तां कमांचना अंटुर दान नासडेम आयानद हूळसि लक्कु होंचि नित्तांतुर. 18 आनि अद सहरता वेयाना पोया हूळसि, “अद सहरतालेसि पेद्दा सहर बदाना मंताना” इंचि इनानुर. 19 आनि ओर वेल्लेन दुक्कमते, ओरां तल्लां पोर्रो दुब्बा वाटकुंचि, दुक्कमते, अळसेके, वरगेयसेके, “अय्यो पेद्दा सहरतुना, समुद्रमते जहाजकु मनना हरेक मनकल निहेंदाल दनवंतुल्कु आतुर. गानि उंदे गंटातलोपो पुरा नासडेम आतिन” इंचि इनालय दल्गंतुर. 20 “ए स्वर्गमते मनानोरिटा, पवित्र लोकुल्कुनिटा, प्रेरितुल्कुनिटा आनि पेनदा कबुरतोरिटा अद सहर नासडेम आताहाटीं कुसि मनांचाट, अद सहर मिकुन उल्टा ताकिस्ताहाटिं पेन दानकु बरोबर सिक्सा हीता” इंचि आ पेनदा दूता वेहता. 21 अस्के वेल्लेन बलम मत्ता उंदि पेनदा दूता, जोत्तातसोंटा पेद्दा बंडातुन तेहचि समुद्रमते पोचता आनि इल्हा इत्ता, “पेन पेद्दा सहर बाबेलतुन नासडेम कियालय इल्हे पोच्चिसि हिय्यार आनि अद बस्केने दिस्साकोंटा आयार. 22 विना नेकसानुरा, पाटा पारानुरा, सनइ नेकसानुरा आनि तूताकोम उह्कानुरा आवाज इंदकेटाल बस्केने नीवा लोप्पो केंजा वायो. निहागा वेरे-वेरे कबळ कियानुर गुडा इंदकेटाल बस्केने दिस्सुर. आनि जोत्ता नोराना आवाज गुडा नीकु केंजा वायो. 23 इंदकेटाल नीवा लोप्पो पंतेना वेळसि बस्केने दिस्सो. आनि पेगिळ-पेडाना मर्मिं आयाना सप्पुड बस्केने केंजा वायो. बारित्ते नीवा व्यवसायम दारुल्कु इद बूमिपोर्रोटा पेद्दाल्क मत्तुर आनि निमे नीवा मंत्राल्कुना हेंदाल अन्नि राज्येल्कुनोर्कुन पसांचतिन. 24 आनि निहागा बविस्यवक्तालुरा, पेनदा लोकुल्कुना आनि पेनदा सेवताहाटिंक जिवा हिता अंटोरा नेत्तुर अगा दिस्ता” इंचि वेहता.