चर्चता अदिकारिर्क बल्हा मनना?
3
1 ओक्कला बोरन्ना मनकल चर्चता पेद्दा मनकल आयना मनसु इरते, ओर तप्पाकोंटा बेस कबळ कियना इन्कुंतोर, इत्ता पोल्ले मात्रम निजम आंद. 2 पजा आ पेद्दा मनकना पिसवरते बतले दोसेम मननायो. ओर उंदे मुरतटा मुय्दो आयगोम, ओर ओप्के पीसि मनानोर आयगोम, ओर विचारम कीसि ताकानोर आयगोम, अंटोर ओना कदर कियनालायक ओर मनगोम, ओर वेरेतोर्कुन बेस हूळकुनानोर आयगोम आनि वेरेतोर्क कराहनालायकगुडा मनगोम. 3 इंका ओर कल्कु उनानोर, मर्लाबळानोर, जगडम कियानोर मनामन्नि गानि मेत्तटा मनसुनोर मनगोम. ओन्कु कोत्तना लालच मनामन्नि. 4 ओर ओना सतता कुटुंब बारेमता अन्नि जिम्मेदारिं बेस हूळकुनानोर मनगोम, ओना मर्क-मियाह्क ओना देकरेकते मंचेके ओना बेस कदर कियनोर मनगोम. 5 बारित्ते वरोर मनकंक ओना कुटुंबता देकरेक किय्युडे तेळियाकोंटे, ओर पेनदा चर्चुना देकरेक बल्हा किया परांतोर? 6 इंका ओर पूनें-पूनें विस्वासमते वातोर आयामन्नि, बारित्ते असंटोंकु गर्रा वासि देय्यम्क दोर्कानसोंटा सिक्साता आदेस ओन्कु दोर्कार. 7 इच्चोने आयका वेरे लोकुल्कुना विचाराल्कगुडा ओना बारेमते बेस मनगोम. अल्हा मनाकोंटे ओर सिग्गु पोळागोट्कुंचि देय्यमता कय्दुक दोर्का परांतोर.चर्चता सेवक
8 चर्चता सेवाकुल्कगुडा अल्हेन कदरलायक मनना. ओर रोंड नाल्केनोर इत्ते चुगलीं कियानोर मनामन्नि, ओर्कु कल्लु उनना अल्बट मनामन्नि, ओर तप्पु कबाह्क कीसि संपादिंचनोर मनामन्नि. 9 ओर विस्वासम बारेमता मर्ममतुन मनसुना बेस पोल्ले वेहताप तेल्पिच्कुंचि दान गट्टिगा पीसि मनानोर आयगोम. 10 ईरा गुनम बसंटदो तेळियनाहाटीं ईरदगुडा परिक्सा येतगोम. परिक्साते ओरगा बतले दोसेम दोर्काकोंटे, ओर्कुन चर्चता सेवक इंचि कबळ किया हियना. 11 इल्हेने मुर्ताह्कगुडा अंटोर कदर हियनलायक मनगोम. गानि अवुनगा वेरेतोर्कुन अपमानम कियना गुनम मनामन्नि. गानि बेस ओप्केते अन्नि पोल्लेने विस्वासम कियनलायक अव मनगोम. 12 चर्चता सेवकुंक उंदे मुत्तो मनगोम. आनि ओर ओना सतता मर्क-मियाह्क आनि ओना संसारमतुन बेस ताकसानोर आसि मनगोम. 13 बारित्ते बोरय्ते सेवक इंचि कबळ कींतोर ओर बेस कदर दोर्किच्कुना परांतोर. अचोने आयका किरिस्तु येसुना पोर्रो मनना ओना विस्वासमते ओन्कु वेल्लेन दैरनेम दोर्कंता.
मना विस्वासमता मर्मम
14-15 नाकु निहगा बिराना वायना आसे मंता. गानि ओक्कला नाकु वायालय आल्सेम आते, पेनदा कुटुंबते, इत्ते जीवाते मनना पेनदा चर्चने वरोर मनकल बल्हा मनगोम इत्ता पोल्ले नीकु एरपाट आयगोम इंचि इद सिट्टि रासेक मंतन. बारित्ते चर्चे निजमता निटड गुंजा आनि पुनादि आंदु. 16 मना दर्ममता सत्तेमता मर्मम वेल्लेन पेद्देद, इवटे बतले अनमानम हिल्ले: किरिस्तु मनकना रूपमते पुटतोर, ओनगा बतले दोसेम हिल्ले इंचि पवित्र आत्मा वेहता, पेनदा दूतांक ओर दिसतोर, ओना बारेमते यहुदि आयवोर लोप्पो प्रचार कियमळ जर्गता, दुनियातोर ओनपोर्रो विस्वासम इरतुर आनि पेनदा कदरते ओन मर्रा स्वर्गमते तेहामळ जर्गता.