3
1 अस्के, इंका सहन कियमळ मावातोनि आया पर्राका एतेंस सहरते होंचि ओंटिगा मंदना विचारम कीतोम. 2-3 आनि किरिस्तुना बेसता कबुरतुन मावातोनि कलियसि वेहानोर पेनदा दासुड तिमोति तम्मुन मीहगा लोहतोम. ओर, मीक बसोंटा तकलिप वायाना गानि पज्जोळ्क-मुन्नेळ्क आयाकोंटा विस्वासमते गट्टिगा मंदना इंचि समजांचि वेहंतोर. बारित्ते इसोंटा तकलिपकु बोगांचालये पेन मनाकुन निलाहता इंचि मीक एरपाटे. 4 मोमोट मीवातोनि मतस्के, इसोंटा तकलिपकु वांतां इंचि मुन्नेने वेहतोम. अल्हेने जर्गता, अद मीक एरपाटे. 5 अदुनहाटीं नना आगा परा हिल्लेन. परिक्सा एतानोर मीवा परिक्सा एततोरा बतला, मोमोट कीता कस्टम एर्तम आताना बतला इंचि, मीवा विस्वासमतुन कन्कुनालय नना तिमोतिन लोहतन.6 गानि तिमोति इंदके मीहागटाल माहगा, मीवा विस्वासम आनि पावरमता बारेमते बेसता कबुर पीसि वातोर. मोमोट बल्हा मीकुन हूळालय बागा मति कींतोम, अल्हेने माकुन हूळालय मिमेटगुडा मावा बस्केळ्क मति कींतिट इंचि वेहतोर. 7 अदुनहाटीं दादालोर-अक्काह्कुनिटा! मोमोट तकलिपते, दुक्कमते मनिना गानि मीवा विस्वासमता हेंदाल, मीवा बारेमते माकु सांति दोर्कता. 8 बारित्ते मिमेट सामिन लोप्पो गट्टिगा निल्सि मत्ते, मोमोट जीवाते मत्तापे. 9 मीवाहेंदाल मोमोट मना पेनदा मुन्ने वेल्ले कुसिते मंतोम. अदुना बारेमते मीवाहाटीं मोमोट पेनदुक वेल्लेने दन्यवाद कींतोम. 10 मोमोट मीकुन हूळाना आनि मीवा विस्वासमते तक्को मत्तदुन पूरा कियाना इंचि नर्का-पिय्यल पेनदुक पारतना कीसेक मंतोम.
11 इंदके मना पेन बाबाल आनि मना येसु सामि मीहगा वायाना हर्रि तयार कियिरकांटि. 12 मोमोट मीकुन पावरम कीताप, मिमेटगुडा मीवा लोप्पो वरोंक-वरोर पावरम कियालय आनि अंटुर लोकुल्कुनतोनि पावरम बेर्सालय सामि मीक सहायम कियिरकाटि. 13 बस्के अय्ते मना सामि येसु ओना अंटुर संत लोकुल्कुनतोनि वांतोरो, अस्के मनम पेन बाबाना मुन्ने पवित्रते दोसेम हिल्वा मनालय मना मनसुल्कुन गट्टिगा कियिरकांटि.