बरोसाते पिसतोरा बारेमते कोन्नि पोल्लें
11
1 बरोसा इत्ते बतल? मनम आसे पळसि मत्तव पोल्लें मनाकु तप्पकोंटा दोर्कानूं आनि मना कळ्कुंक दिस्साकोन्नागानि अव मंतां इत्ता गेरांटिए, बरोसा आंद. 2 मना एनकटा पेद्दाल्कुनगा इसोंटा बरोसा मत्ता, अदुनहाटींगे पेन ओर्कुन मेच्कुत्ता.3 बरोसाहेंदाले, पेन इद दुनियातुन दाना पोल्लेतोने पुटिस्ता इत्ता पोल्ले, मनम तेल्पिच्कुना पर्रंतोम. दीना अर्तम बतल इत्ते, मनाकु इंदके दिस्सानव अन्नि पोल्लें, दिस्सुवा पोल्लेनाहेंदाल पेन कीता,a इंचि मनाकु तेळियता.
4 बरोसाहेंदाले आदामना मर्रि आबेल, ओना दादाल काइनुंकन्ना बच्चोनो बेसता मोक्कु पेनदुक हीतोर. काइन बतल अय्ते हीतोर अदुन पेन मेच्कुना हिल्ले गानि, आबेलना मोक्कुन पेन मेच्कुंचि ओन सत्तेमंतुड इंचि गवाइ हीता. आबेल अय्ते हातोर, गानि ओना बरोसाहेंदाल ओर मनातोनि इदवेरदाकागुडा वळ्कसंतोर.b
5 बरोसाहेंदाले हानोकुंक हामुर वायाका मुन्नेन, उंदि रोज ओर गायप आतोर बारित्ते पेन ओन तेहाकुंचि ओता. अदुनहाटीं ओना जाळा बोनके दोर्का हिल्ले. पेन ओन स्वर्गमते ओयाका मुन्ने ओर पेनदुन कूस कीतोर इंचि ओना बारेमते दर्मसास्त्रमते रासतद मंता.c 6 बरोसा हिल्वद पेनदुन बोरे कूस किया पर्रुर. पेनदागा वायाना हरेक मनकल, पेन निजमते मंता आनि दान हट्टु पीसि पह्कानोंक अद बेसता इनाम हींता इंचि बरोसा किया पींता.
7 बरोसाहेंदाले नोहाल, कम्मुड वायाना मंता इंचि पेन ओन्कु वेर्रे वेहतस्के ओर कम्मुडतुन बस्केन हूळा हिल्लोर गानि,पेनदा पोल्लेक कदर हीसि, कम्मुड वायाका मुन्नेन ओना कुटुंबतोर्कुन कापाळनाहाटीं पेद्दा डोंगा तयार कीतोर. इल्हा ओर दुनियातोर अंटोर तप्तुर इंचि ओना बरोसाहेंदाल पेन दुनियातोर्कुन दोसिल्क इंचि वेहता. ओना इदे बरोसाहेंदाल ओर, पेनदा मुन्ने सत्तेमंतुल्क आतोरा लोप्पो कलियतोर.d
8 बरोसाहेंदाले अब्राहाम पेन वेहतद केंजसि, तेळियवा जेगातेके होनालय पेय्सतोर. पेन ओन, “नना नीकु हुप्साना देसेमते होन, अगाटा पूरा जेगा नीकु हीकन” इंचि इत्तस्के, ओर पेनदुन बरोसा कीताहाटीं, बेके होनना इंचि तेळियाकोन्ना होनालय पेय्सतोर.
9 बरोसाहेंदाले अब्राहाम, पेन ओन्कु हींतन इंचि पोल्ले हीता देसेमते होंचि, पराइ देसेमतोनलेसीं डेरा वाट्सि पिस्सेक मत्तोर. ओनतोनि ओना मर्रि इसाक आनि इसाकुना मर्रि याकोब, ईरगुडा अद देसेमता वारसदार्के. ओरगुडा अगा डेरां वाट्सि पराइ देसेमतोरलेसीं पिस्सेक मत्तुर. 10 बारित्ते, कुद्दु पेने सारे पीसि, पुनादि दोह्चि, बस्केळ्ताहाटीं निल्हाता सहरते मनालय ओर बरोसाते एदुर हूळसेके मत्तुर.
