मुरतळ आनि एर्राटा जिवरासि
17
1 अस्के गंडाल्कुना एडुं वाटिं पीसि मत्तां एडुं दूतान अव्टेटाल उंदि नाकुन, “हिक्के वा! नना नीकु वेल्लेने जल्लांन पोर्रो उद्दिस मत्ता बोगमतनम कीता दान्कु वायना सिक्सा निक हुपसंतन, 2 दानतोनि बूमिपोर्रो मनना राजालोर बोगमतनम कीतुर आनि बूमिपोर्रो मनना लोकुल्क कलदुक अलबट आताप दाना बोगमतनमते अलबट आतुर” इंचि इत्ता. 3 आनि बस्के अय्ते नना पवित्र आत्माते निंडतान, अस्के आ दूता नाकुन बय्लि जेगाते ओता. अगा पदि कोह्कु आनि एडुं तल्लां मत्ता उंदि एर्राटा जिवरासिपोर्रो उंदि मुरतळ उद्दिस मत्ताप दिस्ता. आनि आ जिवरासिता मेंदुलपोर्रो पेनदुन अपमानम कियानव पोल्लों राससि मत्तां. 4 अद मुरतळ नेंडि पंडि कलरता आनि एर्रा कलरता कपडीं केरसि मत्ता आनि अद बंगारम, एक्को दराता पुसा आनि मोति केरसि मत्ता. आनि दाना कय्दे बंगारमता वाटिं मत्ता. अद वाटिते दाना बोगमतनम आनि अद कीता पापाल्क निंडिस मत्तां. 5 आनि दाना कपालमपोर्रो, “पेद्दा बाबेल बूमिपोर्रोटा बोगमतनम कियानव आनि हयस्वा वस्तुल्कुना यावाल” इंचि मर्ममते राससि मत्ता. 6 अद मुर्तळ पेनदा लोकुल्कुना नेत्तुरतुन आनि येसु सामिना गवाइताहाटीं जीवा हीतोरा नेत्तुरतुन उंचि रिम्मा आतादान हूळसि नना इचंत्रम आतन. 7 अस्के पेनदा दूता नाकुन, “निमे इचंत्रम बारि आतिन? नना इद मुरतळता आनि अद उद्दिस मत्ता पदि कोह्कु आनि एडुं तल्लां मत्ता जिवरासिता मर्ममतुन वेहांतन, 8 निमे हूळता जिवरासि मोदाला मत्ता गानि इंदके हिल्ले, अद वेल्लेन लोत पोक्काताल पेय्सि नासडेमते अर्रार. दुनिया तयार आतागटाल बूमिपोर्रो मनानोरा पोर्रोलीं बोरां अय्ते पिस्वरता पुस्तकमते रासि हिल्लें, ओर अद जिवरासितुन हूळसि, इद मोदाला मत्ता, इंदके हिल्ले गानि मर्रा वायानद मंता इंचि इचंत्रम आयानुर. 9 इव तेळियानाहाटींक बुद्दि मंदा पिंता. अव एडुं तल्लां इत्ते, अद मुरतळ उद्दिस मत्ता एडुं गुटंग आंदु. अह्ने एडुर राजालोर आंदुर इंचिगुडा दाना अर्तम. 10 एडुर राजालोरा अव्टेटाल हेय्युर राजालोर अर्सोत्तुर, इंदके वरोर मंतोर आनि इंका वरोर इदवेरादाका वाया हिल्लोर. ओर बस्के अय्ते वांतोर अस्के ओर कोन्नि कालमताहाटिंके राज्येम कींतोर. 11 अद जिवरासि मोदाला मत्ता इंदके हिल्ले अद एनमिदो राजाल आंदु. अद एडुन अव्टेटाले उंदि आंदु अदगुडा नासडेम आंता. 12 निमे बव अय्ते पदि कोह्कु हूळति, ओर पदि राजालोर आंदुर. आ राजालोर इदवेरादाका राज्येम ताकसा हिल्लुर गानि ओर्कु आ जिवरासितोनि उंदि गंटादाका राज्येम ताकसना अदिकारम हियमळ जर्गंता. 13 ओर अंटुर उंदि मनसु आसि ओरा ताकततुन आनि अदिकारमतुन अद जिवरासिक हिंतुर. 14 ईर राजालोर गोर्रे पोरिनतोनि लडाइ कींतुर. गोर्रे पोरि सामिलुरा सामि, राजालोरा राजाल आंद, अद केयतोर्कुन, पेर्कुत्तोर्कुन आनि विस्वासम कीतोर्कुनतोनि कलियसि राजालोर्कुन गेल्संता,” इंचि इत्ता. 15 अद आता पजा दूता नातोनि, “निमे मुर्तळ उदिस मत्ता बवय्ते एता जलान हूळतिन, अव जलां इत्ते, ओर वेरे-वेरे लोकुल्क, वेरे-वेरे लोकुल्कुना गर्दि, वेरे-वेरे जातिनुर आनि वेरे-वेरे बासा वळ्कानुर आंदुर. 16 आनि निमे हूळता जिवरासि आनि दाना पदि कोह्कु, आ बोगमतनम कीता मुरताटुन हैय्सों. दान दिक्कु हिल्लाकोंटा कीसि दाना कपडीं हिलाकोंटा कींतां. दाना मेंदुलता हव्विन तिंचि, मय्तोरा मेंदुल्कुन तळमिते वाटसींतां. 17 बारित्ते पेनदा पोल्लें पुरा आयानदाका, ओर अंटुर राजालोर उंद मनसु आसि ओरा राज्येमकु जिवरासिक हियना इंचि पेने ओरा मनसुने वाटता. 18 आनि निमे हूळता मुरतळ, दुनियाता राजालोर्कुन ताकसना पेद्दा सहर आंदु” इंचि वेहता.