सामि वायानाहाटीं तयारते मंटु
5
1 विस्वासुल्कुनिटा! अव गटनां जर्गना वेला आनि कालमता बारेमते मोमोट मीक रासना अम्सरम हिल्ले. 2 बारित्ते नर्कटा वेलाते दोंगल बल्हा अचानक वांतोर, अल्हेने सामि वायाना वेलागुडा मनंता इंचि मीके एरपाट. 3 बस्के अय्ते लोकुल्क, “मोमोट सांतिते मंतोम, माक वेर्रे हिल्ले,” इंचि वेहासेक मनंतुर, अस्केने पीटे मंदना मुर्तळकु बल्हा नोप्पिं वांतंगो अल्हेने पीळा ओरापोर्रो अचानक वांता. ओर बल्हा कियाना गानि पिस्सुर. 4 गानि विस्वासुल्कुनिटा! अद रोजु दोंगानलेसिं अचानक मीवापोर्रो वायालय मिमेट बारे हीकटते हिल्लिर. 5 मिमेट अंटुर वेलगुना आनि पोद्दलता पिलाल्क आंदिर, मनम नर्का आनि हीकटतोरम आयोम. 6 अदुनहाटीं मनम वेरेतोरालेसिं मींडसि मनमळ आयो गानि तेल्विते आनि उसारते मंदकोम. 7 मींडानोर नर्कळ्कु मींडंतुर आनि रिम्मा आयानोर नर्कळ्के रिम्मा आंतुर. 8 गानि मनम पोद्दालतोरम आताहाटीं सांतते मंदकोम. मना चातितुन कापाळना कच्चिता अंगिलेसिं विस्वासम आनि पावरमते ताककोम. मना तल्लक टोपिलेसिं मुक्तिता आसे इरकोम. 9 बारित्ते पेन मनापोर्रो होंग हूप्सालय आयो, गानि मना येसु किरिस्तु सामिनाहेंदाल मुक्ति दोर्किच्कुनालय पेन मनाकुन निलाहता. 10 मनम हायिना, पिस्सिना किरिस्तुनतोनि मंदना इंचि ओर मनाहाटीं जीवा हीतोर. 11 अदुनहाटीं, मिमेट इंदके कीसेक मंतिट अल्हेने वरोंक-वरोर दैरनेम हीम्टु, वरोन-वरोर विस्वासमते निल्हाटु.आकिरता पोल्लें
12-13 विस्वासुल्कुनिटा! बोरय्ते मीवा नड्डुम कस्टपळसि सामिना हर्दे मीकुन मुन्ने अर्सि ताकिचेके मीक कराहंतुर, ओर्क मिमेट कदर हीम्टु. आनि कियाना बेसता कबाह्कुनाहाटीं पावरमते ओर्क एक्को मान-मर्यादा कीम्टु, वरोंक-वरोर बेस सांतिते मंटु, इंचि मीकुन विनंति कींतन. 14 मावा विस्वासुल्कुनिटा! लंडोर्कुंक समजांचि वेहाट, वेरियानोर्कुंक दैरनेम हीम्टु, कमजोर मत्तोर्कुंक सहायम कीम्टु, अंटुरतोनि ओपकेते मंटु इंचि मोमोट मीक तेळियागोट्सि वेहासेक मंतोम. 15 मीवा लोप्पो बोरन्ना सेड्डातनमता बदला सेड्डातनम कियाकोंटा हूळकुंट. गानि बस्केळ्क वरोंक-वरोर आनि अंटुराहाटींगुडा बेस कियालय कोसिस कीम्टु. 16 बस्केळ्क कुसिते मंटु. 17 बस्केळ्क पारतना कीसेक मंटु. 18 मीक बसोंटा परिस्तिति वायाना पेनदुक दन्यवाद कीम्टु. बारित्ते मिमेट किरिस्तु येसुन लोप्पो मत्ताहाटीं, इल्हेने मंदना इंचि मीवाहाटीं पेनदा इच्चा मंता. 19 पवित्र आत्माता वेलगुन पिर्हुमट. 20 पेनदा कबुरतोरा पोल्लेन पास्कमट. 21 गानि अन्निटवुन परिक्सा कीसि हूळाट, आनि बव बेसतवो अवुन पीसि मंटु. 22 अन्नि तीरकुना कराब पोल्लेनाल लक्कु मंटु.
23 सांति हियना पेने कुद मीकुन पुरागा पवित्र कियिकांटि, मावा येसु किरिस्तु सामि मर्रा वायानादाका मीवा आत्मातुन, जीवातुन, मेंदुलतुन दोसेम हिलाकुंटा कापाळिकांटि. 24 मीकुन केयता पेन विस्वासम लायकतद आंदु, अद अल्हेने कींता. 25 विस्वासुल्कुनिटा! मावाहाटीं पारतना कीम्टु. 26 वरोंक-वरोर कय कल्पीसि जोहर कीम्टु. 27 इद सिट्टि अंटुर विस्वासुल्क केंजानाल हद्विसि हूप्सा इंचि नना सामिना अदिकारते वेहासेक मंतन. 28 मना सामि येसु किरिस्तुना दया मी पोर्रो मन्निकांटि. आमेन.