11 बरोसाहेंदाले अब्राहामुंक ओना मुत्तो सारानतोनि कलियसि, मातिरतनमतेगुडा मर्रिन कनाना बलम दोर्कता. बारित्ते, ओन्कु संतानम हींतन इंचि बद पेन अय्ते पोल्ले हीतानो, अद पोल्ले तप्पो इंचि ओर दानपोर्रो बरोसा इरतोर.ef 12 अदुनहाटीं डुग-डुग मातरल आसि हासोत्तोनलेह्का मत्ता वरोरे अब्राहामुंक पेन, मब्बुने मनना सुक्कनच्चोन आनि समुद्रम ओड्डुंक मनना उस्केतच्चोन, लेक्का परुवच्चो संतानमतुन हीता.g
13 पेनदापोर्रो बरोसा इरतोर अंटोरगुडा दानपोर्रो बरोसा इरसे हासोत्तुर. पेन हींतन इंचि पोल्ले हीतद ओर्कु दोर्का हिल्ले. गानि पेन हींतन इत्तादुन लक्कुटाले हूळताप हूळसि कूस आतुर. पजा मनम इद बूमिपोर्रो पय्नम कीसेके वाता पराइतोरम इंचि ओप्कुत्तुर. 14 इसोंटा पोल्लें बोरय्ते वळ्कंतुरो, ओर ओरा सतता देसेमतुन पह्कसंतुर इंचि मनाकु अर्तम आंता. 15 ओक्कला, ओर होळसि वाता देसेमता बारेमतेगिंटा विचारम कीसि मत्ते, ओर्क ओरा होळसि वाता देसेम मल्सि होनना मोका दोर्कीसि मनवळ. गानि ओर होळसि वाता देसेमता विचारमते मना हिल्लुरh. 16 दाना बदुलते ओर, होळसि वाता देसेमकन्ना एक्को बेसता देसेम, इत्ते ओराहाटीं पेन स्वर्गमते तयार कीसि इरता देसेमते होनना विचारमते मत्तुर. अदुनहाटीं पेन, नना ओरा पेनदुन इंचि इनालय सिग्गु अर्रोi.
17 बरोसाहेंदाले, पेन अब्राहामुना पट्टु हूळतस्के, अब्राहाम ओना मर्रि इसाकुन पेनदुक मोक्कु हियालय तयार आतोर. दानकन्ना मुन्ने पेन, “इसाकुनाहेंदाले नीकु नीवा वंसमतुन हींतन,” इंचि पेन पोल्ले हीसि मत्ता. 18 अयना पेन अब्राहामुंक मुन्नेन, “इसाहाकुनाहेंदाल नीकु दोर्काना वंसंम नावा लोकुल्क आयानुर,” इंचि पोल्ले हीसि मत्ता. आयनागानि ई इसाकुने अब्राहाम, पेनदुक मोक्कु हियालय तयार आसि मत्तोर. 19 बारित्ते, पेन हासोत्तोर्कुंकगुडा जीवा अरहा पर्रंता, इंचि ओर बरोसा कीतोर. आनि हातोन जीवाते तेहाचि हीतापे, पेन अब्राहामुंक ओना मर्रिन हीतागुडा.j
20 बरोसाहेंदाले इसाक, ओना याकोब, एसाव इनना इव्वुर मर्कुंक, वायाना कालमते ओर्कु बल्हा जर्गार इंचि आसिर्वाद हीतोर.k
21 बरोसाहेंदाले याकोब, जीवा होळसका मुन्ने, योसेपुना इव्वुर मर्कुन वरो-वरोन केय्सि, आसिर्वाद हीतोर आनि दुड्डुना पोर्रो ऊनसि पेनदुन आरादना कीतोर.l
22 बरोसाहेंदाले योसेप, इस्राएल लोकुल्क इजिप्त देसेमताल पेय्सि होनानुर इंचि जीवा होळसका मुन्नेन वेहा परतोर. अचोने आयाका, अद देसेमताल पेय्सि होनंनेके ओना बोक्कनगुडा पीसि पेय्साना इंचि आदेस हीतोर.nm
23 बरोसाहेंदाले, मूसाल पुट्तस्के ओना तल्लुर-बाबो ओन मूड नेल्कु मक्किच्चि इरतुर. “मावा पेडल सक्कगा मंतोर” इंचि तल्लुर-बाबो तेल्पिच्कुत्तुर. अदुनहाटीं “इब्रितोर्क पुटता अंटोर मांड्सा पिलाल्कुन हव्कटु” इंचि राजाल हीता आदेसुंक ओर वेरियाकोंटा मत्तुर.o
24 बरोसाहेंदाले मूसाल पेद्दा बेर्सतस्के, पिरोन राजाना मिय्यटा मर्रिन इंचि वेह्कुनालय ओप्कुना हिल्लोर. 25 दान्कु बदुलते, पापमहेंदाल दोर्कना जेर्रासेपाटा सुकमते पिस्सनदानकन्ना, पेनदा लोकुल्कुनतोनि कलियसि तिप्पल्क बोगांच्मळे बेस इन्कुत्तोर. 26 पेनदाहेंदाल दोर्कना इनामुनाहाटीं ओर उंदितीर एदुर हूळसेके मत्तोर. अदुनहाटीं ओर इजिप्त देसेमता दनम-संपत्तिकन्ना, किरिस्तुनाहाटीं अपमानम सहन कियमळतुने पेद्दा दनम इन्कुत्तोर.
