गोर्रे पोरि आनि 1, 44,000 लोकुल्क
14
1 मरा नना सियोन इनना गुट्टापोर्रो पेनदा गोर्रे पोरितुन नितसि मत्तद हूळतन. अगा दानतोनि उंदि लक्सा नल्पै नालु वेय्कुना (1, 44,000) मंदि मत्तुर. ओरां कपालमपोर्रो गोर्रे पोरिना आनि दाना बाबाना पोर्रोल राससि मत्तां 2 नना स्वर्गमताल उंदि इसोंटा आवाज केंजतन, अद पोंगाना एता वेल्लेन वर्दानालेसिं आनि बागा मब्बु उरुमनालेसिं मत्ता. अद आवाज विना नेकिसते बल्हा केंजा वांतनो अल्हे आवाज केंजा वासेक मत्ता. 3 ओर उंदि लाक नल्पै नालुं वेय्कुना मंदि राजगद्देता मुन्ने, नालुं जिवरासिना मुन्ने आनि पेद्दाल्कुना मुन्ने पूना पाटा पारसेके मत्तुर. ईर्क तप्पा बोरे अद पाटातुन करिया पर्राहिल्लुर. पेन कर्स हीसि ईर्कुन दुनियाताल पिस्सागोटता. 4 ईर अंता मर्मिंग आयवुर आनि मुर्ताह्कुनाल लक्कु मंचि सततुन पवित्र इरतुर आंदुर. गोर्रे पोरि बगा-बगा अय्ते होनुंदु ईर अंटुर दाना पजो-पजो होनानुर आंदुर. ईर अंटोर्कुन लोकुल्कुनाल पेनदाहाटिंक आनि गोर्रे पोरिताहाटिंक मोदाटा पलम आयानाहाटीं पिस्सा गोटुसतुर आंदुर. 5 ईर अंटुर आबद्दम पोल्लों वळ्कानुर आयुर आनि बेकसुर मत्तुर आंदुर.मूंड दूताना आदेस
6 अद आता पजो नना मरा उंदि पेनदा दूतातुन मब्बुना नड्डुमताल परियसेक मननद हूळतन, दानागा बूमिपोर्रो मनना हरेक राज्येमतोर्क, हरेक वंसंमतोर्क, वेरे-वेरे बासा वळ्कानोर्क आनि वेरे-वेरे जातिनोर्क वेहालय बस्केळ्क पिस्सना पिस्वरता बेसता कबुरकु मत्तां. 7 अद दूता पेद्दा आवाजते, “पेनदा न्यायम कियाना वेला दगेर्क एवता. अदुनहाटीं दानकु वेरियटु, दाना महिमा कीम्टु. स्वर्गमतुन, बूमितुन, समुद्रमतुन आनि एता उटान तयार कीता पेनदा आरादना कीम्टु” इंचि इत्ता. 8 अद आता पजा इंकुंदि दूता वासि, “नासडेम आता, नासडेम आता, पेद्दा बाबेल सहर नासडेम आता, अद अन्नि जातिनोर्कुंक दाना बोगमतनमता होंग वायानसोंटा कल्लु उह्ता” इंचि इत्ता. 9-10 इवुना पजा इंकुंदि मूडोवा दूता वासि, “बोरे आयिर अद जिवरासितुन आनि दाना बोम्मातुन मोळ्कसि, ओना कपालमपोर्रो आयि हिलाकुंटे कय पोर्रो आयि दाना चिन्हाता सिक्का वाटकुत्ते, ओर पेनदा होंगुना पिव्वर कल्लु तालिते वळियसि मंता. अद ओनकु उन्ना पींता आनि पवित्र दूतान मुन्ने, गोर्रे पोरिन मुन्ने रमा-रमा पोत्तना तळमिते आनि गंदकमते सिक्सा आयार. 11 अल्हा ओर वेयानेंके पेय्साना पोया बस्केळ्क पोर्रो तेदसेकेन मनंता. बोरय्ते आ जिवरासितुन आनि दाना बोम्मातुन मोळ्कंतुर, दाना पोर्रोलता चिन्हाता सिक्का वाटकुंतुर ओर नर्का-पिय्यल तकलिपतेने मनंतुर,” इंचि इत्ता. 12 अदुनहाटीं पेनदा आदेस परकारम ताकानुर आनि येसु सामिना पोर्रो विस्वासम कियानुर ओर तिप्पल्कुने ओप्के पियमळे गावाले. 13 अस्के स्वर्गमताल उंदि आवाज, “इल्हा रासा, बोरय्ते सामिन विस्वासम कीसि हातुर, ओर इंदके नसिबतोर आंदुर,” इंचि नाक केंजा वाता. “हो! निजमे, ओरा कस्टमताल ओर्क आराम दोर्कंता. ओर कीता कबाह्क ओरा पज्जोने दांतां,” इंचि आत्मा इत्तद केंजा वाता.
बूमिपोर्रोटा पंटातुन कोयमळ
14 बस्के अय्ते नना हूळतन, नाक तेल्ला मब्बु दिसता. आ मब्बुनपोर्रो मनकना मर्रिनलेसि वरोर उद्दिस मत्तोर. ओना तल्लापोर्रो बंगारमता किरिटम आनि ओना कय्दे वेल्लेन दार मत्ता उंदि हेटेळ मत्ता. 15 इंका उंदि दूता पेनदा गुळिताल पेय्सि, मब्बुतेर्पेपोर्रो उद्दिस मत्तोन, “बूमिपोर्रोटा पंटा कोताक वासि अदुन कोय्याना वेला एवता अदुनहाटीं निमे नीवा हेटेटे अद पंटातुन कोय्या” इंचि जोरसे वेहाता. 16 अस्के तेल्ला मब्बुनपोर्रो उद्दिस मनानोर ओना हेटेळ तिरहातोर, आनि बूमिपोर्रोटा पंटातुन कोयमळ जर्गता. 17 अस्के पेनदा मरा उंदि दूता स्वर्गमते मनना गुळिताल पेय्सता. दानागा गुडा वेल्लेन दार मत्ता हेटेळ मत्ता. 18 अस्के गद्देताल मरा उंदि पेनदा दूता वाता. अद दूताक तळमिता अदिकारम हिसि मत्ता. अद वेल्ले दार मत्तां हेटेळ पीसि मत्तोनु पेद्दा आवाजते, “बूमिपोर्रो मनना अंगुर पंडिना पंटा पंडता अदुनहाटीं नीवा वेल्ले दार मत्ता हेटेटे अंगुर गुत्तिं कोय्या” इंचि इत्ता. 19 अस्के आ दूता दाना हेटेटे, बूमिपोर्रोटा अंगुर पंडिना गुत्तिं कोय्सि, पेनदा होंगुना अंगुर वेल्लेने पेद्दाद गानगु पोक्काते वाटसि हिता. 20 आनि सहरता पलाते मत्ता गानगुतगा गानगु पियमळ जर्गता अद गानगुताल नेत्तुर पोर्रो वाता. अद नेत्तुर इच्चोर पेय्सता गदा, अद गुर्राल्कुना मोसोटुन दोहाना पट्टानच्चोर एत्तु आनि मूंड नुह्कुना किलोमिटर पोंगसेक होत्ता.