तिमोतिंकु पौलुस रासता मोदाटा सिट्टि
तिमोतिंकु पौलुसना नमस्कारम
1
1 इद सिट्टि पौलुसुनद आंद. मनम बोन पोर्रो अय्ते आसे पडसि मंतोम, आ किरिस्तु येसु आनि मनाकुन कापाळाना पेनदा आदेसताहेंदाल नना किरिस्तु येसुना प्रेरितa आतन. 2 विस्वासमते नावा निजम मर्रि आता तिमोतिंकु इद सिट्टि रासतन. मना पेनबाबानाहेंदाल आनि मना सामि येसु किरिस्तुनहेंदाल नीकु कृपा, दया आनि सांति दोर्कि.तप्पुड बोदा कराहना गुरुल्कुनगटाल जेगर्ता मंटु
3 नना मेसिदोनिया राज्येम होननेंके नीकु नना विनंति कीसि वेहतन. दाना परकारम निमे इपिसुस सहरते मन्नु. निमे अगा मत्ते, बोरय्ते सत्तेम्कु बदुल वेरे बोदां कराहंतुर, ओर्कुन अल्हा कराहकोंटा आपा. 4 पुट्टिचि वेहना कतां आनि वंसाल्कुना जोलीं ओर होळसियालय आदेस हीम. बारित्ते अवुनहेंदाल वाद-विवादकु आंतां आनि विस्वासमहेंदाल जर्गना पेनदा पिलानगुडा पुरागा आयो. 5 आनि ई आदेसता उद्देसम, पवित्र गुंडेताल, मनसुना बेस पोल्लेताल आनि निजम विस्वासमताल पुट्टना पावरम आंद. 6 इच्चुर लोकुल्क इवनाल तप्पीसि अव्सरम हिलुवा पोल्लें वळ्कालय दल्गतुर. 7 ओर वेहना पोल्लेना अर्तम बतलो ओर्के तेळियाकोन्ना, गट्टि विस्वासमते ओर, मूसाना नियमाल्कुना गुरुल्क आयाना इन्कुंचंतुर.
8 मूसाना नियमकुने मत्ताप बरोबर ताकानय्ते, अद मंचिदे इंचि माकु एरपाटे. 9 इंका इव नियमकु सत्तेमते ताकानोराहाटीं रासमळ जर्गा हिल्ले. गानि अव अय्ते, नियमकुन पीसि ताकवोराहाटीं, आदेसकुन पीसि ताकवोराहाटीं, बक्ति कियवोर आनि पापि लोकुल्कुनाहाटीं, अपवित्र आनि सत्तेमते ताकवोराहाटीं, तल्लुर-बाबोन हव्कनोराहाटीं, मनकलोर्कुन हव्कनोराहाटीं, 10 बोगमतनम कियानोराहाटीं, मांड्सा-मांड्सातोनि बोगमतनम कियानोराहाटीं, मनकलोर्कुन दोर्का पीसि अम्मानोराहाटीं, आबद्दम वळ्कानोराहाटीं, तप्पुड गवाइ वेहानोराहाटीं इंका सत्तेम पोल्लेन आबद्दम कियानोराहाटीं ई मूसाना नियमकु मंतां. 11 तल्सुकुननालायक पेनदाहेंदाल वाता कदरगल्ला बेसता कबुरतुन नना कराहना इंचि नाकु अप्पजेपमळ जर्गता.
पौलुसुन पोर्रो पेनदा दया मंता
12 नना मना सामि येसु किरिस्तुंक दन्यवाद कींतन, बारित्ते ओरे नाकु बलम हीतोर. इंका नाकुन विस्वासम लायकतोर इन्कुंचि ओना सेवाताहाटीं निल्हातोर. 13 मुन्ने नना बदनाम कियुंदुन, तकलिप हियुंदुन, तेंडसि पोहचि वळ्कुंदुन. अयना नाकु सामिना दया दोर्कता, बारित्ते नना कियानद बतलो तेळियका, अविस्वासमते अल्हा कीतन. 14 आनि मना सामिना दया नाकु वेल्लेन दोर्कता. अचोने आयका, येसु किरिस्तु ओनगा मनना विस्वासम आनि पावरमगुडा नाकु हीतोर.
15 पापिर्कुन पिसागोटनाहाटीं येसु किरिस्तु इद दुनियाते वातोर. ई पोल्ले सत्तेम आनि पूरा ओप्कुननालायक मंता. आनि अंटोरकन्ना पेद्दा पापिन नना आंदुन. 16 अय्नागानि येसु किरिस्तुना पोर्रो दया हुपिस्तोर. अल्हा दया हुपिच्चि, मुन्ने बोरय्ते बस्केळ्क पिस्सना पिसवर दोर्कना इंचि ओनपोर्रो विस्वासम कींतुरो, ओर्क ओना अंतेम हिलुवा सहनमतुन हुपसनाहाटीं उंदि उदाहरनता रूपमते नावसोंटा पापिन इरतोर. 17 बस्केळ्क मनना राजाल, बस्केन हामुर हिलवोड, बस्केने दिस्सोर असोंटा मावा उंदे पेनदुक पीळि-पीळिनदाका कदर आनि पेदातनम दोर्कि. आमीन.
तिमोतिना जिम्मेदारीं
18-19 बिड्डा तिमोति! पेनदा कबुरतोर नीवा बारेमते मुन्ने बव पोल्लें अय्ते वेह्चि मत्तुरो, आ पोल्लेना परकारम, निमे नीवा विस्वासमतुन गट्टिगा पीसि, मनसुना बेस पोल्ले पीसि वरोर बेस सिपाइलेह्का लडाइ कीसेके मनना इंचि नना नीकु आदेसतुन अप्पजेपसंतन. बारित्ते मनसुना पोल्लेतुन हय्सका वेल्लेन मंदि लोकुल्क, उंदि डोंगा रोंडु तुकडां आसोत्ताप, ओर ओरा विस्वासमतुन नासडेम कीकुत्तुर. 20 विस्वासमतुन नासडेम कीकुत्तोरव्टेटाल हुमिनयुस आनि सिकंदर ईर इव्वुर मंतुर. पेनदुन बदनाम कियाकोंटा बल्हा मनना इत्ता पोल्ले करियना इंचि नना ईर्कुन देय्यम्कु अप्पाजेप्तन.