27 बरोसाहेंदाले, इजिप्त देसेमता राजाल होंगुंक वायिनागानि, वेरियाकोंटा मूसाल इजिप्त देसेम होळसीतोर. बोर्के दिस्सुवा पेन ओन्कु दिसताप, ओर गट्टि दैरनेमते मत्तोर. 28 इजिप्त लोकुल्कुना तोल्सूर मर्कुन हव्कालय पेन लोहता दूता, इस्राएलतोरा मर्कुन इट्टानायो इंचि, बरोसा कीताहाटींगे मूसाल, गोर्रेता नेत्तुरतुन लोता दारसाककु होकालय वेहचि, दाटसि होनना पंडुगुन सुरुव कीतोर.
29 बरोसाहेंदाले, इस्राएल लोकुल्क, वत्तुता बूमिपोर्रो ताकताप, एर्रा समुद्रमते ताकसेके होनना दैरनेम कीतुर. ओरालेह्केन इजिप्त लोकुल्क कियालय हूळतुर अय्ते, अव्टेन मुळ्गिसि हातुर.p
30 बरोसाहेंदाले, इस्राएल लोकुल्क यरिहो सहरता गूरे सुट्टु एडूं रोजकु तिरियतुर, अस्के आ गूरे कूलसि अर्ता.q
31 बरोसाहेंदाले, यरिहो सहरता रहाब इनना वेस्या, तेळियाकोंटा जाळा कियालय वाता इस्राएलतोर्कुन दाना लोते केय्सि सांतिते सहायम कीता, अदुनहाटीं पेन बेइमान लोकुल्कुनतोनि दाना नासडेम किया हिल्ले.r
32 इंका नना बोरा-बोरा बारेमते वेहासेक मंदकन? गिदोन, बाराक, समसोन, इपताल, दाविद राजाल, सामवेलनसोंटा पेनदा कबुरतोर. ईरा बारेमते वेहालय नाकु पुरसत हिल्ले. 33 बरोसाहेंदाले इरव्टेटाल इच्चुर लोकुल्क राज्येल्क गेल्सतुर, इच्चुर लोकुल्क सत्तेम कबाह्क कीतुर, इच्चुर लोकुल्क, पेन हींतन इंचि पोल्ले हीतदुन दोर्किच्कुत्तुर, इच्चुर लोकुल्क सिंहाना कतराताल पलाते अरतुर. 34 इंकिच्चुर लोकुल्क पोत्तना तडमितुन पिरहातुर, इच्चुर लोकुल्क तलवारकुना अय्दरताल तप्पिच्कुना परतुर, इंकिच्चुर बारे बलम हिल्वस्केगुडा बलमगल्लोर्क आतुर, लडाइने वीरूल्क आतुर आनि पराइ देसेमता सिपाइल्कुन गेद्मिसीतुर. 35 बरोसाहेंदाले कोन्नि मुर्ताह्कुंक, अवुना हासोत्ता जीवातोर्क, मर्रा जीवा अर्सि वापस दोर्कतुर.
गानि इंकिच्चुर मात्रम पेनदापोर्रो बरोसा इरताहाटीं देब्बां तिंचि-तिंचि हासोत्तुर. हासि मर्रा जीवाते तेदतस्के, पेन माकु बेसता पिस्वर हिय्यार इत्ता आसेते, इग्गेटा पिस्वरतुन दक्किच्कुनालय पेनदुन होळसा हिल्लुर. 36 इंकिच्चुर्कुन बारे कारेड्डाल्क कीसेके पोट्टेने तंतुर, इंका गोल्सुकुने दोह्चि जेलने वाटतुर. 37 सगोमतोर्कुन अय्ते बंडाने तंतुर, आरेने कोय्सि तुकडां कीतुर, ओरा पट्टु हूळतुर,s तलवारकुने कोह्कीसि हव्कुतुर. गरिब-कंगाल आसि दुक्कमते, एटीं-गोर्रेना तोल्कु मुच्कुंचि बेके-बेकेनो तिरियसेके मत्तुर. लोकुल्क ओर्कुन बागेने तकलीप कीतुर. 38 दुनियाता लोकुल्क, पेनदापोर्रो बरोसा इरतोरालायक मना हिल्लुर. अदुनहाटीं ओर उस्के बूमिने, गुट्टानपोर्रो, पडाने, बंडा सोर्रेने मंचेके तिरियुंदुर.
39 ईरा अंटोरा बरोसातुन हूळसि पेन अय्ते ओर्कुन मेच्कुत्ता. गानि पेन ओर्कु बद आसिर्वाद अय्ते हींतन इंचि पोल्ले हीसि मत्तानो, अद आसिर्वाद मात्रम ओर्कु दोर्का हिल्ले. 40 बारित्ते अन्निट्कन्ना बेसतद उंदि पोल्ले पेन मनाहाटीं मुन्नेटाले तयार कीसि इरता. अद पोल्लेतुन मनाकु, ओर्कु उंदे मल्का दोर्काना इंचि पेन अल्हा कीता.