एडुं गंडाल्कु
16
1 अस्के गुळिताल उंदि पेद्दा आवाज आ एडुं दूतानतोनि, “होन्टु! पेनदा होंगुना अव एडुं वाटिन बूमिपोर्रो वडियसि हीम्ट” इत्तद नाकु केंजा वाता. 2 अदुनहाटीं पेनदा मोदाटा दूता होंचि, दाना वाटितुन बूमिपोर्रो वळियसीता, अस्के अद जिवरासिता निसानि मत्तोर्कु आनि बोरय्ते दाना बोम्मातुन मोळ्कुंदुर ओर्कु इरगा नोयाना लसा-लसा पुनकु आतां.3 पेनदा रोंडो दूता दाना वाटितुन समुद्रमते वडिसिता, अस्के अद समुद्रम हाता मनकलोरा नेत्तुरतालेसि आसोत्ता, आनि समुद्रमते मनानव अन्नि जिवरासि हासोत्तां.
4 पेनदा मुडो दूता दाना वाटितुन बेरेह्कुने आनि एता उटान पोर्रो वडिसिता, अस्के अव्टे मत्ता एर पुरा नेत्तुरतालेसि आसोत्ता. 5 नना एतापोर्रो अदिकारम मत्ता पेनदा दूता इल्हा इनानद केंजतन, “ए पवित्र पेनदुना निमे इंदके मनानदुन आनि मोदाला मत्तादुन आंदिन. निमे न्यायम कियाना पेनदुन, निमेने इवुन इल्हा न्यायम कीतिन. 6 बारित्ते ओर पवित्र लोकुल्कुन आनि नीवा कबुरतोर्कुन हव्कसि नेत्तुर पोंगागोटतुर. आनि निमे ओर्क उन्नालय नेत्तुर हीतिन, ओर इद लायकतोरे,” इंचि इत्ता. 7 अच्चोटेने नाकु मोक्कु हियना गद्देताल, “हे पेनबाबा सामि निमेने सर्वसक्तिमंतुन पेनदुन आंदिन, निमे कियानव न्यायम बेसतद आनि सत्तेमतद आंदु,” इल्हा आवाज केंजा वाता.
8 नालूंगो दूता दाना वाटितुन पोडदुन पोर्रो वळियता, अस्के लोकुल्कुन दाना दगळाते कर्वगोटाना अदिकारम पोळदुंक हियमळ जर्गता. 9 लोकुल्क अद दगळाताल कर्वु सोत्तुर, अस्के अव गंडाल्कुन पोर्रो अदिकारम मत्ता पेनदुन अपमानम कीतुर गानि ओर सतता पापाल्कुनाल मनसु मार्सकुन्ना हिल्लुर. आनि ओर पेनदा महिमा किया हिल्लुर.
10 पेनदा हेय्युंगो दूता दाना वाटितुन आ जिवरासिता राजगद्देपोर्रो वडिसिता. अस्के दाना राज्येमते पुरा हीकट आता. आनि लोकुल्क इव तिप्पल्कुन आगा पर्वा सतता नाल्केतुन कोर्कालय दल्गतुर. 11 ओर्क वाता तिप्पल्क, ओर्क आता पुनकुन हेंदाल स्वर्गमते मनना पेनदुन ओर अपमानम कीतुर. गानि ओर कीता पापाल्कुनाल मनसु मार्सकुना हिल्लुर.
12 पेनदा हारुंगो दूता दाना वाटितुन परात इनना पेद्दा बेरेटे वडिसिता. अस्के अद बेरेटा एर बोत्तिगा इन्कसि होत्ता, अदुनहाटीं पोड्द पेय्सना हेंदा राजालोर्कुंक हर्रि तयार आता. 13 आनि नना अद मासुल तरासता तोळदाल, आ जिवरासिता तोळदाल आनि आबद्दम पोल्लें वेहाना बविस्यवक्ताना तोळदाल पन्ने तसोंटा मूंड देय्याल्कु पलाते पेय्सानद हूळतन. 14 इव चिन्ह हुप्सनव देय्यमता आत्मा आंदु. इव आत्मा सर्वसक्तिमंतुन पेनबाबानतोनि आकिरता रोजकुने लडाइ कियानाहाटीं, दुनियाता राजालोर्कुन जमा कियालय ओरगा होंचेके मंता. 15-16 आनि अव आत्मा आ राजालोर्कुन अर-मिगदोन इनना जागातगा कल्पता. अदुनहाटीं येसु, “हूळाट नना मिहगा दोंगानलेसि वांतन, बोरय्ते तेल्विते मंचि, केर्राना कपडिन कापाळकुंतोर ओरे आसिर्वादम येतंतोर. बोरे आयिर अहन मनाकोंटे मेंदुल कुळकें दिस्सि सिग्गु वातोनलेसि आंतोर” इंचि वेहतोर.
17 पेनदा एडुंगो दूता दाना वाटितुन वडि पोर्रो वळियसीता, अस्के स्वर्गमते मनना गुळिता राजगद्देताल पेद्दा आवाजते, “बोत्तिगा आता” इत्तद केंजा वाता. 18 अस्के मब्बु मेर्सालय, गळ-गळा इंचि उरुमलय दल्गता, आनि इद बूमिपोर्रो लोकुल्क पुटतागटाल, बस्केन आया हिल्ले असोंटा पेद्दा बुकंप आता. 19 अद बुकंप आतास्के अद पेद्दा सहरता मूंड तुकळां आतां. आनि वेरे-वेरे राज्येल्कुना सहरकु हिळारता. पेन अद पेद्दा बाबेल सहरतुर्कु सिक्सा हियालय मत्ति मर्गा हिल्लोर, दाना होंगुना अंगुर कलदुन तालिते वडिसि ओर्कु उहातोर. 20 आनि दीबें अवुना जागाताल मायसोत्तां आनि गुट्टा बग्गेने दिस्साकोंटा आतां. 21 मब्बुनाल याबै किलो वजन मत्ता बर्पुना बंडां लोकुल्कुना पोर्रो अरताहाटीं लोकुल्कुंक बागा तकलिप आता. अव बंडां अरताहाटीं ओर पेनदुन अपमानम कीताप वळ्कतुर.