पेन मना बाबल आंदुर
12
1 इचोन मंदिता गवाइं, मब्बुनालेसीं मना सुट्टु आताप मंतां. अदुनहाटीं पेन मनाकु हूपिस्ता हरदे दैरनेमते वितकोम. वितनेंके मना हरदुक अड्डम वायाना हरेक मोतातुन आनि अल्कगा पट्टुने अराह्ना पापमतुन होळसिसि, ओप्केते वितकोम. 2 वितनेंके मना नदर येसुनपोर्रेन इरकोम. मना लोप्पो बरोसातुन पुट्टिचानोर आनि दान पुरागा कियानोर ओरे आंदुर. मुन्ने दोर्काना आनंदमहाटीं येसु क्रुसुनपोर्रो जीवा हियालयगुडा तयार आतोर. अगा ओन्कु जर्गता अपमानमतुनगुडा लेक्का किया हिल्लोर. इंदके ओर पेनदा राजगद्देपोर्रो तिना बाजुंक उद्दिस मंतोर.a3 पापि लोकुल्क ओना पोर्रोटा पगाते ओन बच्चोनो तिप्पल्क-बादां कीतुर. इंचि मिमेट ओना बारेमते विचार कीम्टु, गानि मिमेट दैरनेम होळसि बरोसाताल पजोळ्क आयामन्नि इंचि ओर मीहाटीं अवन्नि ओर्सकुत्तोर.
4 मिमेट पापमतोनि लळांच्नेंके, उंदि पोल्ले मति इर्राना. अद बतल इत्ते, येसु बल्हा ओना जीवातुन हीतोर, अल्हा मीकु मीवा नेत्तुर पोंगागोट्टाना अवसरम अर्रा हिल्ले. 5-6 मीकुन अंटोर्कुन मर्क-मियाह्क इन्कुंचि, मीकु दैरनेम हियानाहाटीं पेन मीकु वेहता आ पोल्लेतुन पुरागेन मति मरुंग्तिरा?
“नावा मर्रिना, पेन हीता टेरनिंगतुन, मामुल पोल्ले इन्कुन्मा.
पेन नीकुन सुद्रांचनस्के, निमे दैरनेम होळ्समा,
बारित्ते, पेन बोन अय्ते पावरम कींतानो ओन्कु टेरनिंगगुडा हींता.
अचोने आयका, अद बोन अय्ते मर्रि इंचि इंतानो, ओन्कु सिक्सागुडा हींता,”
इंचि रासतद मंता.b
7 पेन मीकुन दाना मर्क-मियाह्कुनलेसीं हूळंता. अदुनहाटीं मीकु बस्के अय्ते तिप्पल्क वांतां, अस्के पेन मीकुन सुद्रांचनाहाटीं टेरनिंग हीसंता इंचि अदुन ओर्सकुंटु. बारित्ते मर्रि सुद्रांचनाहाटीं ओन्कु टेरनिंग हियवोर बोरन्ना बाबो मनंतोरा? 8 पेन दाना अंटोर मर्क-मियाह्कुन सुद्रांचनाहाटीं टेरनिंग हींता. आ टेरनिंगगिंटा मीकु दोर्काकोंटे, मिमेट दाना निजम मर्क आयिर. 9 मनाकुन पुटिस्ता मना बाबुर्क अय्ते मनम सुद्रांचनाहाटीं टेरनिंग हीतुर. अदुनहाटीं मनम ओरा कदरगुडा इरतोम. अय्ते मनम बस्केळ्क पिस्सि मननाहाटीं, मना आत्मांकु बाबो आता पेनदुक मनम बच्चोन वेल्ले लोंगिस मत्ते बेस? विचारम कीम्टु. 10 मनाकुन पुटिस्ता बाबुर्क, कोन्नि वर्सानाहाटीं ओर्क तेळियताप, मनम सुद्रांचना इंचि टेरनिंग हीतुर. गानि पेन मना बेसताहाटीं, मनाकुन दानालेह्का पवित्र कियालय टेरनिंग हींता. 11 इंदके इव टेरनिंगकु येतनेंके मनाकु कुसि अन्पिच्चो, दुक्कम वांता. गानि बोरय्ते ओर्सकुंचेके टेरनिंग बेस मनसु तासि करियंतुरो, ओर्कु सत्तेम, सांतिते निंडता पिस्वर दोर्कंतां.
12 अदुनहाटीं, अरसोत्ता मीवा कय्कुन आनि ताकत हिलुवा मीवा टोंग्रन मजबूत कीसि पेनदा हरदे वितसेके मंटु.c 13 मिमेट मीवा बरोसाता हरदे सवरगा ताकाटु.d अस्के बोरय्ते बरोसाते कुंटि आसि मंतोरो, ओर बरोसाते इंकिच्चो कुंटि आयाकोंटा गट्टि पळानुर.
