पेनदा होंगुने निंडता बंगारमता एडुं वाटिं
15
1 अस्के स्वर्गमते मर्रा उंदि पेद्दादि आनि इचंत्रमता चिन्ह हूळतन. अद बतल इत्ते, एडुं दूतानगा, एडुं गंडाल्कु मत्तां. अव आकिरता गंडाल्कु आंदुं. अव आता पजा पेनदा होंग सल्लारंता. 2 आनि अगा नाकु, तळमि कलियसि मत्ताप काचुनालेसि समुद्रम दिस्ता. आ समुद्रमता ओड्डुनगा बोरय्ते आ जिवरासिपोर्रो, बोम्मापोर्रो आनि दाना पोर्रोलता नंबरपोर्रो लडाइ कीसि गेल्सि मत्तुर अंटुर दिस्तुर, ओर पेन हिता नेकसानव विना पीसि नित्तिसि मत्तुर. 3 अंटुर पेनदा दासुल्क, मूसाना पाटां आनि गोर्रे पोरिना पाटां पारसेके इल्हा इंचेके मत्तुर, “ए अन्निटकन्ना एक्को ताकतता सामि पेनदुना, नीवा कबाह्क पेद्दाय आनि इचंत्रमतव आंदुं, निमे बस्केळ्क मंदना राजान आंदिन, नीवा हर्रि बेसतद आनि सत्तेमतद आंदु, 4 हे सामि सिराप निमेने पवित्र मत्तोन आंदिन, निक वेरियवा बोर मंदा परांतोर? नीवा पोर्रोलता पेद्दातनम कियवा बोर मंदा परांतोर?नीवा न्यायमता कबाह्क दिस्तां अदुनहाटीं अंटुर वासि नीवा आरादना किंतुर”.5 अद आता पजा नना, स्वर्गमते गवाइता डेराता गुळितुन कोलांचि मत्तदुन हूळतन. 6 आ गुळिताल एडुं दूतां एडुं गंडाल्कुन पीसि पलाते पेय्सतां, अवु साप- सुतरा आनि मेर्सना कपडीं केरसि मत्तां. आनि अवुना सातिक बंगारमता पट्टा दोहाचि मत्तां. 7 अस्के स्वर्गमते मनानव अव नालुं जिवरासिन अव्टेटाल उंदि, अव एडुं दूतांक, एडुं बंगारमता वाटिं हिता आनि अव वाटिने बस्केळ्क जीवाते मंदना पेनदा होंग निंडिस मत्ता. 8 अस्के अद पुरा गुळि पेनदा महिमा आनि बलमता पोयाते निंडिस होत्ता. आनि आ एडुं दूताना अव एडुं गंडाल्कु पुरा आयानदाका अद गुळि लोप्पो बोरे नेंगा पर्राहिल्लुर.