पेनदुन कूस कियाना पिस्वर
4
1 विस्वासुल्कुनिटा! बल्हा पिसते पेनदुन कूस इरा परांतोम इंचि मिमेट मावाहेंदाल करियतिर, अल्हेने मिमेट पिस्सेकगुडा मंतिट, इंकागुडा मुन्ने अल्हेने पिस्सेक होंट इंचि विनंति कीसेक मंतोम आनि येसु सामिना लोप्पो तेल्पिचि वेहासेक मंतोम. 2 मोमोट येसु सामिनाहेंदाल बव-बव आदेसकु हीसि मत्तोम, अद मीक एरपाटे. 3 बारित्ते मिमेट बोगमतनमताल लक्कु मत्ते पवित्र मनंतिर, इदे पेनदा इच्चा आंद. 4 मीवा अंटेताल हरेक मनकल ओना मेंदुल्तुनa ओप्के पीसि, ओर पवित्र आनि आदर कियाना लायक मनमळ गावाले. 5 आनि लालचते मननोर पेनदुन एरपाट किय्युर, असंटोरतोनि इल्हा मनमळ आयो. 6 दीना बारेमते बोरे आयिर दंटाता विस्वासिन पसांचा मनि, पसांचते सामि ओर्क सिक्सा हींतोर इंचि मोमोट मीक मुन्नेने गट्टिगा वेहतोम. 7 बारित्ते पेन मनाकुन पवित्र मनालय केयता, गानि कराब मनालय आयो. 8 अदुनहाटीं बोरय्ते इद पोल्लेतुन पास्कंतोर, ओर मनकन आयो गानि मीक पवित्र आत्मा हियना पेनदुन पास्कंतोर.9 गानि मिमेट वरोंक-वरोर दादाल-तम्मुह्कुनालेसिं पावरम कीम्टु इंचि इद पोल्ले मीक रासनद अम्सरम हिल्ले. बारित्ते वरोंक-वरोर पावरम कियमळ मिमेट पेनदा हेंदाले करियतिर. 10 आनि मिमेट मकिदोनिया राज्येमते मनना अंटुर विस्वासुल्कुन पावरम कीसेक मंतिट. गानि विस्वासुल्कुनिटा! मिमेट इंका एक्को पावरम कीम्टु इंचि मोमोट वेहासेक मंतोम. 11 मोमोट मीक आदेस हीताप, सांतिते पिस्सना, बोना कबाह्क ओरे कियाना, बोना कयकुने ओरे कबळ कियाना कोसिस कीम्टु. 12 इल्हा मत्ते मिमेट विस्वासम कियवोर्क ओप्पनलायक मनंतिर, अल्हेने बोना पोर्रोने बर्वु अर्रिर.
सामिना मर्रा वायमळ
13 विस्वासुल्कुनिटा! हातोरा बारेमते मीक तेळियाकोंटा मनमळ माक इस्टम हिल्ले. बदे आसे हिल्वोर दुक्कमते मनंतुर, गानि ओरालेसिं मिमेट मनमट. 14 बारित्ते येसु हासि मर्रा जीवाते तेदतोर इंचि मनम विस्वासम कींतोम, अल्हेने बोरय्ते येसुन विस्वासम कीसि हातुर, ओर्कुन पेन येसुनतोनि पीसि वायार. 15 सामिना पोल्ले परकारम मोमोट मीक वेहानद बतल इत्ते, सामि मर्रा वायानस्के मनम पिस्सि मनिना गानि, हातोर विस्वासुल्कुंकन्ना मुन्ने सामिनगा होना पर्रोम. 16 बारित्ते सामि स्वर्गमताल हिडु रेयानुर अस्के पेद्दा आवाजते आदेस हियमळ, पेद्दा दूताता पोल्लेते आनि पेनदा तूताकोम्मुता आवाज कियमळ जर्गंता. आनि बोरय्ते किरिस्तुन लोप्पो हातुर, ओर मुन्ने जीवाते तेदानुर. 17 अस्के ओरतोनि मनाकुनगुडा बोरय्ते मनम जीवाते पिस्सि मंतोम, मब्बुने पोर्रो वळिते किरिस्तुनतोनि कलियालय तेहकुंचि ओयमळ जर्गंता. इल्हा मनम बस्केळ्क सामिनतोनि मनंतोम. 18 अदुनहाटीं इव पोल्लेनाल वरोंक-वरोर दैरनेम हीसेक मंटु.