मुर्ताह्क-मांडसताहाटीं नियमकु
2
1 अन्निटकन्ना मुन्ने नना नीकु विनंति कींतन गदा, पेनदुक विनंति कियनेंके, पारतना कियनेंके, वरोनद वरोनाहाटीं पारतना कियनेंके आनि दन्यवाद कियनेंके अंटोर लोकुराहाटीं कियगोम. 2 मनाकु राजालोराहाटीं आनि पेद्दा-पेद्दा अदिकारिल्कुनाहाटीं पारतना कियगोम. अल्हा कीते मनम आरामते, सांतिते आनि पेनदुक नच्चना कदरगल्ला पिसवर पिसा पर्रांतोम. 3 इल्हा कियमळ मंचिद आंद. मनाकुन कापाळना पेनदा नदरतेगुडा इदे ओप्कुननालायक मंता. 4 लोकुल्क अंटोर्कुंक मुक्ति दोर्कना आनि निजमतुन एरपाट कियना इंचि पेनदा इच्चा मंता. 5 बारित्ते पेन उंदे आंद. इंका मनकल आनि पेनदुन कल्पालय नड्डुमगुडा वरोरे मंतोर. ओरगुडा वरोर मनकले. ओरे किरिस्तु येसु आंदुर. 6 अंटोर लोकुल्कुंक मुक्ति अस्सि हियनाहाटीं ओर सततुन कुदुवा इरसि ओनद ओर अप्पजेप्कुत्तोर. आनि ओना गवाइ मंचि वेलापोर्रो हीतोर. 7 आनि इदे गवाइतुन वेहनाहाटीं, नाकुन प्रचार कियानोर आनि प्रेरित इंचि पेरमळ जर्गता. इंका यहुदि आयवोर्कुंक विस्वासम आनि सत्तेमता बारेमते कराहनोर इंचि निलाहमळ जर्गता. नना निजम वेहचंतन, आबद्दम वेहासेक हिल्लेन.8 अदुनहाटीं पारतना कियना अन्नि जेगाने मनसुने बतले होंगु-जगडम इर्रांकोंटा पवित्र कय्कु पोर्रो तेहचि मांडसा पारतना कियना इंचि नावा इच्चा मंता.
9-10 अल्हेने मुर्ताह्कुना हेंदाल नना कोरानद बतल इत्ते, अव सादा-सिंपल कपडीं पोंडसि, साप मनसुने मनगोम. इंका बेस कबाह्क कीसि पेनदा बेस बक्ति कियनावुनलेसीं मनगोम. गानि बंगाराल्क, डिस्को पूसाना दुम्मे वाटकुंचि, वेल्लेन दराता कपडीं केरसि, रका-रकाल्कुना जेडां वाटसि सिंगाराल्क अर्रानायो. बारित्ते मुर्ताह्कुंक अदे बेस.
11 आनि मुरतळ सिराप सांतिते कय हिळु मंचि अन्नि करियगोम. 12 उंदि मुरतळ, मांडसक कराहमळ, ओनपोर्रो अदिकारम ताकिचमळता बारेमते, नना ओप्कुन्नोन. मुरतळ सिराप चुपचाप मनगोम. 13 बारित्ते पेन मोदाला आदामुन आनि पज्जोटाल हव्वान कीता. 14 इचोने आयका, आदाम पसांचा हिल्लोर गानि मुरतळ पसांचि पापमते अर्ता. 15 गानि अद ओक्कला विस्वासम, पावरम, पवित्र आनि ओप्केते पिलाल्क कंचेके तल्लुना जिम्मेदारिं पूरा कियनय्ते, दानकु तप्पकोंटा मुक्ति दोर्कार.