समुद्रमताल रोंडु जिवरासि पेसमळ
13
1 पजा नना उंदि जिवरासि समुद्रमताल पेय्सानद हूळतन, दानकु पदि कोह्कु आनि एडुं तल्लां मत्तां. अव कोह्कुनपोर्रो पदि किरिटाल्कु मत्तां आनि दाना तल्लांनपोर्रो पेनदुन अपमानम कियानव पोर्रोलीं राससि मत्तां. 2 नना हूळता जिवरासि चितालेसिं मत्ता, दाना काल्क एडजुना काल्कुनालेसिं मत्तां आनि दाना तोड्डि सिंहमता तोड्डिलेसिं मत्ता. अदुंक, मासुल तरास दाना ताकत, दाना राजगद्दे आनि पेद्दा अदिकारम हीता. 3 अद जिवरासिता एडुं तल्लान अव्टेटाल उंदि तल्लाक हायानसोंटा देब्बा दल्गिसि पुन्नु आसि मत्ता, गानि अद पुन्नु बेस आतद हूळसि, दुनियातोर अंटुर इचंत्रम आसि जिवरासि पज्जो होनालय दल्गतुर. 4 अद जिवरासिक मासुल तरास अदिकारम हिता हाटिंक अन्निटुर मासुल तरासतुन मोळ्कालय दल्गतुर. आनि ओर, “अद जिवरासितलेसि बोरन्ना मंतुरा? दानतोनि बोरन्ना लडाइ किया पर्रांतुरा?” इंचि अद जिवरासितुनगुळा मोळ्कालय दल्गतुर. 5 अद जिवरासि पेद्दिरकेमते वळ्कालय आनि अपमानम कियाना पोल्लें वळ्कालय पेन दानकु नल्पै रोंडु नेल्लांदाका अदिकारम हीता. 6 पजा अद जिवरासि, पेनदुन, दाना पोर्रोलतुन, दाना जागातुन, अल्हेने दानतोनि स्वर्गमते मनानोर्कुनगुडा अपमानम कियालय दल्गता. 7 आनि दान्कु पवित्र लोकुल्कुनतोनि लडाइ कीसि ओर्कुन गेल्सानद अदिकारम हियमळ जर्गता. इच्चोने आय्का दान्कु हरेक वंसंमता, हरेक बासाता आनि हरेक जातिता लोकुल्कुनपोर्रो अदिकारम हियमळ जर्गता. 8 बूमि पोर्रो मनना अंटुर इद दुनिया तयार आता अगटाल, बोरा पोर्रोल्क अते, मोक्कु आता गोर्रे पोरिता पिस्वरता पुस्तकमते हिल्लेंगो, ओर अद जिवरासितुन मोळ्कांतुर. 9 बोर्क अय्ते केव्क मंता ओर बेस केंजिरकांटि. 10 बोनय्ते जेलने वाटमळ मत्तानो, ओन जेलने वाटमळ जर्गार. बोरय्ते तलवारते हव्कंतोर, ओनगुडा तलवारते हव्कमळ जर्गार. अदुनहाटीं पेनदा लोकुल्क ओप्केते आनि विस्वासमते मनमळ गावाले.बूमिताल पलाते तेंडता जिवरासि
11 पजा नना मरा उंदि जिवरासितुन बूमि लोप्पोटाल पोर्रो वायानद हूळतन, दान्कु गोर्रे पोरिनलेसिं रोंडु कोह्कु मत्तां. आनि अद मासुल तरासतालेसि वळ्कसेक मत्ता. 12 इद जिवरासि, हायानसोंटा देब्बा दल्गिसि बेस आता मोदाटा जिवरासिता पुरा अदिकारम दाना मुन्नेने वाळकुंचि कबळ कियुंदु आनि बूमिपोर्रो मनना अंटोर्कुन आ मोदाटा जिवरासितुन मोळ्कानाल कियुंदु. 13 अल्हेने लोकुल्कु हूळानेंकेन स्वर्गमताल बूमिपोर्रो तळमि अरहुंदु, इल्हा अराहचि अद पेद्दा-पेद्दा चिन्हां हूप्सुंदु. 14 मोदाटा जिवरासिता मुन्ने इद जिवरासिक चिन्हां हूप्साना अदिकार दोर्कता, अदुनहाटीं चिन्हां हूपिचेके बूमिपोर्रो मनना लोकुल्कुन, “बद जिवरासिक अय्ते हायानसोंटा देब्बा दल्गिसि मत्ता, अद जीवाते मंता अदुना बोम्मा कीम्टु,” इंचि बोंकिचुंदु. 15 इदुंकु, मोदाटा जिवरासिता बोम्मा वळ्कागोम इंचि बोम्माते जीवोत्रम वाटानद, आनि अदुन बोरय्ते मोळ्कुर, ओर अंटुर्कुन हव्कना अदिकार हियमळ जर्गता. 16 अचोने आयाका अद, सिन्नुर-पेद्दुर, सिरमंत- गरिब, दासुल्क आयवोर, दासुल्क ईर अंटुर्कुन ओरा तिना कय्दे पोर्रो हिलाकुंटे कपालमपोर्रो उंदि-उंदि सिक्का वाटागोटता. 17 अद सिक्का इत्ते जिवरासिता पोर्रोल हिलाकोंटे दाना उंदि नंबर आंद. इल्हा सिक्का बोर्क अय्ते मन्नो ओनकु बतले अम्मावायो आनि एतावायो. 18 इद पोल्ले तेळियगोम इत्ते बुद्दि गावाले. बुद्दि मत्ता मनकल जिवरासिना लेक्का कियिरकांटी. अद लेक्का वरोर मनकन हुप्संता आनि अद हारुं नुह्कुना अरवै हारुं आंदु (666).