मुरतळ आनि उंदि पेद्दा मासुल तरास
12
1 अद आता पजा, स्वर्गमते नाकु उंदि पेद्दा चिन्ह दिस्ता. अद बतल इत्ते, उंदि मुरतळ पोडदुन कप्पिडलेसीं पोंडसि मत्ता. दाना काल्कुना हिळु वेळसि आनि तल्लापोर्रो बारे पन्नेंड सुक्काना किरिटम मत्ता. 2 अद मुरतळ पीटे मत्ता आनि आ मुरतटा एर पुराना वेला वासि मत्ता हाटिंक अद नोप्पिने तनलाळसेक मत्ता. 3 पजा स्वर्गमते नाकु इंकुंदि चिन्ह दिस्ता. अद बतल इत्ते, उंदि एर्राटा पेद्दा मासुल तरास मत्ता. दानकु एडूं तल्लां, पदि कोह्कु मत्ता. एडूं तल्लानपोर्रो एडूं किरिटाल्कु मत्तां. 4 अद तरास दाना तोकाते, मब्बुने मनना सुक्काना मूड बागाल्कुनाल उंदि बागम सुक्कान इग्गिस बूमिपोर्रो अराहता. एर पूरालय आसि मत्ता मुरतळ, एर पूरतारित्ते, दाना पेळान मिंगनाहाटीं आ तरास, मुरतटा मुन्ने होंचि नित्तिसि मत्ता. 5 अद मुरतळ वरोर मर्रिन कंता. ओर अन्नि राज्येल्कुनपोर्रो कच्चिता सलाकिलेसीं कडक राज्येम कियानोर मत्तोर. गानि आ पेळान पेनदागा, दाना राजगद्देतगा ओयमळ जर्गता. 6 अस्के अद मुरतळ बय्लि जेगातेके वित्तुता. अगा दानाहाटीं, पंन्नेड नुह्कुना अरवै रोजकुनदाका बेस हूळकुननाहाटीं पेन जेगा तयार कीसि मत्ता.मासुल तरासतुन स्वर्गमताल पलाते गेदुममळ
7 पजा स्वर्गमते उंदि लडाइ आता. पेनदा मिकायेल इनना दूता, दाना दंटा दूतान पीसोंचि, मासुल तरास आनि दाना दूतानतोनि लडाइ कीता. अस्के मासुल तरासगुडा दाना दूतान पीसि मिकायेलुनतोनि लडाइ कीता. 8 गानि मासुल तरास, दाना दूतां लडाइ गेल्सा परा हिल्लें. अदुनहाटीं स्वर्गमते मनालय अवुंक जेगा दोर्का हिल्ले. 9 पजा अद मासुल तरासतुन आनि दाना दूतान बूमिपोर्रो दोब्सियमळ जर्गता. अद तरास दाना दूतानतोनि कलियसि पूरा दुनियातुन पसांचेके मंता. इद मासुल तरासुन पडाना तरास, हिलाकुंटे पसांचनदु, हिलाकुंटे देय्यम इंचि इंतुर. 10 पजा स्वर्गमताल उंदि पेद्दा लेंग केंजा वाता. अद इल्हा मत्ता, “मा पेनदा मुन्ने मावा विस्वासि दादालोर-अक्काह्कुनपोर्रो नर्का-पिय्यलि बस्केळ्क दोसेम दोस्सेके मनानदुन हिळु बूमिपोर्रो दोब्सियमळ जर्गता. अदुनहाटीं पेन मनाकु हियना मुक्ति, पेनदा ताकत, दाना राज्येम आनि दाना किरिस्तुना अदिकारम पलाते अर्ता. 11 मावा विस्वासि दादालोर-अक्काह्कुनिटा, गोर्रे पोरिना नेत्तुरता हेंदाल, ओर वेहता गवाइ पोल्लेनहेंदाल देय्यमतुन गेल्सतुर. ओर्कु हामुर वायना गानि ओर ओरा जीवाता पर्वा किया हिल्लुर. 12 अदुनहाटीं स्वर्गम आनि स्वर्गमते मनानोरिटा मिमेट कुसिते मंटु. गानि बूमिपोर्रो आनि समुद्रमते मनानोर्क मात्रम बच्चोन गोसा वायार! बारित्ते देय्यमतगा वेल्ले टाइम हिल्ले इंचि दान्कु तेळियसे मंता, अदुनहाटीं अद वेल्लेन होंगुने मिहगा वाता,” इंचि केंजा वाता.
मुरताटुन तिप्पल्क कियमळ
13 बस्के अय्ते अद तरासतुन बूमिपोर्रो दोब्सीतुर, अस्के अद तरास आ पेळान कंता मुर्ताटुन परेसान कियालय दान पज्जो दल्गता. 14 गानि दानाहाटीं पेन तयार कीसि इरता जेगातगळ्क, अद तरासुनाल तप्पिच्कुंचि परियिसि होनालय पेन दानकु गद्दल रेक्कानसोंटव रोंडु रेक्कां हीता. दानहेंदाल मूडुननरा वर्सनदाका अद मुरतटुन बेस हूळकुन्मळ जर्गता. 15 आ मुरतळ कम्मुटे पोंगिस होनना इंचि तरास दाना तोळदाल बेरेडतालेसीं एर पेचाह्ता. 16 गानि बूमि आ मुरतळ्क सहायम कीता, तरास तेंडता एतुन अद मिंगसि वाटता. 17 इदुनहेंदाल तरासुंक मुरतळ पोर्रो बागा होंग वाता. अस्के तरास आ मुरतटा वंसंमतोर्कतोनि, पेन वेहताप ताकानुरतोनि आनि येसुना गवाइ वेहानोर्कतोनि लडाइ कियालय होत्ता. 18 पजा अद तरास समुद्रमता उस्के पोर्रो होंचि नित्तुता.