बरोसाते पिस्सानोर्क कोन्नि जेगर्तां
14 अंटोर मनकलोरतोनि सांतिते कलियसि मनना कोसिस कीम्टु. बारित्ते अल्हा (पवित्र) मनाकोंटे बोरे मनकल सामिनगा होना पर्रोर. 15 पेनदा दयाताल वरोरगुडा तप्सोनामन्नि इंचि जेगर्ता मंटु. अल्हा तप्सोंचि हेळतोर बोरन्ना मी नड्डुम मनानय्ते, ओर कळमातोर्कुन हेळ्हासि, पेनदाल लक्कु कींतोर. इदुन जरा जेगर्ता हूळट.e 16 मीवा नड्डुम बोरे व्यबिचारम कियानोर मनाकोंटा हूळकुंटु. एसावुनलेह्का, उंदि पूटाता गाटोहाटीं ओना जेस्टम पालुंक विलुवा हिय्याकोंटा तम्मुंक अम्मुकुत्तोर.f 17 पजा एसावुना गति बतल आता मीक अय्ते तेळियसे मंता. वारसाहक्कुनाहाटीं बाबोनगा आसिर्वाद येतालय होत्तस्के, बाबो ओन्कु आसिर्वाद हिय्या हिल्लोर. मनसु मार्सकुंचि बाबोना आसिर्वाद येतानाहाटीं ओर अळतोर, मोत्कुत्तोर. अयना ओन्कु मोका दोर्का हिल्ले.g
18-19 इस्राएल लोकुल्क अय्ते कय्दे इट्टा पर्रानाल मत्ता गुट्टातगा होत्तुर. अद गुट्टा तळमिते पोत्सेके मत्ता, हिर्रु-हीकाटा, वडि-दुमारम, अद गुट्टातगा मत्ता. गानि मिमेट अय्ते असोंटा गुट्टातगा होना हिल्लिर. अद गुट्टातगा इस्राएल लोकुल्क, तूताकोम आनि कतरनाक वळ्काना पेनदा लेंगुन केंजतुर. केंजसि, “मर्रा बस्केन इसोंटा लेंग माकु केंजा वायामन्नि” इंचि पेनदुक विनंति कीतुर.h 20 बारित्ते, “इद गुट्टातुन, उंदि जिवरासि इट्टिना, दान बंडाने तंचि हव्काना,” इंचि पेन वेह्चि मत्ता, इद आदेसतुन ओर केंजा पर्राहिल्लुर.i 21 अगा जर्गता गटना इच्चोन कतरनाक मत्ता गदा, अदुना बारेमते मूसालगुडा, “नना इरगा वेरियसि गजा-गजा आसंतन,” इंचि इत्तोर.
22 गानि मिमेट अय्ते सियोन गुट्टातगा वातिट. जीवाते मनना पेनदा, स्वर्गमते मनना येरुसलेम सहर इदे आंद. कुसिते उंदगा जमा आता, लेक्का हिलुवच्चोन पेनदा दूतानगा मिमेट वातिट. 23 सत्तेमंतुड लोकुरा आत्माना कलिसियातगा मिमेट वातिट. आ कलिसियातगा अंटोरा पोर्रोलीं रासि मंतां, अंटोर्क जेस्टम पालना अदिकारम मंता. अंटोर्कुन पेन दानतोनि मनालय पुरागा कीता. दुनियाता मनना अन्निटवुना न्यायम कियाना पेनदागा मिमेट वातिट. 24 इंका पूना करारता नड्डुमतोर आता येसुनगा मिमेट वातिट. आदामना मर्रि आबेलना नेत्तुर इत्ते, ओना दादाना बद्ला येतालय पेनदुन केयताप मत्ता.j गानि येसुना नेत्तुर अय्ते मीवा पोर्रो सल्सि मीवा पापाल्कुन मापि कीम इंचि पेनदुन केयताप मंता.
25 इद दुनियाते, लोकुल्कुंक जेगर्ता मनालय पेन वेहतस्के, ओर पेनदा पोल्ले केंजा हिल्लुर. अदुनहाटीं ओर पेन हीता सिक्साताल तपिच्कुना पर्राहिल्लुर. अय्ते इंदके मनम स्वर्गमताल वेहनोना पोल्लेतुन केंजाकोंटे, पेन हिय्यना सिक्साताल बल्हा तपिच्कुना पर्रांतोम? अदुनहाटीं जरा जेगर्ता मंटु, बोरय्ते वळ्कसंतोरो ओना पोल्लेन पास्काकोंटा, बेस केंजट. 26 अद कालमते पेन वळ्कतस्के, दाना आवाजते, बूमिअंता गजा-गजा ऊंगता.k गानि इंदके पेन, “नना सिराप बूमितुने आयो गानि, मब्बुनगुडा मरुंदि मल्का गजा-गजा ऊपांतन,” इंचि पोल्ले हीता.l 27 “मरुंदि मल्का” इनना पोल्लेता अर्तम बतल इत्ते, इद दुनियाते गजा-गजा आयानव बव अय्ते मंतांगो, अव अन्नि तयार कीतव आंदूं, अदुनहाटीं अव नासडेम आसि दांतां, गानि बव अय्ते गजा-गजा आयाकोंटा मनंतांगो, अव बस्केळ्क अल्हेन मनंतां.